អន្តរជាតិ
ហ្វីលីពីន៖ សាកសពឧក្រិដ្ឋជនគ្រឿងញៀនជាច្រើនត្រូវគេបោះចូលក្នុងសមុទ្រ រូបភាព៖ Al Jazeera
× អ្នកនេសាទហ្វីលីពីនម្នាក់បានរៀបរាប់ប្រាប់ទូរទស្សន៍ Al Jazeera ថា ខ្លួនត្រូវបានប៉ូលិសបញ្ជាឲ្យបោះទម្លាក់សាកសពឧក្រិដ្ឋជនគ្រឿងញៀនចូលក្នុងឆកសមុទ្រម៉ានីល។ ក្រោមបញ្ជារបស់អាជ្ញាធរ អ្នកនេសានេះបានបោះចោលសាកសពឧក្រិដ្ឋជនគ្រឿងញៀន២០នាក់ហើយចូលកទឹកសមុទ្រនោះ។
អ្នកនេសាទហ្វីលីពីនម្នាក់ឈ្មោះManuel ត្រូវបានប៉ូលិសបង្ក្រាបគ្រឿងញៀនហ្វីលីពីនបញ្ជាឲ្យបោះសាកសពឧក្រិដ្ឋជនគ្រឿងញៀនដែលប៉ូលិសចាត់ទុកជាសំរាមចូលក្នុងឆកសមុទ្រម៉ានីលចាប់ពីឆ្នាំមុនមក។ មកទល់ពេលនេះ Manuel សារភាពថា ខ្លួនបានបោះចោលសាកសពឧក្រិដ្ឋជនគ្រឿងញៀនចូលក្នុងសមុទ្រអស់ប្រហែល ២០ នាក់ហើយ។
ទូរទស្សន៍កាតា Al Jazeera ស្រង់សម្ដីអ្នកនេសាទរូបនេះដូច្នេះថា៖«ប៉ូលិសបានមកផ្ទះរបស់ខ្ញុំ ហើយបញ្ជាឲ្យខ្ញុំយកសាកសពទាំងនេះទៅបោះចោល។ ជាធម្មតាខ្ញុំតែងបោះចោលសាកសពឧក្រិដ្ឋជនទាំងនេះចូលឆកសមុទ្រម៉ានីល ហើយពេលខ្លះទៀតខ្ញុំដាក់វត្ថុមួយចំនួនភ្ជាប់ខ្លួនសាកសពឲ្យធ្ងន់ដើម្បីកុំឲ្យវាអណ្ដែតឡើងមកវិញ»។
អ្វីដែលគួរឲ្យភ្ងាក់ផ្អើលនោះ អ្នកនេសាទរូបនេះអះអាងថា លោកបានប្រទះឃើញសាកសពរបស់មិត្តភ័ក្ដិលោកថែមទៀត។ លោកភ័យខ្លាចថា ពេលក្រោយអាចនឹងដល់វេនរបស់លោកម្ដងផងក៏មិនដឹង។លោកមិនជឿទុកចិត្តលើអាជ្ញាធរក្នុងស្រុកឡើយ ព្រោះពេលខ្លះពួកគេអាចនឹងសម្លាប់មនុស្សផ្ដេសផ្ដាសហើយអះអាងថា វាជាការបង្ក្រាបគ្រឿងញៀនក៏ថាបាន។
ទោះជាយ៉ាងណាក្ដី ប៉ូលិសហ្វីលីពីនដែលជាភ្នាក់ងារបង្ក្រាបគ្រឿងញៀនបានសន្យាស្រាវជ្រាវពីរឿងក្ដីបោះសាកសពចូលឈូងសមុទ្រម៉ានីលនេះ។
« ពួកយើងនឹងមិនបណ្ដោយឲ្យសមាជិកណាមួយរបស់អង្គភាពយើងប្រព្រឹត្តអំពើខុសច្បាប់ឡើយ។ បើវាជាការពិតយើងនឹងចាត់វិធានការភ្លាម។ ម្យ៉ាងវិញទៀត ចាប់តាំងពីថ្ងៃដំបូងនៃការបង្ក្រាបគ្រឿងញៀនមក ពួកយើងបានផ្ដោតលើចំណុចសំខាន់ៗចំនួនបីក្នុងនោះរួមមានឧក្រិដ្ឋកម្ម គ្រឿងញៀន និងអំពើពុករលួយ»។
ដោយឡែកលោក Wilnor Papa ដែលជាមន្ត្រីរបស់អង្គការសិទ្ធិមនុស្សអន្តរជាតិបានបង្ហាញក្តីបារម្ភពាក់ព័នជុំវិញការកើនឡើងនៃចំនួនអ្នកស្លាប់ដោយសារសង្គ្រាមគ្រឿងញៀនផង ហើយបច្ចុប្បន្នបញ្ហាសំខាន់គឺទិន្នន័យពិតប្រាកដនៃអ្នកស្លាប់។
មន្ត្រីសិទ្ធិមនុស្សខាងលើបានអធិប្បាយថា កាលពីមុនខែកុម្ភៈឆ្នាំ២០១៧ របាយការណ៍ប៉ូលិសហ្វីលីពីនពិតបង្ហាញថា វាមានចំនួនមនុស្សស្លាប់ច្រើនមែន។ ប៉ុន្តែក្រុមប៉ូលិសហ្វីលីពីន ព្យាយាមបន្ថយចំនួនអ្នកស្លាប់នៅខែមេសា និងឧសភាជាបន្តបន្ទាប់ ដែលវាធ្វើឲ្យអង្គការសិទ្ធិមនុស្សអន្តរជាតិសង្ស័យបំផុត។
គួរបញ្ជាក់ដែរថា កន្លងមកប៉ូលិសបានរាយការណ៍ថាមនុស្សប្រហែល៣២០០នាក់ត្រូវបានសម្លាប់ ដោយប៉ូលិសក្នុងប្រតិបត្តិការបង្ក្រាបគ្រឿងញៀនកន្លងមក ប៉ុន្តែខាងស្ថាប័នសិទ្ធិមនុស្សបានអះអាងថា មនុស្សមិនតិចជាង ៧០០០នាក់ទេដែលត្រូវបានគេសម្លាប់ក្រៅរង្វង់ច្បាប់និងគ្មានហេតុផលត្រឹមត្រូវ៕
Tag:
Manuel
ហ្វីលីពីន
សង្គ្រាមគ្រឿងញៀន
រ៉ូឌ្រីហ្គោ ឌូទើតេ
© រក្សាសិទ្ធិដោយ thmeythmey.com