កីឡាអន្តរជាតិ
អន្តរជាតិ
ស៊ីហ្គេម៖ «ឆ្កែសិង្ហបុរី» ដែលក្រុមអ្នកគាំទ្រម៉ាឡេស៊ីស្រែក គឺផ្ទុយពីស្មារតីកីឡា រូបភាពពី AFP
× អ្នករៀបចំការប្រកួតកីឡាស៊ីហ្គេម បានជំរុញអ្នកគាំទ្រប្រព្រឹត្តទង្វើឲ្យបានសមរម្យ បន្ទាប់ពីក្រុមអ្នកគាំទ្រក្រុមបាល់ទាត់ម៉ាឡេស៊ីបានបញ្ចេញកំហឹងដោយស្រែកថា «ឆ្កែសិង្ហបុរី» "Singapore dogs" ក្នុងអំឡុងពេលប្រកួតបាល់ទាត់រវាងម៉ាឡេស៊ីជាមួយសិង្ហបុរី។ នេះបើតាមការផ្សាយរបស់ទីភ្នាក់ងារព័ត៌មាន AFP។
គណៈកម្មាធិការរៀបចំព្រឹត្តិការណ៍កីឡាប្រចាំតំបន់អាស៊ាន (Sea Games) លើកទី ២៩ បានហៅទង្វើរបស់ក្រុមអ្នកគាំទ្ររបស់ម៉ាឡេស៊ីនេះថាជាអំពើខុសឆ្គងដ៏ធ្ងន់ធ្ងរ និងជាការសោកស្តាយយ៉ាងខ្លាំងដែលវាផ្ទុយនឹងស្មារតីនៃកីឡា។
«ទង្វើទាំងឡាយណាដែលផ្ទុយនឹងស្មារតីនៃការរួបរួមគ្នា និងសាមគ្គីភាពជាពិសេសការប្រមាថដល់ប្រទេសដែលចូលរួមដ៏ទៃទៀតនោះគឺជាការសោកស្តាយយ៉ាងខ្លាំង»។ នេះសម្តីរបស់គណៈកម្មាធិការដែលបានសរសេរនៅក្នុងសេចក្តីថ្លែងការណ៍មួយ និងបន្ថែមថា៖«អ្នកគាំទ្រទាំងអស់ត្រូវតែបញ្ឈប់ជាដាច់ខាតសម្តែងនូវទង្វើប្រមាថសាសនា ឬពូជសាសន៍នៅគ្រប់ពេលវេលា និងគ្រប់ទីកន្លែងទាំងអស់»។
ការស្រែកប្រមាថពីសំណាក់ក្រុមអ្នកគាំទ្រខាងលើត្រូវបានថតសំឡេងទុក កាលពីការប្រកួតវិញ្ញាសាបាល់ទាត់បុរសក្នុងព្រឹត្តិការណ៍ស៊ីហ្គេមដែលក្រុមម៉ាឡេស៊ីយកឈ្នះសិង្ហបុរី ២-១ ក្នុង Group A នាកីឡដ្ឋាន Shah Alam កាលពីថ្ងៃទី ១៦ ខែសីហា។
ក្រុមអ្នកគាំទ្រម៉ាឡេស៊ីក៏ធ្លាប់ត្រូវបានគេរិះគន់ម្តងរួចមកហើយពីបទប្រើពាក្យប្រមាថដូចនេះកាលពីឆ្នាំ ២០១២ ក្នុងការប្រកួតពាន Suzuki Cup ទៅលើក្រុមរបស់សិង្ហបុរីដូចគ្នា។
កាលនោះក៏មានការបង្ហោះសារលើបណ្តាញសង្គមហ្វេសប៊ុកផ្ញើទៅកាន់អ្នកគាំទ្រម៉ាឡេស៊ីវិញដែរថា «យើងសិង្ហបុរីគ្រាន់តែចាញ់ការប្រកួតប៉ុណ្ណោះ ប៉ុន្តែពួកគេបាត់បង់សីលធម៌ និងវិញ្ញាណក្នុងស្មារតីកីឡា»៕
Tag:
បាល់ទាត់
Sea Games 2017
ម៉ាឡេស៊ី
សិង្ហបុរី
© រក្សាសិទ្ធិដោយ thmeythmey.com