អន្តរជាតិ
ទូតហ្វីលីពីនថ្មីប្រចាំអាមេរិកបញ្ជាក់ថា លោក ត្រាំ នឹងមកហ្វីលីពីនចូលរួមប្រជុំអាស៊ាន ប្រធានាធិបតីហ្វីលីពីន ឌូទើតេ និងឯកអគ្គរដ្ឋទូតហ្វីលីពីនថ្មីប្រចាំអាមេរិកលោក Romualdez (រូបភាព៖ Philippine Star)
× បេសកជនហ្វីលីពីនថ្មីប្រចាំសហរដ្ឋអាមេរិកដែលទើបត្រូវរដ្ឋបាលលោក រ៉ូឌ្រីហ្គោ ឌូទើតេ តែងតាំងបានបញ្ជាក់ថា ប្រធានាធិបតីអាមេរិកលោក ដូណាល់ ត្រាំ នឹងអញ្ជើញមកទស្សកិច្ចហ្វីលីពីន និងចូលរួមកិច្ចប្រជុំពាក់ព័ន្ធក្រោមក្របខណ្ឌអាស៊ាននៅខែវិច្ឆិកាខាងមុខ។
លោក Jose Manuel Romualdez ដែលត្រូវបានរដ្ឋាភិបាលហ្វីលីពីនតែងតាំងជាឯកអគ្គរដ្ឋទូតថ្មីរបស់ហ្វីលីពីនប្រចាំសហរដ្ឋអាមេរិកថ្ងៃពុធទី ២៣ ខែសីហា បានអះអាងថា ប្រធានាធិបតី ដូណាល់ ត្រាំ នឹងបំពេញទស្សនកិច្ចនៅហ្វីលីពីននៅសប្តាហ៍ទីពីរនាវិច្ឆិកាខាងមុខ។
យោងតាមសារព័ត៌មានហ្វីលីពីន Inquirer បេសកជនការទូតខាងលើបានបញ្ជាក់បែបនេះក្នុង ពេលដែលលោកផ្តល់សុន្ទរកថាទៅកាន់គណៈកម្មាធិការសភាក្រោយទទួលការតែងតាំងជាផ្លូវការនោះ។ លោកបានលើកឡើងដូច្នេះ៖« ខ្ញុំត្រូវបានស្ថានទូតហ្វីលីពីនប្រចាំសហរដ្ឋអាមេរិក និងស្ថានទូតអាមេរិកប្រចាំហ្វីលីពីនប្រាប់ថា ប្រធានាធិបតី ត្រាំ គ្រោងនឹងមកទីនេះនៅសប្តាហ៍ទី ២ នៅខែវិច្ឆិកាដើម្បីចូលរួមកិច្ចប្រជុំអាស៊ាន»។
កាលពីខែមេសាកន្លងទៅ អនុប្រធានាធិបតីអាមេរិកលោក Mike Pence បានបញ្ជាក់ម្តងហើយពីដំណើរទស្សនកិច្ចរបស់ប្រធានាធិបតី ត្រាំ មកកាន់តំបន់អាស៊ីអាគ្នេយ៍ជាពិសេសមកកាន់ហ្វីលីពីនដើម្បីចូលរួមកិច្ចប្រជុំសំខាន់ៗជាច្រើន។ បើគ្មានអ្វីប្រែប្រួល ដើមខែវិច្ឆិកាលោក ត្រាំ ត្រូវចូលរួមប្រជុំកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅវៀតណាម មុនបន្តដំណើរមកចូលរួមកិច្ចប្រជុំកំពូលអាស៊ាន អាមេរិក និងកិច្ចប្រជុំកំពូលអាស៊ីបូព៌ានៅហ្វីលីពីនទៀតផងដែរ។
ក្រៅពីលើកឡើងពីទស្សនកិច្ចរបស់លោក ត្រាំ មកហ្វីលីពីន ឯកអគ្គរដ្ឋទូតថ្មីរបស់ហ្វីលីពីន ក៏បានលើកឡើងផងដែរពីបញ្ហាជនអន្តោប្រវេសន៍ហ្វីលីពីនដែលកំពុងរស់នៅដោយខុសច្បាប់នៅសហរដ្ឋអាមេរិកផងដែរ។ លោកបានបញ្ជាក់ប្រាប់សភាថា ក្នុងនាមជាតំណាងហ្វីលីពីនប្រចាំសហរដ្ឋអាមេរិក លោកព្យាយាមផ្តល់ជំនួយនិងជួយសម្រួលដល់ប្រជាជនហ្វីលីពីនទាំងនោះ។
កន្លងមកមានការបារម្ភផងដែរពាក់ព័ន្ធការបណ្តេញប្រជាជនហ្វីលីពីនចេញពីអាមេរិកដោយសារពួកគេរស់នៅខុសច្បាប់ ព្រោះប្រជាជនហ្វីលីពីនប្រហែល បីសែននាក់ឯណោះដែលកំពុងរស់នៅសហរដ្ឋអាមេរិក។
លោក Romualdez បានថ្លែងដូច្នេះ៖« មកដល់ឥឡូវនេះវាមិនមានការបណ្តេញជនអន្តោប្រវេសន៍ខុសច្បាប់ឡើយនៅក្នុងអាណត្តិលោក ត្រាំ។ ប៉ុន្តែខ្ញុំគិតថា ក្នុងនាមជាឯកអគ្គរដ្ឋទូតប្រចាំអាមេរិក ខ្ញុំនឹងប្រឹងប្រែងឲ្យអស់ពីសមត្ថភាពដើម្បីជួយប្រជាជនហ្វីលីពីន បើមានស្ថានភាពដូច្នោះកើតឡើងមែន»៕
Tag:
អាមេរិក
ដូណាល់ ត្រាំ
ហ្វីលីពីន
Jose Manuel Romualdez
© រក្សាសិទ្ធិដោយ thmeythmey.com