មេបញ្ជាការកងនាវាទី៧របស់អាមេរិកអស់តំណែង ក្រោយនាវាចម្បាំងខ្លួនជួបឧបទ្ទវហេតុបន្តបន្ទាប់

អន្តរជាតិ

មេបញ្ជាការកងនាវាទី៧របស់អាមេរិកអស់តំណែង ក្រោយនាវាចម្បាំងខ្លួនជួបឧបទ្ទវហេតុបន្តបន្ទាប់

23, Aug 2017 , 10:39 pm

រូបភាព

ឧត្តមសេនីយ៍ឯក Joseph Aucoin (រូបភាព៖ The Guardian)

ដោយ: សៅ ផលនិស្ស័យ (Sao Phal Niseiy)

ឧបទ្ទវហេតុរបស់នាវាចម្បាំងអាមេរិកជាបន្តបន្ទាប់នៅក្នុងមហាសមុទ្រប៉ាស៊ីហ្វិកជាបន្តបន្ទាប់ បានជំរុញឲ្យមានការបញ្ចប់មុខតំណែងមេបញ្ជាការកងនាវាអាមេរិកទី ៧ ដែលមានមូលដ្ឋាននៅជប៉ុនផងដែរ។ មិនត្រឹមតែប៉ុណ្ណោះ ចិនក៏បានចេញអត្ថបទវិចារណកថាមួយចម្អកឲ្យកងទ័ពជើងទឹកអាមេរិកថា អាមេរិកមិនមែនបញ្ជូននាវាចម្បាំងទំនើបៗរបស់ខ្លួនទៅរក្សាសេរីភាពនាវាចរណ៍ឡើយ តែទៅបង្កើតបញ្ហានៅក្នុងសមុទ្រប៉ុណ្ណោះ។

ករណីបុកគ្នារវាងនាវាចម្បាំង USS John McCain និងនាវាដឹកទំនិញនៅក្នុងដែនសមុទ្រសិង្ហបុរីកាលពីថ្មីៗនេះបានបង្កឲ្យមានរឿងចម្រូងចម្រាសជាច្រើន។ ការស៊ើបអង្កេតពាក់ព័ន្ធនឹងឧបទ្ទវហេតុនេះត្រូវបានគេរៀបចំឡើងដើម្បីរកមូលហេតុពិតប្រាកដដែលបណ្តាលឲ្យករណីនេះកើតឡើងដែរ។ យ៉ាងណាក៏ដោយ កងទ័ពដប់នាក់ដែលបម្រើការងារនៅលើនាវាដែលបានបាត់ខ្លួនក្រោយប៉ះទង្គិចគ្នានោះមិនទាន់ត្រូវបានគេរកឃើញអស់នៅឡើយទេ។ កងទ័ពជើងទឹកអាមេរិក បន្តសហការជាមួយកងទ័ពជើងទឹកម៉ាឡេស៊ី និងសិង្ហបុរីស្វែងរកកងទ័ពដែលបាត់ខ្លួននេះដែរ។ ក្រៅពីមានការស៊ើបអង្កេតពេញលេញ កងទ័ពជើងទឹកអាមេរិកក៏បានដាក់បញ្ជាឲ្យផ្អាកប្រតិបត្តិការកងនាវាបណ្តោះអាសន្នរហូតដល់ថ្ងៃចន្ទសប្តាហ៍ក្រោយ។

១.មេបញ្ជាការកងនាវាទី៧ ត្រូវគេដកហូតតំណែង ក្រោយបញ្ហាកើតឡើងញឹកញាប់

យ៉ាងណាមិញឧបទ្ទវហេតុថ្មីៗនេះ បានធ្វើឲ្យមានការផ្លាស់ប្តូរតំណែងមន្ត្រីជាន់ខ្ពស់ដែលទទួលបន្ទុកប្រតិបត្តិការកងនាវាអាមេរិកនៅអាស៊ីដែរ។
ទីភ្នាក់ងារព័ត៌មាន Reuters បានស្រង់សម្តីមន្ត្រីម្នាក់ដែលមិនបានបង្ហាញអត្តសញ្ញាណថា ឧត្តមសេនីយ៍ឯក Joseph Aucoin ត្រូវបានគេដកហូតតំណែងជាមេបញ្ជាការកងនាវាទី ៧ របស់អាមេរិកដែលមានមូលដ្ឋាននៅ Yokosuka ប្រទេសជប៉ុន។

តាមពិតទៅ ឧបទ្ទវហេតុនេះមិនមែនជាលើកទីមួយឡើយ តែវាជាឧបទ្ទវហេតុលើកទីបួនហើយគិតត្រឹមឆ្នាំ ២០១៧នេះ។ អ្វីដែលសំខាន់ នាវាចម្បាំងដែលមានបញ្ហាសុទ្ធតែជានាវាស្ថិតនៅក្នុងកងនាវាទី៧ ទាំងអស់។ កាលពីមិថុនានាវាចម្បាំងអាមេរិកមួយគ្រឿងឈ្មោះ USS Fitzgerald បានប៉ះទង្គិចជាមួយនាវាដឹកទំនិញរបស់ហ្វីលីពីនដែរក្បែរប្រទេសជប៉ុន ដែលកាលនោះវាបានបង្កឲ្យកងទ័ពបម្រើការលើនាវាប្រាំពីរនាក់ស្លាប់។

យ៉ាងណាមិញ កងទ័ពជើងទឹកអាមេរិកបដិសេធផ្តល់ការអត្ថាធិប្បាយពាក់ព័ន្ធការបញ្ចប់តំណែងឧត្តមសេនីយ៍ឯក Aucoin នេះ។

២. ចិនចម្អកឲ្យអាមេរិក៖ មិនប្រាកដថា អាមេរិកមកបង្កើតបញ្ហា ឬមករក្សាសេរីភាពនាវាចរណ៍

ឧបទ្ទវហេតុកើតឡើងជាបន្តបន្ទាប់ បង្កើតបានជាលេសសម្រាប់រដ្ឋាភិបាលចិនឌឺដងផ្លែផ្កាកងទ័ពអាមេរិកផងដែរ។ ប៉ុន្មានថ្ងៃក្រោយនាវា USS John McCain បុកជាមួយនាវាដឹកទំនិញ សារព័ត៌មានរដ្ឋចិន China Daily ចេញបទវិចារណកថាមួយ ក្រោមចំណងជើងជាភាសាអង់គ្លេសថា «US destroyer crash raises concerns on maritime safety in S. China Sea» ចម្អកឲ្យកងទ័ពជើងទឹកអាមេរិកចំៗឥតមានសំចៃមាត់សោះ។ អត្ថបទកាសែតនោះលើកជាសំណួរថា អាមេរិកបញ្ជូននាវាមកជួយរក្សាសន្តិសុខ ការពារសេរីភាពនាវាចរណ៍ ឬក៏មកបង្កគ្រោះថ្នាក់ដល់គេដល់ឯង។

«ការស៊ើបអង្កេតពាក់ព័ន្ធឧបទ្ទវហេតុចុងក្រោយនេះនឹងរកឃើញការសន្និដ្ឋានចុងក្រោយមួយ ប៉ុន្តែវាមិនអាចប្រកែកបានឡើយដែលថា ការបង្កើនសកម្មភាពនាវាចរណ៍របស់នាវាចម្បាំងអាមេរិកនៅក្នុងតំបន់អាស៊ីប៉ាស៊ីហ្វិកចាប់ពីអាមេរិកអនុវត្តនយោបាយស្តារឥទ្ធិពលរបស់ខ្លួនឡើងវិញ កំពុងបង្កើនគ្រោះថ្នាក់ដល់ការធ្វើចរាចរណ៍របស់នាវាពាណិជ្ជកម្មតាមផ្លូវទឹកផង»។ អត្ថបទវិចារណកថានោះបានបញ្ជាក់ដូច្នេះ។

គួរបញ្ជាក់ផងដែរថា ក្រោមគោលនយោបាយបង្កើនឥទ្ធិពលអាមេរិកឡើងវិញនៅអាស៊ីដែលដាក់ចេញដោយរដ្ឋបាលលោក បារ៉ាក់ អូបាម៉ា អាមេរិកមានគោលដៅចល័តកងទ័ពរបស់ខ្លួនទាំងកងទ័ពជើងគោក ជើងទឹក និងជើងអាកាសយ៉ាងហោចណាស់៥០ភាគរយមកកាន់តំបន់អាស៊ីប៉ាស៊ីហ្វិក។ កងទ័ពជើងទឹកជាពិសេសកងនាវាត្រូវបានអាមេរិកបញ្ជូនមកផ្លាស់វេនគ្នាដើម្បីរក្សាសេរីភាពនាវាចរណ៍ និងសេរីភាពនៃការហោះហើរនៅដែនសមុទ្រប៉ាស៊ីហ្វិកជាពិសេសក្បែរតំបន់ជម្លោះសមុទ្រចិនខាងត្បូងផង។ សកម្មភាពនេះធ្វើឲ្យមហាយក្សចិនខឹងសម្បារមិនតិចទេ ហើយចិនបន្តទិតៀនអាមេរិកជាញឹកញាប់ថែមទៀតផង ហើយអ្វីដែលសំខាន់ចិនមិនបានបញ្ឈប់សកម្មភាពវាតទី និងសាងសង់កោះសិប្បនិម្មិតរួមទាំងយោធូបនីយកម្មនៅក្នុងតំបន់ជម្លោះសមុទ្រចិនខាងត្បូងឡើយ។

អត្ថបទដដែលនោះបានបន្តថា គេអាចពិចារណាបានថាតើអ្នកណាឲ្យពិតប្រាកដែលគួរបន្ទោសពាក់ព័ន្ធការធ្វើយោធូបនីយកម្ម និងបង្កគ្រោះថ្នាក់ដល់គេឯងនៅក្នុងតំបន់នោះ។

«ខណៈដែលកងទ័ពជើងទឹកអាមេរិកក្លាយជាឧបសគ្គដ៏គ្រោះថ្នាក់នៅក្នុងដែនទឹកក្នុងតំបន់អាស៊ី ចិនកំពុងតែបង្កើនកិច្ចសហប្រតិបត្តិការជាមួយសមាជិកអាស៊ានដើម្បីបង្កើតក្រមប្រតិបត្តិនៃគូភាគីនៅសមុទ្រចិនខាងត្បូង និងបង្កើនការរក្សាសុវត្ថិភាពនាវាចរណ៍ដោយសាងសង់បន្ទាយបំពាក់ភ្លើងចំនួនប្រាំលើកោះរបស់ខ្លួនកន្លងមក»។ នេះជាការបញ្ជាក់បន្ថែមរបស់កាសែត China Daily៕