អន្តរជាតិ
ដូណាល់ ត្រាំ សរសើរ គីម ជុងអ៊ុន ដែលចាប់ផ្តើមចេះគោរពអាមេរិក
× ប្រធានាធិបតីអាមេរិក ដូណាល់ ត្រាំ និយាយថា មេដឹកនាំកំពូលកូរ៉េខាងជើង គីម ជុងអ៊ុន ចាប់ផ្ដើមគោរពអាមេរិកហើយ បើទោះជាលោក គីម ជុងអ៊ុន ទើបបានចេញបញ្ជាឲ្យបង្កើនការផលិតមីស៊ីលរំលងទ្វីបក្ដី។ លោក ត្រាំ ហាក់បន្ថយសំឡេងបន្តិច ក្រោយពីបានគំរាមកូរ៉េខាងជើងខ្លាំងៗនាពេលកន្លងមក និងស្របពេលកូរ៉េខាងជើងក៏ពន្យារពេលអនុវត្តគម្រោងបាញ់មីស៊ីលដាក់កោះហ្គាម និងរង់ចាំសង្កេតទង្វើអាមេរិកសិន។
សង្គ្រាមពាក្យសម្ដីគំរាមគ្នារវាងអាមេរិក និងកូរ៉េខាងជើង បានថយកម្ដៅបន្តិចវិញ និងមិនខ្លាំងក្លាដូចពេលកូរ៉េខាងជើងប្រកាសផែនការបាញ់មីស៊ីលដាក់ហ្គាមឡើយ។ ខុសពីលើកមុនៗដែលធ្លាប់ប្រើពាក្យធ្ងន់ ប្រធានាធិបតី ដូណាល់ ត្រាំ នៅថ្ងៃទី២៣ ខែសីហា បែរជានិយាយថា មេដឹកនាំកូរ៉េខាងជើងហាក់បានបន្ទន់ឥរិយាបថដាក់អាមេរិក ហើយពាក្យគំរាមខ្លាំងរបស់លោកក៏កំពុងផ្ដល់ជាផ្លែផ្កាត្រឡប់វិញផងដែរ។
ថ្លែងទៅកាន់ការជួបជុំមួយនៅរដ្ឋ Virginia ប្រធានាធិបតីអាមេរិកបានរំឭកពីពាក្យសម្ដីគំរាមរបស់លោកដាក់កូរ៉េខាងជើង និងការហុចផលត្រឡប់វិញ។ លោក ត្រាំ បញ្ជាក់ថា៖ «អ្នកខ្លះគិតថាពាក្យគំរាមទាំងនោះខ្លាំងជ្រុល។ ប៉ុន្តែវាមិនទាន់ខ្លាំងគ្រប់គ្រាន់ទេ។ សម្រាប់លោក គីម ជុងអ៊ុន វិញ ខ្ញុំជឿថាគាត់កំពុងគោរពយើង ហើយខ្ញុំក៏គោរពគាត់លើបញ្ហានេះវិញដែរ»។ នេះបើយោងតាមការផ្សាយរបស់ទីភ្នាក់ងារព័ត៌មាន AFP ។
ការលើកឡើងរបស់លោក ត្រាំ មានអត្ថន័យស្របគ្នានឹងសម្ដីរបស់រដ្ឋមន្ត្រីការបរទេស រិច ធីល័រសិន ដែលបានអះអាងថា ក្រុងព្យុងយ៉ាង មិនបានបង្កបញ្ហាទៀតឡើយ ចាប់តាំងពីរងទណ្ឌកម្មរបស់ក្រុមប្រឹក្សាសន្តិសុខកាលពីពេលថ្មីនេះ។ ក្នុងសន្និសីទកាសែតកម្រមួយលោក ធីល័រសិន បានបង្ហាញក្ដីរីករាយដែលកូរ៉េខាងជើងមិនបានធ្វើទង្វើព្រហើនអ្វី ហើយលោកមិនដែលឃើញកូរ៉េខាងជើងចេះអត់ធ្មត់ដូចនេះទេ។ លោកក៏ព្រលយពីលទ្ធភាពដែលការចរចាអាចកើតឡើងពេលខាងមុខផងដែរ។
អ្វីគួរឲ្យកត់សម្គាល់នោះ ខណៈដែលលោក ត្រាំ ថាកូរ៉េខាងជើងចេះគោរពអាមេរិកនោះ លោក គីម ជុងអ៊ុន បែរជាចេញបញ្ជាឲ្យបង្កើនការផលិតមីស៊ីលរំលងទ្វីប ICBM ទៅវិញ។ ក្នុងដំណើរទៅកាន់សាលាបណ្ឌិត្យសម្ភារគីមី ដែលទទួលបន្ទុកការងារអភិវឌ្ឍមីស៊ីល មេដឹកនាំកូរ៉េខាងជើងចេញបញ្ជាឲ្យបង្កើនផលិតកម្មម៉ាស៊ីនបាញ់រ៉ុក្កែត និងមីស៊ីលឲ្យបានច្រើនថែមទៀត ដើម្បីទុកការពារខ្លួនពីការគំរាមរបស់អាមេរិក។
យ៉ាងណាក្ដី គេមិនរំពឹងថា ស្ថានការណ៍នៅឧបទ្វីបកូរ៉េនឹងប្រសើរឡើងដោយសារចំណុចនេះទេ។ មន្ត្រីអាមេរិកនិយាយថា រដ្ឋបាលលោក ត្រាំ នឹងមិនបោះបង់ជំហររបស់ខ្លួនក្នុងការអូសទាញឲ្យបោះបង់មហិច្ឆតានុយក្លេអ៊ែរ និងងាកចូលតុចរចាវិញ។ អាមេរិកក៏នៅតែរឹតបន្តឹងការដាក់ទណ្ឌកម្មរបស់ខ្លួនដដែល ដើម្បីបញ្ឈប់ការគំរាមកំហែងនុយក្លេអ៊ែររបស់កូរ៉េខាងជើងលើខ្លួនផងដែរ៕
Tag:
អាមេរិក
កូរ៉េខាងជើង
ដូណាល់ ត្រាំ
កូរ៉េខាងជើង
ណុយក្លេអ៊ែរ
© រក្សាសិទ្ធិដោយ thmeythmey.com