អន្តរជាតិ
ប្រមុខការពារជាតិអាមេរិកចោទរុស្ស៊ីថា ព្យាយាមគូសព្រំដែនអន្តរជាតិដោយប្រើកម្លាំងទ័ព រដ្ឋមន្រ្តីការពារជាតិអាមេរិក James Mattis ចាប់ដៃប្រធានាធិបតីអ៊ុយក្រែន Pedro Poroshenko (រូបភាពពីក្រសួងការពារជាតិអាមេរិក)
× រដ្ឋមន្ត្រីការពារជាតិអាមេរិក ជេម ម៉ាធីស (James Mattis) នៅថ្ងៃទី២៤ ខែសីហា បានចោទរុស្ស៊ីចំៗថា ព្យាយាមគូសព្រំដែនអន្តរជាតិឡើងវិញដោយប្រើប្រាស់កម្លាំងទ័ព និងបានបំពានកិច្ចព្រមព្រៀងសន្តិភាពទីក្រុង Minsk ទៀតផង។ លោក ម៉ាធីស ក៏បានប្រកាសជំហររបស់អាមេរិកក្នុងការបន្តដាក់សម្ពាធលើរុស្ស៊ី ហើយបង្ហាញបំណងផ្ទាល់ខ្លួនរបស់លោកក្នុងការផ្ដល់ជំនួយអាវុធបន្ថែមទៅឲ្យអ៊ុយក្រែនដើម្បីទប់ទល់សកម្មភាពរបស់រុស្ស៊ី។
ក្នុងដំណើរទស្សនកិច្ចនៅអ៊ុយក្រែន ប្រមុខការពារជាតិអាមេរិក ជេម ម៉ាធីស បានប្រកាសគាំទ្រអ៊ុយក្រែនក្នុងការពង្រឹងសមត្ថភាពដើម្បីទប់ទល់ការគំរាមកំហែងរបស់រុស្ស៊ី។ លោក ម៉ាធីស ក៏ប្រកាសដែរថា ទណ្ឌកម្មលើរុស្ស៊ីនៅតែបន្តអនុវត្តរហូតដល់រុស្ស៊ីឈប់គាំទ្រក្រុមឧទ្ទាមភាគកើតអ៊ុយក្រែន ក៏ដូចជាប្រគល់ដែនដីគ្រីមៀឲ្យអ៊ុយក្រែនវិញផងដែរ ខណៈដែលរដ្ឋបាលប្រធានាធិបតី ដូណាល់ ត្រាំ ទើបដាក់ទណ្ឌកម្មថ្មីទៀតលើរុស្ស៊ីនៅពេលថ្មីៗនេះ។
ប្រមុខការពារជាតិប្រកាសដូចនេះនៅចំពោះមុខប្រធានាធិបតីអ៊ុយក្រែន Petro Poroshenko ។ ក្នុងសន្និសីទកាសែតរួមគ្នាក្នុងទីក្រុងគៀវ លោក ម៉ាធីស ក៏ឆ្លៀតចោទរុស្ស៊ីថាកែប្រែបន្ទាត់ព្រំដែនឡើងវិញតាមរយៈការប្រើប្រាស់យោធា ហើយថា ជំនួយយោធារបស់អាមេរិកថ្មីៗនេះ នឹងជួយពង្រឹងសមត្ថភាពរបស់កងទ័ពអ៊ុយក្រែន។ បើតាមទីភ្នាក់ងារព័ត៌មាន AFP រដ្ឋមន្ត្រីការពារជាតិអាមេរិកនិយាយថា អាមេរិកនៅតែបន្តប្ដេជ្ញាចិត្តក្នុងការជួយកសាងកម្លាំងទ័ពអ៊ុយក្រែនឲ្យបានរឹងមាំ។
លោក ម៉ាធីស ក៏បានរំឭកប្រាប់ប្រធានាធិបតីអ៊ុយក្រែនពីការយល់ព្រមរបស់អាមេរិកក្នុងការបញ្ជូនសព្វាវុធបន្ថែមទៅឲ្យអ៊ុយក្រែនដែលមានតម្លៃ១៧៥លានដុល្លារ ហើយលោករំពឺងថាសម្ភារទាំងនេះនឹងជួយពង្រឹងកម្លាំងទ័ពអ៊ុយក្រែនមិនខាន។ ជាមួយជំនួយលើកក្រោយនេះ ជំនួយយោធារបស់អាមេរិកឲ្យអ៊ុយក្រែនមានតម្លៃដល់ទៅ៧៥០លានដុល្លារចាប់តាំងពីឆ្នាំ២០១៥ ។ យ៉ាងណាជំនួយទាំងអស់នេះ មិនមែនជាសម្ភារធ្វើសង្គ្រាមទេ។
ទស្សនកិច្ចរបស់លោក ម៉ាធីស ធ្វើឡើងចំថ្ងៃឯករាជ្យរបស់អ៊ុយក្រែន ហើយអាមេរិកក៏បញ្ជូនកងទ័ពរបស់ខ្លួនមកចូលក្បួនយោធាផងដែរ។ ប្រធានាធិបតីអ៊ុយក្រែន Poroshenko បានអរគុណអាមេរិកដែលជួយអ៊ុយក្រែនតាំងពីរុស្ស៊ីឈ្លានពានភ្លាម។ លោក Poroshenko បញ្ជាក់ថា អ៊ុយក្រែននិងអាមេរិកសម្រេចចិត្តរឹតបន្តឹងកិច្ចសហប្រតិបត្តិការឲ្យស៊ីជម្រៅថែមទៀត។
១. អាមេរិកកំពុងពិនិត្យលទ្ធភាពបញ្ជូនសព្វាវុធប្រយុទ្ធឲ្យអ៊ុយក្រែន
រដ្ឋមន្ត្រីការពារជាតិអាមេរិក ម៉ាធីស ក៏បានបង្ហាញជំហរផ្ទាល់ខ្លួនរបស់លោកជុំវិញសំណើរបស់រដ្ឋាភិបាលអ៊ុយក្រែនដែលចង់បានអាវុធសម្រាប់ទុកការពារខ្លួនដូចជាមីស៊ីលប្រឆាំងរថក្រោះ និងប្រព័ន្ធការពារអាកាសជាដើម។ សំណើនេះធ្លាប់ត្រូវបានរដ្ឋបាលអតីតប្រធានាធិបតី បារ៉ាក់ អូបាម៉ា បដិសេធ ព្រោះខ្លាចធ្វើឲ្យរុស្ស៊ីទាស់ចិត្ត និងធ្វើឲ្យស្ថានការណ៍នៅអ៊ុយក្រែនកាន់តែធ្លាក់ចូលក្នុងមិនល្អប្រសើរ។
យ៉ាងណាមិញ លោក ម៉ាធីស មិនយល់ស្របទស្សនៈរបស់រដ្ឋបាលលោក អូបាម៉ា ឡើយ។ លោកសង្កត់ធ្ងន់ថា អាមេរិកកំពុងពិនិត្យមើលសំណើរបស់អ៊ុយក្រែន ហើយពេលត្រឡប់ទៅអាមេរិក លោកនឹងប្រាប់រដ្ឋមន្ត្រីការបរទេស និងប្រធានាធិបតី ដូណាល់ ត្រាំ ថា សំណើរបស់អ៊ុយក្រែនអាចអនុញ្ញាតបាន។ «អាវុធកាពារខ្លួនមិនជាការគំរាមទេ បើអ្នកមិនមែនជាប្រទេសបង្ករឿងនោះ ហើយច្បាស់ណាស់ថា អ៊ុយក្រែនមិនជាប្រទេសរករឿងគេឡើយ»។ នេះជាសម្ដីលោក ម៉ាធីស ។
មន្ត្រីអាមេរិកនិយាយថា ផែនការបញ្ជូនអាវុធសម្រាប់ការពារខ្លួនដែលអ៊ុយក្រែនចង់បាន បានទៅដល់សេតវិមានហើយ គ្រាន់តែមិនទាន់ត្រូវបានចុះហត្ថលេខាប៉ុណ្ណោះ។ ដោយសារតែជាអាវុធការពារ គេជឿថាអ៊ុយក្រែនទំនងជាមិនអាចប្រើប្រាស់សព្វាវុធទាំងនោះក្នុងការដណ្ដើមទឹកដីបានទេ តែអាចត្រឹមតែរក្សាលំនឹងស្ថានភាពប៉ុណ្ណោះ ខណៈដែលក្រុមឧទ្ទាមភាគខាងកើតនៅតែបន្តទំនាក់ទំនងជិតស្និទ្ធរុស្ស៊ីដដែល៕
Tag:
អឺរ៉ុប
អាមេរិក
រុស្ស៊ី
អ៊ុយក្រែន
© រក្សាសិទ្ធិដោយ thmeythmey.com