អន្តរជាតិ
ប៉ាគីស្ថានពន្យារពេលទស្សនកិច្ចមន្ត្រីអាមេរិក ក្រោយ ត្រាំ ថា ប៉ាគីស្ថានជាសម្បុកភេរវជន បាតុករប៉ាគីស្ថាននាំគ្នាប្រឆាំងប្រធានាធិបតីអាមេរិក ដូណាល់ ត្រាំ (រូបភាព៖ Reuters)
× ប៉ាគីស្ថានបានសម្រេចចិត្តផ្អាកកម្មវិធីទស្សនកិច្ចមន្ត្រីការទូតជាន់ខ្ពស់អាមេរិក បន្ទាប់ពីត្រូវបានប្រធានាធិបតី ដូណាល់ ត្រាំ ចោទថាព្យាយាមអូសបន្លាយសង្គ្រាមនៅអាហ្វហ្គានីស្ថាន។ ការចោទប្រកាន់របស់លោក ត្រាំ ធ្វើឲ្យទីក្រុងអ៊ីស្លាម៉ាបាដ មិនសប្បាយចិត្តទេ ខណៈគេក៏សង្កេតឃើញមានការធ្វើបាតុកម្មទ្រង់ទ្រាយតូចនៅទីក្រុងការ៉ាជី ដើម្បីជាការប្រឆាំងសម្ដីប្រធានាធិបតីអាមេរិក។
ទស្សនកិច្ចនៅប៉ាគីស្ថានរបស់លោកស្រី Alice Wells ឧបការីរដ្ឋមន្ត្រីការបរទេសអាមេរិកទទួលបន្ទុកកិច្ចការអាស៊ីខាងត្បូង ត្រូវបានពន្យារពេលសិន។ លោកស្រី Alice Wells គ្រោងចាប់ផ្ដើមទស្សនកិច្ចនៅថ្ងៃទី២៨ ខែសីហា ដែលជាទស្សនកិច្ចថ្នាក់ខ្ពស់របស់មន្ត្រីរដ្ឋបាលប្រធានាធិបតី ដូណាល់ ត្រាំ ក្រោយពេលលោក ត្រាំ ប្រកាសគោលនយោបាយអាហ្វហ្គានីស្ថាននៅថ្ងៃទី២១ ខែសីហា។ លោក ត្រាំ បានរិះគន់ប៉ាគីស្ថានខ្លាំងៗជុំវិញសង្គ្រាមនៅអាហ្វហ្គានីស្ថាន។
អ្នកនាំពាក្យស្ថានទូតអាមេរិកប្រចាំទីក្រុងអ៊ីស្លាម៉ាបាដបានប្រាប់ទីភ្នាក់ងារព័ត៌មាន Reuters នៅថ្ងៃទី២៧ ខែសីហា ថា ទស្សនកិច្ចរបស់លោកស្រី Wells ត្រូវបានពន្យារពេលបណ្ដោះអាសន្នសិនរហូតដល់កាលៈទេសៈសមស្រប តាមសំណើរបស់រដ្ឋាភិបាលប៉ាគីស្ថាន។ ទាំងអាមេរិក ទាំងប៉ាគីស្ថានមិនបានបញ្ជាក់ពីមូលហេតុជាក់លាក់ណាមួយជុំវិញការពន្យារពេលនេះទេ ប៉ុន្តែគម្រោងទស្សនកិច្ចនេះស្ថិតក្នុងកម្រិតប្រុងប្រយ័ត្នខ្ពស់ ចាប់តាំងពីការអធិប្បាយរបស់លោក ត្រាំ មកម្ល៉េះ។
ក្នុងពេលប្រកាសយុទ្ធសាស្ត្រថ្មីលើបញ្ហាអាហ្វហ្គានីស្ថាន ប្រធានាធិបតីអាមេរិកបានចង្អុលប៉ាគីស្ថានចំៗ ដោយទាមទារឲ្យប្រទេសនុយក្លេអ៊ែរនេះប្រឹងប្រែងចូលរួមកម្ចាត់ភេរវជន។ លោក ត្រាំ ចោទរដ្ឋាភិបាលប៉ាគីស្ថានថាបានផ្ដល់ទីជម្រកឲ្យក្រុមភេរវជនដើម្បីធ្វើសង្គ្រាមប្រឆាំងរដ្ឋាភិបាលក្រុងកាប៊ុលទៀតផង។ លោកក៏គំរាមកាត់ជំនួយយោធាផ្តល់ឲ្យអាហ្វហ្គានីស្ថានផង បើសិនជាប្រទេសអាស៊ីខាងត្បូងនេះមិនស្តាប់ការទាមទាររបស់លោកនោះ។
ឆ្លើយតបពាក្យរិះគន់របស់ប្រធានាធិបតីអាមេរិក មន្ត្រីប៉ាគីស្ថានក៏និយាយវិញថាអាមេរិកទៅវិញទេដែលគ្មានសមត្ថភាពបោសសម្អាតឬសគល់ក្រុមភេរវជនដោយខ្លួនឯង។ ក្រុងអ៊ីស្លាម៉ាបាដ ក៏ប្រាប់ក្រុងវ៉ាស៊ីនតោន កុំដើរតែបន្ទោសគេផ្ដេសផ្ដាស ខណៈដែលខ្លួនឯងមិនអាចធ្វើអ្វីក្រុមជ្រុលនិយមបាននោះ។ ដោយឡែក ក្រុងប៉េកាំងឯណោះក៏ឆ្លៀតបង្ហាញការមិនពេញចិត្តនឹងសម្ដីមេដឹកនាំអាមេរិក ហើយថែមទាំងប្រកាសគាំទ្រក្រុងអ៊ីស្លាម៉ាបាដថែមទៀត។
នៅទីក្រុងការ៉ាជីភាគខាងត្បូងប្រទេស បាតុករជាងមួយរយនាក់បានប្រមូលផ្ដុំគ្នាតវ៉ា និងដង្ហែរក្បួនទៅកាន់ស្ថានកុងស៊ុលអាមេរិក ជាការតវ៉ាប្រឆាំងពាក្យសម្ដីប្រធានាធិបតីអាមេរិក។ លោក ត្រាំ ចោទប៉ាគីស្ថានជាឋានសួគ៌របស់ពួកជ្រុលនិយម ព្រោះក្រុមនេះតែងប្រើប្រាស់ទឹកដីប៉ាគីស្ថានជាមូលដ្ឋានវាយប្រហារលើកម្លាំងរដ្ឋាភិបាលអាហ្វហ្គានីស្ថាន និងកម្លាំងចម្រុះដឹកនាំដោយអាមេរិក ខណៈប៉ាគីស្ថានតែងបដិសេធរាល់ការចោទប្រកាន់ទាំងអស់ដែរ៕
Tag:
ប៉ាគីស្ថាន
អាមេរិក
អាហ្វហ្គានីស្ថាន
ភេរវកម្ម
© រក្សាសិទ្ធិដោយ thmeythmey.com