អន្តរជាតិ
រដ្ឋបាល ត្រាំ ស្ទាក់ស្ទើរសំណើម៉ិកស៊ិកដែលចង់ជួយជនរងគ្រោះទឹកជំនន់នៅរដ្ឋតិចសាស់
× រដ្ឋបាលប្រធានាធិបតី ដូណាល់ ត្រាំ មិនទាន់ឆ្លើយតបនឹងសំណើរបស់ម៉ិកស៊ិកដែលចង់ជួយជនរងគ្រោះដោយទឹកជំនន់។ រដ្ឋតិចសាស់ និងរដ្ឋល្វីសាណា បានរងគ្រោះដោយទឹកជំនន់ធ្ងន់ធ្ងរ បន្ទាប់ពីរងការវាយប្រហារដោយខ្យល់ព្យុះ Harvey ដែលបណ្ដាលឲ្យផ្ទះរាប់ពាន់ខ្នងត្រូវលិចលង់ ហើយទីក្រុងហូស្តុនរងគ្រោះជាងគេ។ លោក ត្រាំ និងភរិយាក៏បានទៅដល់រដ្ឋតិចសាស់នៅថ្ងៃទី២៩ ខែសីហា ដើម្បីត្រួតពិនិត្យប្រតិបត្តិការជួយសង្គ្រោះ។
ខណៈដែលព្យុះ Harvey កំពុងបង្កមហន្តរាយនៅរដ្ឋតិចសាស់ រដ្ឋាភិបាលម៉ិកស៊ិកដែលជាអ្នកជិតខាងបានបង្ហាញសាមគ្គីភាពរបស់ខ្លួនចំពោះប្រជាជន និងរដ្ឋាភិបាលអាមេរិក ហើយក៏មានបំណងជួយជនរងគ្រោះផងដែរ។ ម៉ិកស៊ិកនឹងចេញប្រតិបត្តិការជួយភ្លាម បើរដ្ឋបាលប្រធានាធិបតី ដូណាល់ ត្រាំ យល់ព្រមតាមសំណើរបស់ខ្លួន។ ប៉ុន្តែខាងរដ្ឋបាលក្រុងវ៉ាស៊ីនតោនមិនទាន់ឆ្លើយតបនឹងសំណើរបស់ម៉ិកស៊ិកទេ។
រដ្ឋបាលប្រធានាធិបតី ត្រាំ ហាក់នៅស្ទាក់ស្ទើរទទួលយកសំណើរបស់ម៉ិកស៊ិក ដ្បិតលោក ត្រាំ នៅតែប្រកាន់ជំហរដាច់ខាតក្នុងការទាមទារឲ្យម៉ិកស៊ិកបង់ប្រាក់ថ្លៃសាងសង់ជញ្ជាំងតាមបណ្ដោយព្រំដែនដដែល។ នៅដើមសប្ដាហ៍នេះ ប្រធានាធិបតីអាមេរិកបានសរសេរទាមទារនៅលើ Twitter របស់ខ្លួន ហើយក៏ឆ្លៀតវាយប្រហារកិច្ចព្រមព្រៀងពាណិជ្ជកម្មសេរីអាមេរិកខាងជើង ដែលលោកចាត់ទុកជាកិច្ចព្រមព្រៀងពាណិជ្ជកម្មដ៏អាក្រក់បំផុត។
ឆ្លើយតបការលើកឡើងរបស់លោក ត្រាំ ក្រសួងការបរទេសម៉ិកស៊ិកក៏បានចេញសេចក្ដីប្រកាសព័ត៌មានទាត់ចោលការទាមទាររបស់លោក ត្រាំ ។ ប៉ុន្តែសេចក្ដីប្រកាសព័ត៌មានដដែលនេះក៏បានបង្ហាញសមានចិត្ត និងបំណងជួយជនរងគ្រោះដោយសារព្យុះ Harvey ដែលបង្កការខូចខាតនៅរដ្ឋតិចសាស់ និងរដ្ឋល្វីសាណា និងសម្លាប់ជីវិតមនុស្ស១៣នាក់។ ម៉ិកស៊ិកអះអាងថាបំណងរបស់ខ្លួនធ្វើឡើងក្នុងនាមជាអ្នកជិតខាងល្អ ដែលជួយគ្នាគ្រាលំបាក។
យោងតាមសារព័ត៌មាន Independent ខាងអាមេរិកមិនទាន់ឆ្លើយតបទេ ស្របពេលដែលការទទួលសំណើនេះអាចជាការសម្រេចចិត្តដ៏លំបាកសម្រាប់លោក ត្រាំ ។ ប្រសិនបើសម្រេចចិត្តទទួលជំនួយរបស់ម៉ិកស៊ិក លោកអាចរងការរិះគន់ថាបន្ទន់ជំហរដាក់ម៉ិកស៊ិក ដែលលោកផ្ទាល់ទាមទារលុយថ្លៃសាងសង់ជញ្ជាំងព្រំដែនរហូតមក។ ក្នុងករណីមិនទទួលយកសំណើវិញ លោក ត្រាំ នឹងត្រូវចាត់ទុកជាមេដឹកនាំគ្មានមេត្តាទៅវិញដែរ។
តាមពិតទៅនោះ ម៉ិកស៊ិកក៏មិនមែនជាជួយអាមេរិកលើកទីមួយដែរ។ កាលពីឆ្នាំ២០០៥ ពេលព្យុះកំណាច Katrina វាយប្រហារតំបន់ឆ្នេរឈូងសមុទ្រម៉ិកស៊ិក ទាហានម៉ិកស៊ិកក៏បានចេញប្រតិបត្តិការជួយជនរងគ្រោះអាមេរិកដែរដូចជាការដឹកជញ្ជូនស្បៀងអាហារ ការចែកចាយសម្ភារប្រើប្រាស់ចាំបាច់នានា និងការពិនិត្យសុខភាពជាដើមផង។ ប៉ុន្តែលើកនេះ ម៉ិកស៊ិកត្រូវរង់ចាំការសម្រេចចិត្តរបស់រដ្ឋបាល ត្រាំ សិន៕
Tag:
អាមេរិក
ម៉ិកស៊ិក
ដូណាល់ ត្រាំ
© រក្សាសិទ្ធិដោយ thmeythmey.com