អាមេរិកប្តេជ្ញាការពារសម្ព័ន្ធមិត្ត តែការប្រើកម្លាំងបាយប្រឆាំងកូរ៉េខាងជើងមិនអាចកើតមានឡើយ

អន្តរជាតិ

អាមេរិកប្តេជ្ញាការពារសម្ព័ន្ធមិត្ត តែការប្រើកម្លាំងបាយប្រឆាំងកូរ៉េខាងជើងមិនអាចកើតមានឡើយ

30, Aug 2017 , 9:59 pm

រូបភាព

ដោយ: សៅ ផលនិស្ស័យ (Sao Phal Niseiy)

ក្រុមប្រឹក្សាសន្តិសុខនាំគ្នាថ្កោលទោសរបបដឹកនាំក្រុងព្យុងយ៉ាងដែលហ៊ានបំពានដំណោះស្រាយក្រុមប្រឹក្សាសន្តិសុខអង្គការសហប្រជាជាតិ ដោយបន្តបាញ់សាកល្បងមីស៊ីលឥតឈប់។ ក្រុងព្យុងយ៉ាងបានព្រមានបាញ់មីស៊ីលជាបន្តបន្ទាប់ទៀតនៅពេលខាងមុខ ប៉ុន្តែអាមេរិកបានសំឡុតកូរ៉េខាងជើងជាថ្មី ដោយត្រៀមប្រើរាល់មធ្យោបាយទាំងអស់រួមទាំងប្រើកម្លាំងទ័ពផង ដើម្បីតបតបើចាំបាច់។ ចំណែកមហាយក្សចិនបានអំពាវនាវឲ្យភាគីអត់ធ្មត់ តែឆ្លៀតឌឺបញ្ហា្កកើតឡើងនៅពេលបច្ចុប្បន្ន គឺគេគួរបន្ទោសអាមេរិកនិងកូរ៉េខាងត្បូងដែលប្រឹងសម្ញែងសាច់ដុំយោធាដោយបន្តធ្វើសមយុទ្ធនោះ។

កូរ៉េខាងជើងបាញ់សាកល្បងមីស៊ីលរំលងជប៉ុននាថ្ងៃអង្គារម្សិលមិញបង្កឲ្យមានការព្រួយបារម្ភខ្លាំង។ ជប៉ុន និងកូរ៉េខាងត្បូងបានស្នើសុំឲ្យក្រុមប្រឹក្សាសន្តិសុខកោះប្រជុំបន្ទាន់ដើម្បីពិភាក្សាស្វែងរកវិធានការឆ្លើយតបក្រុងព្យុងយ៉ាងផងដែរ។ ចិនដែលសម្ព័ន្ធមិត្តរបស់កូរ៉េខាងជើងនោះបានចេញជាមុខជាថ្មីដើម្បីអំពានាវឲ្យភាគីពាក់ព័ន្ធជាពិសេសអាមេរិក និងកូរ៉េខាងត្បូងអត់ធ្មត់។ ប៉ុន្តែអ្វីដែលសំខាន់ ចិនព្រលយថា ពាក់ព័ន្ធបញ្ហាកើតឡើងបច្ចុប្បន្ន គេគួរបន្ទោសអាមេរិក និងកូរ៉េខាងត្បូងដែរព្រោះភាគីទាំងពីរព្យាយាមបញ្ឆេះកម្តៅដោយធ្វើសមយុទ្ធសម្ញែងសាច់ដុំឥតឈប់។

១. អាមេរិកប្តេជ្ញាការពារសម្ព័ន្ធមិត្តកូរ៉េខាងត្បូង និងជប៉ុន ទប់ទល់កូរ៉េខាងជើង

ក្នុងពេលដែលស្ថានការណ៍កាន់តែអាក្រក់ រដ្ឋបាលអាមេរិកបានប្រកាសប្រាប់គេឯងជាថ្មីថា ខ្លួននឹងការពារសម្ព័ន្ធមិត្តជប៉ុន និងកូរ៉េខាងត្បូងឲ្យបាន ទោះជាក្នុងកាលៈទេសៈណាក៏ដោយ។ អាមេរិកថែមទាំងវាយតម្លៃថាការបាញ់សាកល្បងមីស៊ីលរបស់កូរ៉េខាងជើងកន្លងមកមិនមានគ្រោះថ្នាក់ឬគំរាមកំហែងខ្លួន ឬកោះហ្គាមជាទឹកដីខ្លួននោះឡើយ។
យោងតាមសារព័ត៌មាន South China Morning Post អ្នកនាំពាក្យក្រសួងការពារជាតិអាមេរិក Christopher Logan បានថ្លែងថា៖« គោលជំហរនិងការប្តេជ្ញាធរចិត្តយើងនៅពេលនេះគឺការពារសម្ព័ន្ធមិត្តយើងរួមមានជប៉ុន និងកូរ៉េខាងត្បូង ក្នុងពេលដែលពួកគេរងការគំរាមកំហែង។ យើងនៅតែត្រៀមខ្លួនជានិច្ចដើម្បីការពារខ្លួនយើងផង និងការពារសម្ព័ន្ធមិត្តផងដើម្បីទប់ទល់រាលការវាយប្រហារឬបង្ករឿងនោះ»។

ដោយឡែក កូរ៉េខាងជើងមិនបានបន្ទន់ឥរិយាបថរបស់ខ្លួនឡើយនៅសប្តាហ៍នេះ បន្ទាប់ពីបាញ់ផ្លោងមីស៊ីលឆ្លងកាត់កោះហុកកៃដូរបស់ជប៉ុន។ របបដឹកនាំក្រុងព្យុងយ៉ាងស្រាប់តែចេញមុខជាថ្មីព្រមានបាញ់សាកល្បងមីស៊ីលជាថ្មីបន្ថែមទៀតនៅពេលខាងមុខនេះ ដើម្បីឆ្លើយតបក្រុមប្រឹក្សាសន្តិសុខដែលថ្កោលទោស និងគំរាមចាត់វិធានការបន្ថែមទៀតដើម្បីដាក់គំនាបលើខ្លួននោះ។ គេមិនដឹងថា សកម្មភាពបង្ករឿងថែមទៀតរបស់កូរ៉េខាងជើងនេះនឹងអាចបង្កឲ្យការប្រឈមមុខគ្នា និងការប៉ះទង្គិចគ្នាដោយអាវុធដែរឬអត់ឡើយ។

២.ការប្រើប្រាស់កម្លាំងកម្ចាត់កូរ៉េខាងជើងមិនអាចកើតឡើងពិតមែន?

ក្រៅពីមានកិច្ចប្រជុំក្រុមប្រឹក្សាសន្តិសុខ ប្រធានាធិបតីអាមេរិក ដូណាល់ ត្រាំ បានចេញសេចក្តីថ្លែងការណ៍មួយ ដោយលោកថ្កោលទោស និងគំរាមប្រើប្រាស់វិធានការគ្រប់យ៉ាងដើម្បីដោះស្រាយបញ្ហានេះផង។ ប្រធានាធិបតីរូបនេះក៏និយាយពីការប្រើប្រាស់កម្លាំងឡើយវិញទៀតដែរ។

«សកម្មភាពគំរាមកំហែង និងបង្កអស្ថិរភាពដែលកូរ៉េបង្កើតឡើងត្រឹមតែធ្វើឲ្យខ្លួនឯងកាន់តែឯកោក្នុងតំបន់ និងលើពិភពលោកផង។ ហើយវិធានការគ្រប់យ៉ាងស្ថិតនៅលើតុរួមទាំងការប្រើកម្លាំងទ័ពផង»។ នេះជាការបញ្ជាក់របស់លោក ត្រាំ ក្នុងសេចក្តីថ្លែងការណ៍របស់ខ្លួន។

ចំណែកឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី Nikki Haley បានថ្លែងក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិថា កូរ៉េខាងជើងមិនដែលខ្លាចរអាចំណាត់ការរបស់សហគមន៍អន្តរជាតិឡើយ ហើយលោកស្រីថែមទាំងបានប្រើភាសាធ្ងន់គំរាមកូរ៉េខាងជើងផង។ សម្តីលោកស្រីហាក់ស្របជាមួយការលើកឡើងរបស់លោក ដូណាល់ ត្រាំ ផងដែរជាពិសេសការប្រើប្រាស់វិធានការក្តៅ។

លោកស្រីលើកឡើងដូច្នេះ៖ «គ្រប់គ្រាន់ គឺគ្រប់គ្រាន់ហើយ។ ចំណាត់ការតឹងរ៉ឹងមួយត្រូវដាក់ចេញដើម្បីប្រឆាំងរបបក្រុងព្យុងយ៉ាង។ វាជារឿងមិនអាចទទួលយកបានឡើយ។ គេហ៊ានបំពានរាល់ដំណោះស្រាយក្រុមប្រឹក្សាសន្តិសុខដែលយើងបានដាក់ចេញ។ ដូច្នេះហើយ រឿងធ្ងន់ធ្ងរមួយត្រូវតែកើតឡើង»។

បេសកជនពិសេសអាមេរិកប្រចាំអង្គការសហប្រជាជាតិរូបនេះក៏ឆ្លៀតឱកាសអំពាវនាវឲ្យចិនជាខ្នងបង្អែកកូរ៉េខាងជើង និងរុស្ស៊ីបន្តសហការជាមួយអាមេរិកដើម្បីដោះស្រាយបញ្ហាប្រឈមនេះរួមគ្នា។ ជាពិសេសចិន និងរុស្ស៊ីមានលទ្ធភាពក្នុងការអនុវត្តទណ្ឌកម្មឲ្យបានពេញលេញដើម្បីឲ្យកូរ៉េខាងជើងបន្ទន់ឥរិយាបថខ្លួនចូលចរចាផង។

ក្រៅពីនេះ គេឃើញនាយសេនាធិការចម្រុះកងទ័ពកូរ៉េខាងត្បូង និងអាមេរិកបានជួបពិភាក្សាគ្នាភ្លាមថ្ងៃអង្គារម្សិលមិញដើម្បីរកដំណោះស្រាយសមស្របទប់ទល់បញ្ហាប្រឈមធំ។ ទីភ្នាក់ងារព័ត៌មានកូរ៉េខាងត្បូង Yonhap ផ្សាយថា ឧត្តមសេនីយ៍ Joseph Dunford និងឧត្តមសេនីយ៍ Jeong Kyeong-doo បានឯកភាពគ្នាចំពោះការរៀបចំចំណាត់ការថ្មីឲ្យបានលឿនតាមដែលអាចធ្វើបានក្នុងនោះមានទាំងការប្រើប្រាស់កងទ័ពផងដើម្បីការពារសម្ព័ន្ធមិត្ត និងតបតកូរ៉េខាងជើង។ បន្ថែមពីនេះ ភាគីទាំងពីរក៏បានជជែកពិភាក្សាគ្នាផងដែរពីលទ្ធភាពនៃការពង្រាយសព្វាវុធយុទ្ធសាស្ត្រថ្មីនៅលើទឹកដីកូរ៉េខាងត្បូងដែរ។

ទោះបីវាហាក់ជារដ្ឋបាលលោក ដូណាល់ ត្រាំ គំរាមប្រើប្រាស់គ្រប់វិធានការ និងត្រៀមប្រើកម្លាំងដើម្បីដោះស្រាយបញ្ហាកូរ៉េខាងជើងក៏ដោយ ការប្រើប្រាស់ទ័ពប្រឆាំងកូរ៉េខាងជើងមិនអាចកើតឡើងឡើយ។

គេនៅចាំបានថា លោក Steve Bannon អតីតប្រធានផ្នែកយុទ្ធសាស្ត្ររបស់ប្រធានាធិបតី ត្រាំធ្លាប់អះអាងកន្លងមករួចហើយថា វាជារឿងយឺតពេលទៅហើយដែលគេត្រូវប្រើប្រាស់កម្លាំងវាយប្រហារកូរ៉េខាងជើងមុន ឬឈ្លានពានកូរ៉េខាងជើងនោះ។ កូរ៉េខាងជើងបច្ចុប្បន្នមានក្បាលគ្រាប់ច្រើន ដែលអាចបង្កគ្រោះថ្នាក់ដល់ប្រទេសជុំវិញនិងតំបន់ទាំងមូលបើសិនជាមានការប៉ះទង្គិចគ្នាជាយថាហេតុនោះ។

ក្នុងបទសម្ភាសន៍ចុងក្រោយថ្ងៃ ១៦ខែសីហា មុនអស់តំណែងលោក Bannon បានថ្លែងដូច្នេះ៖«គ្មានដំណោះស្រាយយោធាទេ បំភ្លេចវាចោលទៅ។ ទាល់មានអ្នកណាម្នាក់អាចដោះស្រាយបញ្ហាមួយដែលអាចបង្ហាញឲ្យខ្ញុំឃើញថា ប្រជាជន ដប់លាននាក់នៅក្រុងសេអ៊ូល មិនស្លាប់ក្នុងរយៈពេល៣០នាទីដោយសារការផ្ទុះអាវុធ។ ខ្ញុំមិនដឹងថាគេកំពុងនិយាយពីអ្វីឡើយយ ប៉ុន្តែវាគ្មានឡើយដំណោះស្រាយយោធាពេលនេះ»៕