អន្តរជាតិ
រុស្ស៊ីព្រមានអាមេរិកដែលចង់ពង្រាយអាវុធនុយក្លេអ៊ែរ B61-12 ទៅអឺរ៉ុប
× រដ្ឋាភិបាលរុស្ស៊ីបានព្រមានថា បើអាមេរិកហ៊ានពង្រាយគ្រាប់បែកបរិមាណូទៅកាន់រដ្ឋមួយចំនួនសមាជិកបក្សសម្ព័ន្ធយោធាណាតូ អាមេរិកនឹងរំលោភបំពានសន្ធិសញ្ញាមិនរីកសាយភាយអាវុធនុយក្លេអ៊ែរដែលអាមេរិកខ្លូនឯងជាភាគីផង។ រុស្ស៊ីបារម្ភខ្លាំងព្រោះប្រទេសដូចជាអាល្លឺម៉ង់ តួកគី និងអ៊ីតាលី នឹងមានលទ្ធភាពប្រើប្រាស់អាវុធអាមេរិកនេះដូចគ្នានៅពេលខាងមុខ។
ថ្មីៗនេះ អាមេរិកបានសាកល្បងអាវុធនុយក្លេអ៊ែរ B61-12 របស់ខ្លួនជាថ្មីទៀត ដែលវាបង្ហាញឲ្យឃើញថា អាមេរិកមានបំណងពង្រាយអាវុធប្រភេទនេះទៅកាន់តំបន់អឺរ៉ុបក្បែរៗរុស្ស៊ីផង។ ដោយសារបញ្ហានេះ រុស្ស៊ីបានចេញមុខតវ៉ាប្រឆាំងគម្រោងពង្រាយសព្វាវុធ និងព្រមានអាមេរិកជាមុននៅសប្តាហ៍នេះ។
ទីភ្នាក់ងារព័ត៌មានរុស្ស៊ី TASS ដកស្រង់សម្តីប្រធាននាយកដ្ឋានគ្រប់គ្រងអាវុធនិងហាមឃាត់ការរីកសាយភាយនៃអាវុធនុយក្លេអ៊ែរ Mikhail Ulyanov បានអះអាងដូច្នេះថា៖« គ្រាប់បែកបរមាណូ B61-12 ជាច្រើនប្រភេទត្រូវបានគេកែច្នៃឡើងដើម្បីពង្រាយទៅកាន់ទឹកដីសមាជិកបក្សសម្ព័ន្ធយោធាណាតូមួយចំនួននៅអឺរ៉ុប ហើយវាក៏ត្រូវប្រើប្រាស់សម្រាប់ប្រតិបត្តិការនុយក្លេអ៊ែរដែលមានការចូលរួមពីសមាជិកដែលគ្មានអាវុធនុយក្លេអ៊ែរផងដែរ។
លោក Ulyanov បន្តថា៖« បើតាមការវាយម្លៃជាក់ស្តែង សកម្មភាពអាមេរិកវាដើរផ្ទុយនឹងសន្ធិសញ្ញាហាមឃាត់ការសាយភាយអាវុធនុយក្លេអ៊ែរដែលអាមេរិកខ្លួនឯងជាសមាជិកផងនោះ»។
មន្ត្រីជាន់ខ្ពស់រុស្ស៊ីរូបនេះលើកឡើងដូច្នេះបន្ទាប់ពីភ្នាក់ងារសន្តិសុខនុយក្លេអ៊ែរអាមេរិកប្រកាសថា គេបានសាកល្បងអាវុធទម្លាក់គ្រាប់បែកប្រភេទនេះដោយជោគជ័យជាលើកទីពីរនៅរដ្ឋ Nevada។
តាមពិតទៅ រុស្ស៊ីបារម្ភខ្លាំងដោយសារតែ នៅពេលខាងមុខ វាមិនមែនតែអាមេរិកម្នាក់ឯងទេដែលអាចប្រើប្រាស់អាវុធប្រភេទនេះ។ ប្រទេសអាល្លឺម៉ង់ បែលហ្ស៊ិក អ៊ីតាលី តួកគី និងហូឡង់នឹងអាចមានអាវុធប្រភេទនេះសម្រាប់ប្រើប្រាស់ដូចគ្នា។
កន្លងមកអាមេរិកតែងតែចោទប្រកាន់រុស្ស៊ីពាក់ព័ន្ធការបំពានសន្ធិសញ្ញាហាមឃាត់ការរីកសាយភាយនៃអាវុធនុយក្លេអ៊ែរ ក្រោយពេលរុស្ស៊ីបន្ទាន់សម័យក្បាលគ្រាប់នុយក្លេអ៊ែរខ្លួន។ ចំណែករុស្ស៊ីមិនពេញចិត្តទាល់តែសោះព្រោះក្រៅពីពង្រឹងសមត្ថភាពនុយក្លេអ៊ែរ អាមេរិកក៏បន្តកសាងកម្លាំងនៅតំបន់អឺរ៉ុប និងធ្វើសមយុទ្ធយោធាជាបន្តបន្ទាប់ជាមួយបណ្តារដ្ឋសមាជិកណាតូដែលនៅជុំវិញរុស្ស៊ីផងដែរ ចាប់ពីរុស្ស៊ីលើកទ័ពឈ្លានពានអ៊ុយក្រែន និងត្របាក់យកទឹកដីគ្រីមៀនោះ៕
Tag:
រុស្ស៊ី
អាមេរិក
ណាតូ
B61-12
© រក្សាសិទ្ធិដោយ thmeythmey.com