អន្តរជាតិ
វិបត្តិឧបទ្វីបកូរ៉េ៖ ត្រាំថាការចរចាមិនមែនជាដំណោះស្រាយ តែម៉ាធីសថាការចរចាជារឿងសំខាន់
× ប្រធានាធិបតី ដូណាល់ ត្រាំ និងរដ្ឋមន្ត្រីការពារជាតិ ជេម ម៉ាធីស បានបង្ហាញជំហរផ្ទុយគ្នាជាថ្មីទៀតលើការដោះស្រាយបញ្ហានុយក្លេអ៊ែរកូរ៉េខាងជើង។ ក្រោយពីកូរ៉េខាងជើងបាញ់មីស៊ីលរំលងជប៉ុនមក លោក ត្រាំ និយាយថា ការចរចាមិនអាចដោះស្រាយបញ្ហានេះបានទេ ព្រោះចរចាប៉ុន្មានឆ្នាំហើយនៅតែគ្មានបានផលអ្វិ។ យ៉ាងណាក្ដី រដ្ឋមន្ត្រីការពារជាតិរបស់លោកមិនយល់ស្របតាមលោកឡើយ និងនៅតែលើកឡើងពីអាទិភាពនៃការចរចាដដែល។
រដ្ឋបាលប្រធានាធិបតី ដូណាល់ ត្រាំ មិនស៊ីសង្វាក់គ្នាឡើយចំពោះដំណោះស្រាយវិបត្តិនៅឧបទ្វីបកូរ៉េ។ ខណៈដែលលោក ត្រាំ អស់ការអត់ធ្មត់ លែងចង់ចរចា និងចង់តែប្រើកម្លាំងយោធាបញ្ចប់បញ្ហានោះ មន្ត្រីថ្នាក់ក្រោមរបស់លោកបែរជាមានគំនិតខុសពីលោក ហើយនៅតែប្រកាន់យកជំហរចរចាជាអាទិភាពដដែល។ មិនមែនតែមន្ត្រីថ្នាក់ដែលជំទាស់គំនិតលោក ត្រាំ សូម្បីតែមហាអំណាចផ្សេងក៏នៅប្រកាន់ជំហរចរចាដែរ។
កូរ៉េខាងជើងបានបង្ករឿងក្តៅក្រហាយជាថ្មីទៀត ដោយបាញ់មីស៊ីលឆ្លងកាត់ទឹកដីជប៉ុននៅថ្ងៃអង្គារទី ២៩ ខែសីហា។ ជប៉ុនមិនសប្បាយចិត្តនឹងទង្វើបង្ករឿងយ៉ាងគឃ្លើនរបស់កូរ៉េខាងជើងទេ និងបានស្នើឲ្យមានកិច្ចប្រជុំបន្ទាន់នៅក្រុមប្រឹក្សាសន្តិសុខអង្គការសហប្រជាជាតិដើម្បីដាក់ចំណាត់ការប្រឆាំងបន្ថែមកូរ៉េខាងជើង។ ការបាញ់សាកល្បងមីស៊ីលនេះធ្វើឲ្យលោក ត្រាំ រងភាពអាម៉ាសខ្លាំង ដ្បិតលោក ត្រាំ ធ្លាប់អួតអាងថា កូរ៉េខាងជើងចាប់ផ្តើមចេះគោរពលោកហើយ។
ឆ្លើយតបនឹងទង្វើរបស់ព្យុងយ៉ាង លោក ត្រាំ ទំនងកាន់តែអស់ចិត្តនឹងការចរចាមែនទែនហើយ។ ប្រធានាធិបតីអាមរិករូបនេះបានសរសេរតាមបណ្ដាញTwitter ដូច្នេះថា៖ «អាមេរិកបាននិយាយជាមួយកូរ៉េខាងជើង និងបង់ប្រាក់ឲ្យកូរ៉េខាងជើងអស់ពេល២៥ឆ្នាំមកហើយ។ ការចរចាមិនមែនជាដំណោះស្រាយទេ»។ នេះអាចជាការព្រមានម្ដងទៀតរបស់លោក ត្រាំ ចំពោះកូរ៉េខាងជើងដែលចេះតែព្រហើនម្ដងហើយម្ដងទៀតនោះ។
យ៉ាងណាមិញ រដ្ឋមន្ត្រីការពារជាតិអាមេរិក ជេម ម៉ាធីស បែរជាយល់ឃើញខុសពីលោក ត្រាំ ទៅវិញ។ យើងមិនដែលបោះបង់ដំណោះស្រាយការទូតទេ។ នេះជាចម្លើយរបស់ប្រមុខការពារជាតិអាមេរិកទៅកាន់អ្នកសារព័ត៌មានដែលសួរលោកថាអាមេរិកឈប់ប្រើដំណោះស្រាយការទូតឬក្រោយការបាញ់មីស៊ីលជាបន្តបន្ទាប់របស់កូរ៉េខាងជើង។ លោក ម៉ាធីស ឆ្លើយដូចនេះតែប៉ុន្មានម៉ោងប៉ុណ្ណោះក្រោយការបង្ហោះសារលើ Twitter របស់លោក ត្រាំ ។
ថ្លែងមុនជំនួបជាមួយសមភាគីកូរ៉េខាងត្បូងនៅមន្ទីរបញ្ចកោណ ប្រមុខការពារជាតិអាមេរិកក៏បានលើកឡើងដែរថា អាមេរិក នឹងបន្តធ្វើការជាមួយកូរ៉េខាងត្បូង ព្រោះទាំងពីរនាក់សុទ្ធតែត្រូវការពារប្រទេស និងប្រជាជនរបស់ខ្លួននីមួយៗ។ យ៉ាងណាក្ដី ការបាញ់មីស៊ីលរបស់កូរ៉េខាងជើងនៅតែជាមិនអាចទទួលយកបាន ហើយរឿងនេះពិតជាធ្វើឲ្យលោក ត្រាំ រង្កៀសចិត្តយ៉ាងខ្លាំងរហូតដល់ថ្នាក់គំរាមប្រើកម្លាំងទ័ពទៅហើយ៕
Tag:
អាមេរិក
ដូណាល់ ត្រាំ
ជេម ម៉ាធីស
កូរ៉េខាងជើង
© រក្សាសិទ្ធិដោយ thmeythmey.com