អន្តរជាតិ
ជម្លោះស៊ីរី៖ UN ថាក្រុមរដ្ឋឥស្លាមយកប្រជាជនធ្វើខែល ឯសម្ព័ន្ធមិត្តអាមេរិកទម្លាក់គ្រាប់បែកពីលើ
× កងទ័ពឧទ្ទាមស៊ីរី និងក្រុមចម្រុះអន្តរជាតិដឹកនាំដោយអាមេរិក កំពុងធ្វើប្រតិបត្តិការរំដោះទីក្រុង Raqqa ដែលជារដ្ឋធានីរបស់ក្រុមរដ្ឋឥស្លាមនៅស៊ីរី។ សកម្មជនរដ្ឋឥស្លាមបានព្យាយាមវាយបកលើកងទ័ពចម្រុះ និងបានប្រើប្រាស់ប្រជាជនស៊ីវិលធ្វើជាខែលការពារខ្លួនពីការវាយប្រហារទៀតផង។ ការវាយប្រយុទ្ធតដៃទៅវិញទៅមកធ្វើឲ្យប្រជាជនដែលជាប់ខ្លួនក្នុងទីក្រុងបាត់បង់ជីវិត រងរបួស និងរស់នៅដោយការភ័យព្រួយរាល់ថ្ងៃ។
អង្គការសហប្រជាជាតិបានប៉ាន់ស្មានថា ប្រជាជនស៊ីរីចំនួន២៧បានស្លាប់ក្នុងសមរភូមិ Raqqa ដែលកំពុងស្ថិតក្នុងការប្រទាញប្រទង់រវាងកម្លាំងឧទ្ទាមស៊ីរីគាំទ្រដោយអាមេរិក និងសកម្មជនក្រុមរដ្ឋឥស្លាម។ ការប្រយុទ្ធរវាងកម្លាំងឧទ្ទាមស៊ីរី និងក្រុមរដ្ឋឥស្លាម ធ្វើឲ្យប្រជាជនជាច្រើនជាប់ខ្លួនក្នុងទីក្រុង មិនអាចគេចទៅរកកន្លែងមានសុវត្ថិភាពបានឡើយ។ ក្រុមជ្រុលនិយមបានចាប់ពួកគេធ្វើជាចំណាប់ខ្មាំង ខណៈដែលកម្លាំងចម្រុះដឹកនាំដោយអាមេរិកបន្តយុទ្ធនាការដែនអាកាសរបស់ខ្លួន។
អគ្គលេខាធិការរងអង្គការសហប្រជាជាតិទទួលបន្ទុកកិច្ចការមនុស្សធម៌ Stephen O'Brien បានប្រាប់កិច្ចប្រជុំក្រុមប្រឹក្សាសន្តិសុខនៅថ្ងៃទី៣០ ខែសីហា ថា ជនស៊ីវិលជាងពីរម៉ឺននាក់នៅតែជាប់ខ្លួនក្នុងទីក្រុង Raqqa ដែលគ្រប់គ្រងដោយក្រុមរដ្ឋឥស្លាម។ លោក O'Brien បន្តថា ប្រជាជនដែលមិនគេចខ្លួនបានទាំងនោះ ក្លាយជាជនរងគ្រោះក្នុងការបាញ់គ្នាទៅវិញទៅមករវាងសកម្មជនរដ្ឋឥស្លាម និងកម្លាំងប្រឆាំងស៊ីរីដែលជួយគាំទ្រដោយយុទ្ធនាការដែនអាកាសរបស់សម្ព័ន្ធមិត្តដឹកនាំដោយអាមេរិក។
«ពួកគេប្រឈមមុខការស្លាប់ ដោយសាររការវាយប្រហារដែនអាកាសរបស់ក្រុមចម្រុះ ឬក៏ដោយសារតែក្រុមជ្រុលនិយមបាញ់ ឬដោយសារការជាន់មីនដែលបង្កៃដោយពួកជ្រុលនិយម ពេលពួកគេរត់គេចខ្លួន។ បើមិនអាចគេចខ្លួនបានទេ ពួកគេអាចត្រូវក្រុមរដ្ឋឥស្លាមយកធ្វើជាខែលការពារខ្លួនពីការវាយប្រហារមិនខាន»។ នេះជាការបញ្ជាក់បន្ថែមរបស់លោក O'Brien ដែលបន្ទុកជាអ្នកសម្របសម្រួលការជួយសង្គ្រោះបន្ទាន់ដែរនោះ។
មន្ត្រីជាន់ខ្ពស់រូបនេះបានហៅស្ថានភាពនៅស៊ីរីជារឿងសោកសង្រេងពោរពេញដោយសោកនាដកម្ម និងជាការពិតក៏គ្រោតគ្រាត ហើយក៏បានស្នើឲ្យបញ្ឈប់វិនាសកម្មលើប្រជាជនស៊ីរីទៀតផង។ លោក O'Brien ក៏បានទទូចឲ្យភាគីទាំងសងខាងដែលកំពុងប្រយុទ្ធគ្នានៅ Raqqa ក៏ដូចជាកន្លែងផ្សេងទៀត ចាត់វិធានការគ្រប់យ៉ាងដើម្បីការពារជីវិតជនស៊ីវិលដែលជាប់ផុងក្នុងសមរភូមិ ក៏ដូចជាការពារហេដ្ឋារចនាសម្ព័ន្ធដទៃទៀតផងដែរ។
ក្រុមឧទ្ទាមស៊ីរីបានចាប់ផ្ដើមយុទ្ធនាការរំដោះខេត្ត Raqqa តាំងពីខែវិច្ឆកាឆ្នាំមុនមកម្ល៉េះ ហើយមកដល់ខែមិថុនា ឆ្នាំ២០១៧ ក្រុមនេះក៏រុលដល់តំបន់ទីក្រុងរបស់ខេត្តនេះ ដែលជាមូលដ្ឋានរឹងមាំរបស់ក្រុមជ្រុលនិយមរដ្ឋឥស្លាមនៅស៊ីរី។ សកម្មជនរដ្ឋឥស្លាមប្រមាណមួយពាន់នាក់បន្តការពារទីក្រុងនឹងការវាយប្រហាររបស់កម្លាំងប្រឆាំងរដ្ឋាភិបាលស៊ីរីដែលមានចំនួនជាងមួយម៉ឺននាក់ ហើយត្រូវបានហ្វឹកហ្វឺនដោយទាហានអាមេរិក និងគាំទ្រដោយក្រុមចម្រុះអន្តរជាតិ៕
Tag:
UN
ស៊ីរី
អាមេរិក
ក្រុមរដ្ឋឥស្លាម
© រក្សាសិទ្ធិដោយ thmeythmey.com