អន្តរជាតិ
មហាយក្សចិនថា ខ្លួនមិនបណ្តោយឲ្យសង្គ្រាម ឬចលាចលកើតឡើងនៅឧបទ្វីបកូរ៉េឡើយ
× រដ្ឋាភិបាលចិនបានបញ្ជាក់ជាថ្មីថា ទោះក្នុងកាលៈទេសៈណាក៏ដោយ ខ្លួនមិនបណ្តែតបណ្តោយឲ្យសង្គ្រាម ឬបញ្ហាចលាចលកើតមានឡើងនៅក្បែររបងផ្ទះខ្លួនឡើយ។ ការបញ្ជាក់បែបនេះ កើតឡើងស្របពេលដែល កូរ៉េខាងត្បូង និងអាមេរិកបន្តធ្វើសមយុទ្ធសម្ញែងសាច់ដុំបន្ទាប់ពីកូរ៉េខាងជើងបាញ់មីស៊ីលរំលងជប៉ុនដើមសប្តាហ៍កន្លងទៅ។
ក្រសួងការពារជាតិចិនបានអះអាងជាថ្មីថា ខ្លួននឹងប្រឹងប្រែងធ្វើយ៉ាងណាទប់ស្កាត់សង្គ្រាម ឬភាពចលាចលនានាកុំឲ្យកើតឡើងនៅក្បែររបងផ្ទះខ្លួន ដែលសំដៅលើឧបទ្វីបកូរ៉េនោះ។ ចិនបង្ហាញពីឆន្ទៈក្នុងការដាក់សម្ពាធកូរ៉េខាងជើង តាមរយៈការដាក់ទណ្ឌកម្ម ប៉ុន្តែចិនក៏តែងរិះគន់អាមេរិក និងកូរ៉េខាងត្បូងផងដែរ ព្រោះគេបន្តបង្កភាពតានតឹងដោយធ្វើសមយុទ្ធរួមគ្នារហូតមក។
ទីភ្នាក់ងារព័ត៌មាន Reuters ចុះផ្សាយថា អ្នកនាំពាក្យក្រសួងការពារជាតិចិន Ren Guoqiang ថ្លែងពីការប្តេជ្ញាចិត្តរបស់ខ្លួនក្នុងការដោះស្រាយបញ្ហាឧបទ្វីបកូរ៉េ និងទប់ស្កាត់សង្គ្រាមក៏ដូចជាភាពចលាចលនានាក្នុងសន្និសីទសារព័ត៌មានប្រចាំខែក្នុងសប្តាហ៍នេះ។
អ្នកនាំពាក្យរូបនេះបានសង្កត់ធ្ងន់ផងដែរពាក់ព័ន្ធជំហររបស់ចិនក្នុងការដោះស្រាយបញ្ហាឧបទ្វីបកូរ៉េផងដែរ។ លោកបញ្ជាក់ថា ក្នុងនាមជាមហាអំណាច និងជាមិត្តជិតខាង ចិននៅតែគាំទ្រការដោះស្រាយជម្លោះតាមវិធីការទូត មានដូចជាការសន្ទនា និងការចរចាគ្នាផងដែរ ហើយការរំសាយអាវុធនុយក្លេអ៊ែរនៅតែជាអ្វីដែលចិនគាំទ្រដដែល។
ចិនសន្យាការពារសន្តិភាព និងទប់ស្កាត់សង្គ្រាមនៅឧបទ្វីបកូរ៉េ ចំពេលដែលអាមេរិក និងសម្ព័ន្ធមិត្តកូរ៉េខាងត្បូងបន្តធ្វើសមយុទ្ធឥតឈប់ដើម្បីសម្ញែងសាច់ដុំដាក់របបដឹកនាំក្រុងព្យុងយ៉ាងដែលហ៊ានបាញ់មីស៊ីលរំលងជប៉ុននៅដើមសប្តាហ៍នេះ។ អាមេរិកតែងនិយាយម្តងហើយម្តងទៀតពីការប្រើប្រាស់កម្លាំងទ័ពដើម្បីប្រឆាំងកូរ៉េខាងជើងបើកសិនជាចាំបាច់នោះ ហើយវាក៏បង្កឲ្យស្ថានការណ៍តានតឹងថែមទៀតផង។
បច្ចុប្បន្ននេះគេឃើញយន្តហោះទម្លាក់គ្រាប់បែកយុទ្ធសាស្ត្រ B-1B របស់អាមេរិករួមជាមួយយន្តហោះចម្បាំងកូរ៉េខាងត្បូង ចូលរួមក្នុងសមយុទ្ធមួយផង។
បើតាមទីភ្នាក់ងារព័ត៌មានកូរ៉េខាងត្បូង Yonhap យន្តហោះចម្បាំងអាមេរិកបួនគ្រឿងក្នុងនោះមានយន្តហោះ B-1B ពីរគ្រឿង និងយន្តហោះប្រដេញ F-35 ពីរគ្រឿងផ្សេងទៀត ដែលបានចូលរួមក្នុងប្រតិបត្តិការហោះហើររួមគ្នាមួយជាមួយយន្តហោះចម្បាំង F-15 របស់កូរ៉េខាងត្បូងជាច្រើនគ្រឿងនៅថ្ងៃព្រហស្បតិ៍នេះដែរ៕
Tag:
ចិន
អាមេរិក
កូរ៉េខាងជើង
កូរ៉េខាងជើង
Ren Guoqiang
© រក្សាសិទ្ធិដោយ thmeythmey.com