អន្តរជាតិ
ជម្លោះការទូត៖ អាមេរិកបិទកុងស៊ុលរុស្ស៊ី ឆ្លើយតបការបណ្ដេញមន្ត្រីទូតអាមេរិកជាង៧៥០នាក់ កុងស៊ុលរុស្ស៊ីប្រចាំទីក្រុងសាន់ហ្វ្រាន់ស៊ីស្កូដែលអាមេរិកបញ្ជាឲ្យបិទ (រូបភាព៖ Reuters)
× ក្រសួងការបរទេសអាមេរិក នៅថ្ងៃទី៣១ ខែសីហា បានបញ្ជាបិទកុងស៊ុលរុស្ស៊ីប្រចាំទីក្រុងសាន់ហ្វ្រាន់ស៊ីស្កូ និងអាគារពីរកន្លែងទៀតនៅទីក្រុងញូវយ៉ក និងក្រុងវ៉ាស៊ីតោន។ ការបិទកុងស៊ុលនេះ គឺជាវិធានការណ៍ដើម្បីឆ្លើយតបទង្វើរបស់រុស្ស៊ីដែលបញ្ជាឲ្យមន្ត្រីទូតអាមេរិកច្រើននាក់ចាកចេញពីទឹកដីរុស្ស៊ី។ រុស្ស៊ីមានរយៈពេលត្រឹមថ្ងៃទី២ ខែកញ្ញា ដើម្បីបិទបេសកកម្មទាំងបីកន្លែងនេះ ខណៈប្រមុខការទូត Sergey Lavrov បង្ហាញការសោកស្ដាយ តែមិនទាន់មានចំណាត់ការតបវិញទេ។
ក្ដីសង្ឃឹមថាទំនាក់ទំនងរវាងអាមេរិក និងរុស្ស៊ីនឹងប្រសើរឡើងវិញក្នុងរដ្ឋបាលប្រធានាធិបតី ដូណាល់ ត្រាំ រសាត់កាន់តែឆ្ងាយហើយ ខណៈដែលអាមេរិក និងរុស្ស៊ី កំពុងបន្តជម្លោះការទូតជាមួយមិនចេះឈប់។ ជម្លោះការទូតដែលចាប់ផ្ដើមនៅចុងអាណត្តិអតីតប្រធានាធិបតី បារ៉ាក់ អូបាម៉ា ធ្វើឲ្យរដ្ឋបាលលោក ត្រាំ ពិបាកធ្វើការជាមួយរុស្ស៊ីជាខ្លាំង ទោះជាលោក ត្រាំ ផ្ទាល់មានបំណងស្ដារទំនាក់ទំនងឡើងវិញក្ដី។
តាំងពីចូលកាន់តំណែងផ្លូវការនៅដើមឆ្នាំ២០១៧ លោក ត្រាំ តែងលើកឡើងម្ដងហើយម្ដងទៀតថា លោកនឹងព្យាយាមពង្រឹងទំនាក់ទំនងជាមួយរុស្ស៊ីដែលល្អក់កករឡើងវិញ។ ប៉ុន្តែការប្រឹងប្រែងរបស់លោកមិនទទួលបានផលឡើយ ព្រោះសំណុំរឿងរុស្ស៊ីលូកលាន់កិច្ចការបោះឆ្នោតអាមេរិក និងសំណុំរឿងអ៊ុយក្រែន ក្លាយជាឧបសគ្គរាំងស្ទះ ស្របពេលដែលសភាអាមេរិកឯណោះនៅតែប្រកាន់ជំហរតឹងរ៉ឹងដដែលលើបញ្ហានេះ។
១. មួយដៃទៅ មួយដៃមក
នៅខែធ្នូ ឆ្នាំ២០១៦ លោក អូបាម៉ា បានចេញបញ្ជាបណ្ដេញមន្ត្រីទូតរុស្ស៊ីចំនួន៣៥នាក់ និងបញ្ជាឲ្យបិទទីតាំងជាកម្មសិទ្ធិស្ថានទូតរុស្ស៊ចំនួនពីរកន្លែងនៅទីក្រុងវ៉ាស៊ីតោន។ មន្ត្រីទូតរុស្ស៊ីទាំងនោះត្រូវបានចោទថាជាភា្នក់ងារចារកម្ម ដែលធ្វើសកម្មភាពជ្រៀតជ្រែកកិច្ចការបោះឆ្នោតអាមេរិក ហើយដែលគេជឿថាជួយឲ្យលោក ត្រាំ ឈ្នះលោកស្រី ហ៊ីឡារី គ្លីនតុន ដើម្បីក្លាយជាប្រធានាធិបតី។ រុស្ស៊ីបានបដិសេធដាច់ខាតការចោទប្រកាន់ទាំងនោះ។
ក្រុងមូស្គូមិនបានឆ្លើយតបនឹងការបណ្ដេញចេញនេះទេ ដោយរំពឹងថារដ្ឋបាលថ្មីរបស់លោក ត្រាំ អាចស្ដារទំនាក់ទំនងទ្វេភាគីបានឡើងវិញ និងមិនធ្វើឲ្យចំណងការទូតធ្លាក់ចុះដូចសម័យលោក អូបាម៉ា ទេ។ យ៉ាងណាមិញ ក្ដីរំពឹងនេះមិនបានកើតឡើងទេ។ ទោះជាលោក ត្រាំ ចង់បានទំនាក់ទំនងល្អជាមួយរុស្ស៊ីក្ដី សភាអាមេរិកក៏បានអនុម័តទណ្ឌកម្មថ្មីទៀតលើរុស្ស៊ីជុំវិញសំណុំរឿងបោះឆ្នោតឆ្នាំ២០១៦ បញ្ហាអ៊ុយក្រែន និងការលេបយកតំបន់គ្រីមៀ។
ទំនងទ្រាំលែងបានហើយនោះ ប្រធានាធិបតីរុស្ស៊ី វ្ល៉ាឌីមៀ ពូទីន នៅខែកក្កដា ឆ្នាំ២០១៧ ក៏បានបញ្ជាឲ្យកាត់បន្ថយចំនួនបុគ្គលិកទូតអាមេរិកនៅរុស្ស៊ី ដើម្បីឲ្យមានសមាមាត្រចំនួនបុគ្គលិកទូតរុស្ស៊ីនៅអាមេរិកដែរ។ បុគ្គលិកទូតអាមេរិកប្រមាណ៧៥០នាក់ ត្រូវរៀបចាកចេញពីរុស្ស៊ីនៅត្រឹមថ្ងៃទី១ ខែកញ្ញា ហើយក៏បានដកហូតទីតាំងច្រើនកន្លែងមានគ្រប់គ្រងដោយមន្ត្រីទូតអាមេរិក ក៏ដូចជាហាមមន្ត្រីទូតអាមេរិកធ្វើដំណើរទៅកាន់កន្លែងច្រើនទៀតក្នុងរដ្ឋធានីមូស្គូ។
មួយថ្ងៃមុនដល់ការកំណត់មន្ត្រីទូតអាមេរិកត្រូវចាកចេញពីរុស្ស៊ី ក្រសួងការបរទេសអាមេរិក នៅថ្ងៃទី៣១ ខែសីហា បានប្រាប់ឲ្យរុស្ស៊ីបិទកុងស៊ុលនៅសាន់ហ្វ្រាន់ស៊ីស្កូ និងបេសកកម្មពាណិជ្ជកម្មពីរទៀតនៅញូវយ៉ក និងវ៉ាស៊ីនតោន ដោយទុកពេលត្រឹមថ្ងៃទី២ ខែកញ្ញាដើម្បីបិទទាំងស្រុង។ អ្នកនាំពាក្យក្រសួងការបរទេសអាមេរិកនិយាយថា អាមេរិកត្រៀមខ្លួនចាត់វិធានការដែលចាំបាច់ ឯអ្នកនាំពាក្យសេតវិមាននិយាយថា លោក ត្រាំ ជាអ្នកសម្រេចចិត្តផ្ទាល់លើការបិទបេសកកម្មទូតរុស្ស៊ីទាំងបីកន្លែង។
២. រុស្ស៊ីត្រៀមឆ្លើយតបវិញក្នុងពេលខាងមុខ
រដ្ឋមន្ត្រីការបរទេសអាមេរិក រិច ធីល័រសិន បានប្រាប់សមភាគីរុស្ស៊ី Sergei Lavrov ពីដំណឹងនៃការបិទកុងស៊ុល និងបេសកកម្មពាណិជ្ជកម្មរុស្ស៊ីក្នុងការជជែកតាមទូរសព្ទនៅថ្ងៃទី៣១ ខែសីហា។ លោក Lavrov បានបង្ហាញពីការសោកស្ដាយដែលបញ្ហាកាន់តែរាលដាលខ្លាំងក្នុងទំនាក់ទំនងទ្វេភាគី តែលោកក៏និយាយដែរថាបញ្ហាទាំងនេះមិនមែនផ្ដើមគំនិតដោយរុស្ស៊ីទេ ហើយរុស្ស៊ីដើរតាមក្រោយអាមេរិកប៉ុណ្ណោះ។
បើតាមសារព័ត៌មាន RT លោក Lavrov បានប្រាប់លោក ធីល័រសិន ថា រុស្ស៊ីនឹងសិក្សាឲ្យបានច្បាស់លាស់មុននឹងឆ្លើយតបទៅនឹងចំណាត់ការរបស់អាមេរិក ហើយរុស្ស៊ីក៏នឹងប្រាប់អាមេរិកពីពេលវេលាដែលខ្លួនត្រូវឆ្លើយតបវិញដែរ។ ប្រមុខការទូតអាមេរិក និងរុស្ស៊ី អាចជួបគ្នានៅក្រៅមហាសន្និបាតអង្គការសហប្រជាជាតិនៅខែកញ្ញានេះ ដើម្បីពិភាក្សារកច្រកចេញពីជម្លោះការទូតដែលក្លាយជាបញ្ហារាំងស្ទះដល់ការទំនាក់ទំនងទ្វេភាគី៕
Tag:
អាមេរិក
រុស្ស៊ី
ដូណាល់ ត្រាំ
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com