ជាតិ
អន្តរជាតិ
ព្យុះ Harvey បង្កការខូចខាតដល់រដ្ឋតិចសាសក្នុងទំហំយ៉ាងហោច ៥១ពាន់លានដុល្លារ
× ស្ថាប័នស្រាវជ្រាវអាល្លឺម៉ង់ បានវាយតម្លៃថា ទំហំនៃការខូចខាតដែលបង្កឡើងដោយព្យុះ Harvey កើនដល់ ៥៨ ពាន់លានដុល្លារឯណោះ។ ទំហំនៃការខូតខាតនេះអាចនឹងកើនឡើងបន្ថែមទៀត ហើយព្យុះ Harvey នឹងក្លាយជាគ្រោះមហន្តរាយធម្មជាតិដែលធ្វើឲ្យខូចខាតខ្លាំងបំផុតមួយរាប់ចាប់ពីឆ្នាំ ១៩០០មក។
ប្រជាជនរាប់ម៉ឺននាក់ដែលរស់នៅក្នុងរដ្ឋតិចសាសបានរងគ្រោះដោយសារព្យុះ Harvey កន្លងមក។ ប្រជាជនយ៉ាងហោចណាស់ ៣៧នាក់បានស្លាប់បាត់បង់ជីវិត ខណៈដែលផ្ទះសម្បែង ហេដ្ឋារចនាសម្ព័ន្ធដូចជាផ្លូវថ្នល់ត្រូវរងការបំផ្លិចបំផ្លាញផងដែរ។
ខណៈដែលប្រតិបត្តិការជួយសង្គ្រោះនៅបន្តទៅមុខ នៅថ្ងៃព្រហស្បតិ៍ ទី ៣១ ខែសីហា ស្ថាប័នស្រាវអាល្លឺម៉ង់ មជ្ឈមណ្ឌលសម្រាប់ការគ្រប់គ្រងនិងបច្ចេកវិទ្យាសម្រាប់កាត់បន្ថយគ្រោះមហន្តរាយ (CEDIM) បានវាយតម្លៃថា ការខូចខាតជារួមបង្កឲ្យព្យុះកំណាចនេះកើនមានទំហំ ៥៨ ពាន់លានដុល្លារអាមេរិកឯណោះ។
ទីភ្នាក់ងារព័ត៌មាន AFP ស្រង់សម្តី លោក James Daniell អ្នកជំនាញផ្នែកគ្រោះមហន្តរាយនៃស្ថាប័នស្រាវជ្រាខាងលើដូច្នេះថា ៖«ការខូចខាតនេះគឺមានទំហំប្រហែល៥៨ពាន់លានដុល្លារ។ ក្នុងរយៈពេលពីរឬបីថ្ងៃទៅមុខទៀត យើងប្រហែលជាអាចឃើញការវាយតម្លៃនេះកើនឡើងថែមទៀតព្រោះយើងបញ្ចូលតែរដ្ឋតិចសាសក្នុងការវាយតម្លៃទេពេលនេះ»។
តាមពិតទៅ គេព្យាករណ៍ថា ទំហំនៃការខូចខាតនេះស្ថិតនៅចន្លោះពី ៤១ ទៅ៨០ពាន់លានដុល្លារដែលវាជាទំហំមួយដ៏ធំរួចទៅហើយ។ កាលពីថ្ងៃអង្គារ ទី ២៩ ខែសីហាកន្លងមកនេះដែរ ស្ថាប័នស្រាវជ្រាវ Enki អាមេរិកក៏បានវាយតម្លៃផងដែរថា ទំហំនៃការខូចខាតដែលបង្កឡើងដោយព្យុះនេះកើនដល់ ៤២ពាន់លានដុល្លារប៉ុណ្ណោះ។
ស្ថិតក្នុងទំហំ ៥៨ពាន់លានដុល្លារ Harvey ក្លាយជាគ្រោះមហន្តរាយធម្មជាតិដែលបង្កការខូចខាតខ្លាំងបំផុតទីប្រាំបួន លើលោករាប់ចាប់ពីឆ្នាំ ១៩០០មកនោះ។ ចំណែកគ្រោះមហន្តរាយធម្មជាតិកន្លងដែលបង្កឲ្យមានការខូចខាតខ្លាំងបំផុតនោះមាន ទីមួយគ្រោះមហន្តរាយរញ្ជួយដី Tohoku (បង្កជារលកយក្សស៊ូណាមិ)នៅកោះហុងស៊ូ ឆ្នាំ ២០១១ ដែលទំហំនៃការខូចខាតកើនឡើងដល់ ២១៨ពាន់លានដុល្លារអាមេរិកឯណោះ។ ទីពីរ គ្រោះមហន្តរាយរញ្ជួយដីនៅខេត្ត ស៊ីឈួនកាលពីឆ្នាំ ២០០៨ ដែលបង្កឲ្យមានការខូចខាតរហូតដល់ ១៦២ ពាន់លានុដុល្លារ និងទីបីព្យុះ កាទ្រីណា (Katrina) នៅឆ្នាំ ២០០៥ ដែលធ្វើឲ្យមានការខូចខាតក្នុងទំហំ១៦០ពាន់លានដុល្លារផងដែរ៕
Tag:
តិចសាស
Harvey
អាមេរិក
CEDIM
© រក្សាសិទ្ធិដោយ thmeythmey.com