អន្តរជាតិ
អាមេរិកផ្តល់ជំនួន ៩១លានដុលា្លដល់អេត្យូពីដែលបន្តរងគ្រោះទុរភិក្សបីឆ្នាំជាប់គ្នា រូបភាព៖ Martinplaut
× រដ្ឋបាលក្រុងវ៉ាស៊ីនតោននឹងផ្តល់ជំនួយមនុស្សធម៌ក្នុងទំហំទឹកប្រាក់ ៩១ លានដុល្លារបន្ថែមទៀតដល់ប្រទេសអេត្យូពី ដែលបន្តញាំញីដោយសារគ្រោះរាំងស្ងួតបីឆ្នាំជាប់គ្នាមកនេះ។ បូកទាំងជំនួយថ្មីនេះ ក្នុងឆ្នាំ ២០១៧ អាមេរិកបានផ្តល់ដល់អេត្យូពីសរុបទាំងអស់ ៤៥៤ លានដុល្លាររួចទៅហើយដើម្បីដោះស្រាយបញ្ហាប្រឈមនេះ។
អេត្យូពីបន្តរងគ្រោះដោយសារគ្រោះរាំងស្ងួតបីឆ្នាំជាប់ៗគ្នាចាប់ពីឆ្នាំ ២០១៥មក។ ប្រទេសនេះត្រូវការជំនួយមនុស្សធម៌បន្ថែមទៀតដើម្បីធានាពីសុវត្ថិភាពរបស់ប្រជាពលរដ្ឋ និងដោះស្រាយបញ្ហាប្រឈមនានាផងដែរ។
ឆ្លើយតបបញ្ហាប្រឈមធំនេះ សហរដ្ឋអាមេរិកដែលជាប្រទេសម្ចាស់ជំនួយធំមួយរបស់អេត្យពីនោះ បានសម្រេចផ្តល់ជំនួន ៩១ លានដុល្លារបន្ថែមទៀតដល់រដ្ឋាភិបាលអេត្យូពីនៅក្នុងសប្តាហ៍នេះដែរ។
លោក Mark Green ប្រធានទីភ្នាក់ងារអាមេរិកសម្រាប់ការអភិវឌ្ឍអន្តរជាតិបានបញ្ជាក់ប្រាប់សារព័ត៌មាន Washington Post ថា ជំនួយបន្ថែមដែលអាមេរិកផ្តល់ជូនអេត្យូពីគឺ ផ្តោតលើការផ្គត់ផ្គង់ស្បៀងអាហារ និងថ្នាំសង្កូវ។ បន្ថែមលុយ ៩១លានដុល្លារនេះទៀត ជំនួយដែលអាមេរិកផ្តល់ឲ្យអេត្យូពីក្នុងឆ្នាំ ២០១៧នេះ កើនដល់ ៤៥៤ លានដុល្លារទៅហើយ។ ចំណែកលុយជាង២០០លានដុល្លារផ្សេងទៀតគឺអាមេរិកជួយផ្គត់ផ្គងគម្រោងអភិវឌ្ឍផ្សេងទៀតនៅអេត្យូពីផងដែរ។
តាមពិតទៅ លោក Mark Green បានលើកឡើងពីជំនួយដែលផ្តល់ជូនរដ្ឋាភិបាលអេត្យូពីនេះក្នុងពេលដែលលោកជួបជាមួយនាយករដ្ឋមន្ត្រីអេត្យូពីលោក Hailemariam Desalegn។ ក្នុងជំនួយនោះដែរ ប្រធានស្ថាប័នទីភ្នាក់ងារអាមេរិកសម្រាប់ការអភិវឌ្ឍអន្តរជាតិនេះក៏បានស្នើសុំឲ្យរដ្ឋាភិបាលអេត្យូពីយកចិត្តទុកដាក់ដោះស្រាយបញ្ហាអភិបាលកិច្ច និង បើកចំហរនយោបាយសម្រាប់ប្រជាជនបញ្ចេញមតិយោបល់របស់ខ្លួនផង។
«អ្វីដែលខ្ញុំប្រាប់គាត់គឺថា យើងត្រូវក្រឡេកមើលប្រទេសដទៃផ្សេងទៀតទូទាំងពិភពលោកត្រូវការអ្វីដើម្បីពង្រឹងសមត្ថភាពក្នុងការផ្តល់សេវាសាធារណៈនិងជួយប្រជាពលរដ្ឋ។ រដ្ឋបាលប្រកបដោយទំនួលខុសត្រូវនិងមានការឆ្លើយតបខ្ពស់ រួមទាំងទីកន្លែងសម្រាប់ប្រជាជនដែលអាចជួបជុំគ្នាបានដើម្បីជជែកនិងចែករម្លែកគំនិតយោបលដោយចំហរ។ ការចង់បានរបស់យើងគឺរដ្ឋាភិបាលអេត្យូពីគួរបន្តគាំទ្រសកម្មភាពបែបនេះ និងបន្តប្រឹងប្រែងទៀតដើម្បីដោះស្រាយបញ្ហា»។
ក្រៅពីនេះ លោក Green ក៏បានទទូចឲ្យអេត្យូពីបន្តយកចិត្តទុកដាក់លើការរៀបចំថវិកាសម្រាប់ជំនួយមនុស្សធម៌ដែលដោះស្រាយបញ្ហាគ្រោះមហន្តរាយនេះផងដែរ។ កាលមានគ្រោះទុរភិក្សឆ្នាំ ២០១៥ និងឆ្នាំ ២០១៦ រដ្ឋាភិបាលអេត្យូពីបានចំណាយថវិកា ៧០០ លានដុល្លារលើស្បៀងអាហារសម្រាប់ផ្គត់ផ្គង់ប្រជាពលរដ្ឋ។ ប៉ុន្តឆ្នាំនេះរដ្ឋាភិបាលប្តេជ្ញាផ្តល់លុយត្រឹម ១១០លានដុល្លារប៉ុណ្ណោះសម្រាប់ដោះស្រាយបញ្ហាប្រឈមនេះ៕
Tag:
អាមេរិក
អេត្យពី
USAI
Mark Green
© រក្សាសិទ្ធិដោយ thmeythmey.com