នៅក្នុងជំពូកទី ២ ផ្នែកទី ១ នៃក្រមព្រហ្មទណ្ឌកម្ពុជា ឆ្នាំ ២០១០ បានកំណត់ពីសកម្មភាព ដែលចាត់ទុកថា ជាអំពើក្បត់ជាតិ និងចារកម្ម។ មាត្រា ៤៣៩ ស្តីពី អំពើក្បត់ជាតិ និងចារកម្ម នៃច្បាប់ដដែល បានកំណត់ថា បទល្មើសដែលមានចែងនៅក្នុងផ្នែកទី ១ នៃជំពូកទី ២ នេះ (ពីមាត្រា ៤៤០ ដល់មាត្រា ៤៤៩ នៃក្រមព្រហ្មទណ្ឌ) ជាអំពើក្បត់ជាតិ កាលបើបទល្មើសប្រព្រឹត្តដោយពលរដ្ឋខ្មែរ ឬដោយយោធិនខ្មែរ និងជាចារកម្ម កាលបើអំពើប្រព្រឹត្តដោយបុគ្គលដទៃទៀត។ អំពើក្បត់ជាតិ បានចែងជាបទល្មើសផ្សេងៗគ្នា។
មាត្រាទាំង ១០ ដែលចាត់ទុកថា ជាអំពើក្បត់ជាតិ និងចារកម្ម នោះ មានដូចតទៅ៖
មាត្រា ៤៤០ បទប្រគល់ឲ្យរដ្ឋបរទេសនូវដែនដីជាតិទាំងស្រុង ឬមួយផ្នែក
អំពើប្រគល់ឲ្យរដ្ឋបរទេស ឬភ្នាក់ងារបរទេស នូវដែនដីជាតិទាំងស្រុង ឬមួយផ្នែក ត្រូវផ្តន្ទាទោសដាក់ពន្ធនាគារអស់មួយជីវិត។
មាត្រា ៤៤១ បទប្រគល់ឲ្យរដ្ឋបរទេសនូវកងយោធពលខេមរភូមិន្ទ
អំពើប្រគល់ឲ្យរដ្ឋបរទេស ឬភ្នាក់ងារបរទេស នូវកងយោធពលខេមរភូមិន្ទត្រូវផ្តន្ទាទោសដាក់ពន្ធនាគារអស់មួយជីវិត។
មាត្រា ៤៤២ បទប្រគល់ឲ្យបរទេសនូវសម្ភារៈជាអាទិ៍សម្រាប់ការពារជាតិ
អំពើប្រគល់ឲ្យរដ្ឋបរទេស ឬភ្នាក់ងារបរទេស នូវស្បៀង សម្ភារ សំណង់ បរិក្ខាឋបនីយភណ្ឌ ឬគ្រឿងយន្តសម្រាប់ការពារជាតិ ត្រូវផ្តន្ទាទោសដាក់ពន្ធនាគារពី ១៥ ដល់៣០ ឆ្នាំ។
មាត្រា ៤៤៣ បទសន្ទិដ្ឋិភាពជាមួយបរទេស
បទសន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឲ្យមានអំពើប្រទូស្តរ៉ាយ ឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី ១៥ ដល់ ៣០ ឆ្នាំ។
មាត្រា ៤៤៤ បទប្រគល់ឲ្យរដ្ឋបរទេសនូវមធ្យោបាយធ្វើការប្រទូស្តរ៉ាយ ឬឈ្លានពាន
អំពើប្រគល់ឲ្យរដ្ឋបរទេស ឬភ្នាក់ងារបរទេសនូវមធ្យោបាយធ្វើការប្រទូស្តរ៉ាយ ឬឈ្លានពានប្រឆាំងនឹងព្រះរាជាណាចក្រកម្ពុជា ត្រូវផ្តន្ទាទោសដាក់ពន្ធនាគារពី ១៥ ដល់ ៣០ ឆ្នាំ។
មាត្រា ៤៤៥ បទប្រគល់ឲ្យរដ្ឋបរទេសនូវព័ត៌មានជាអាទិ៍ ដែលធ្វើឲ្យអន្តរាយការការពារជាតិ
អំពើប្រគល់ ឬធ្វើឲ្យងាយស្រួលធ្លាក់ដល់ដៃរដ្ឋបរទេស ឬភ្នាក់ងារបរទេសនូវព័ត៌មាន វិធី វត្ថុ ឯកសារ ទិន្នន័យព័ត៌មានវិទ្យា ឬសលាកបត្រដែលធ្វើអន្តរាយការការពារជាតិ ត្រូវផ្តន្ទាទោសដាក់ពន្ធនាគារពី ៧ ដល់ ១៥ ឆ្នាំ។
មាត្រា ៤៤៦ បទប្រមូលផ្តុំព័ត៌មានជាអាទិ៍ ដែលធ្វើឲ្យអន្តរាយការការពារជាតិ
អំពើទទួលឬប្រមូលផ្តុំ ដើម្បីផ្តល់ទៅឲ្យរដ្ឋបរទេស ឬភ្នាក់ងារបរទេសនូវព័ត៌មាន វិធី វត្ថុ ឯកសារ ទិន្នន័យព័ត៌មានវិទ្យា ឬសលាកបត្រដែលធ្វើអន្តរាយការការពារជាតិ ត្រូវផ្តន្ទាទោសដាក់ពន្ធនាគារពី ៥ ដល់ ១០ ឆ្នាំ។
មាត្រា ៤៤៧ បទបំផ្លិចបំផ្លាញជាអាទិ៍នូវសម្ភារដែលធ្វើឲ្យអន្តរាយការការពារជាតិ
អំពើបំផ្លិចបំផ្លាញ ធ្វើឲ្យខូចខាត ឬគៃបំបាត់ស្បៀង ឯកសារ សម្ភារ សំណង់ បរិក្ខារឋបនីយភណ្ឌ គ្រឿងយន្ត គ្រឿងសព្វាវុធ គ្រឿងបន្លាសបច្ចេកទេស ឬគ្រឿងគាំពារខាងបច្ចេកទេសផ្សេងទៀត ឬប្រព័ន្ធប្រព្រឹត្តិកម្មស្វ័យប្រវត្តនៃទិន្នន័យ ឬអំពើធ្វើឲ្យរាំងស្ទះដល់ដំណើរការជាប្រក្រតីរបស់ឧបករណ៍ទាំងនោះ កាលបើអំពើនេះអាចនាំឲ្យអន្តរាយការការពារជាតិ ត្រូវផ្តន្ទាទោសពី ៧ ដល់ ១៥ ឆ្នាំ។
មាត្រា ៤៤៨ បទផ្តល់ព័ត៌មានមិនពិត
អំពើផ្តល់ដល់អាជ្ញាធរស៊ីវិល ឬយោធាខ្មែរនូវព័ត៌មានមិនពិតដែលអាចធ្វើឲ្យអន្តរាយការការពារជាតិ ដើម្បីបម្រើផលប្រយោជន៍នៃរដ្ឋបរទេស ត្រូវផ្តន្ទាទោសដាក់ពន្ធនាគារពី ២ ឆ្នាំ ដល់ ៥ ឆ្នាំ និងពិន័យជាប្រាក់ពី ៤ លានដល់ ១០ លានរៀល។
មាត្រា ៤៤៩ ការប៉ុនប៉ង ការប៉ុនប៉ងប្រព្រឹត្តបទមជ្ឈិម ដែលមានចែងនៅក្នុងមាត្រា ៤៤៨ ត្រូវផ្តន្ទាទោសដូចបទមជ្ឈិមខាងលើដែរ។
ទោសបន្ថែមចំពោះបទល្មើសខាងលើ
មាត្រា ៤៥០ ទោសបន្ថែម ប្រភេទ និងរយៈពេលចំពោះបទល្មើសដែលចែងនៅក្នុងផ្នែកខាងលើនេះ (ពីមាត្រា ៤៤០ ដល់មាត្រា ៤៤៩ នៃក្រមព្រហ្មទណ្ឌ) ទោសបន្ថែមអាចត្រូវប្រកាសដូចជាៈ
១ ការដកសិទ្ធិខ្លះជាពលរដ្ឋ ជាស្ថាពរ ឬសម្រាប់រយៈពេល ៥ ឆ្នាំយ៉ាងច្រើន។
២ ការហាមឃាត់ចំពោះការប្រកបវិជ្ជាជីវៈ កាលបើបទល្មើសនេះ បានប្រព្រឹត្តនៅក្នុងការប្រកបវិជ្ជាជីវៈ ឬនៅក្នុងឱកាសនៃការប្រកបវិជ្ជាជីវៈនេះ ជាស្ថាពរ ឬសម្រាប់រយៈពេល ៥ ឆ្នាំយ៉ាងច្រើន។
៣ ការហាមឃាត់ចំពោះការស្នាក់នៅ សម្រាប់រយៈពេល ១០ ឆ្នាំ យ៉ាងច្រើន ចំពោះបទឧក្រិដ្ឋ ឬសម្រាប់រយៈពេល ៥ ឆ្នាំ យ៉ាងច្រើន ចំពោះបទមជ្ឈិម។
៤ ការហាមឃាត់ចំពោះការចាកចេញពីដែនដីព្រះរាជាណាចក្រកម្ពុជាសម្រាប់រយៈពេល ៥ ឆ្នាំ យ៉ាងច្រើន។
៥ ការហាមឃាត់ដល់ទណ្ឌិតបរទេសចំពោះការចូល ឬការស្នាក់នៅក្នុងដែនដីនៃព្រះរាជាណាចក្រកម្ពុជា ជាស្ថាពរ ឬសម្រាប់រយៈពេល ៥ ឆ្នាំ យ៉ាងច្រើន។
៦ ការរឹបអូសឧបករណ៍ សម្ភារ ឬវត្ថុណាមួយ ដែលប្រើប្រាស់សម្រាប់ប្រព្រឹត្តបទល្មើស ឬដែលមានគោលដៅប្រព្រឹត្តបទល្មើស។
៧ ការរឹបអូសយានជំនិះរបស់ទណ្ឌិតមួយគ្រឿង ឬច្រើនគ្រឿង។
៨ ការហាមឃាត់ចំពោះការកាន់កាប់ ឬការយកតាមខ្លួននូវអាវុធ គ្រឿងផ្ទុះ និងគ្រាប់រំសេវគ្រប់ប្រភេទ ជាស្ថាពរ ឬសម្រាប់រយៈពេល ៥ ឆ្នាំ យ៉ាងច្រើន។
៩ ការបិទផ្សាយសេចក្តីសម្រេចផ្តន្ទាទោស សម្រាប់រយៈពេល ២ ខែយ៉ាងច្រើន។
១០ ការផ្សាយសេចក្តីសម្រេចផ្តន្ទាទោសនៅក្នុងសារព័ត៌មាន។
១១ ការផ្សាយសេចក្តីសម្រេចផ្តន្ទាទោស តាមគ្រប់មធ្យោបាយទូរគមនាគមន៍ សោតទស្សន៍ សម្រាប់រយៈពេល ៨ ខែយ៉ាងច្រើន៕