ជាតិ
សង្គមជាតិ
ក្រសួងបរិស្ថាន នឹងអនុវត្តគម្រោងចុះបញ្ជីដីរដ្ឋសម្រាប់តំបន់ការពារធម្មជាតិលើកដំបូង
× គម្រោងចុះបញ្ជីដីរដ្ឋសម្រាប់តំបន់ការពារធម្មជាតិលើកដំបូង នឹងត្រូវអនុត្តន៍ដោយក្រសួងបរិស្ថានក្នុងពេលឆាប់ខាងមុខ នៅតំបន់ការពារធម្មជាតិ«ដែនជម្រកសត្វព្រៃពាមក្រសោម» និង«ដែនជម្រសត្វព្រៃភ្នំព្រច» ដែលគ្របដណ្តប់លើផ្ទៃជាង២៦ម៉ឺនហិកតា។ ក្រសួងបរិស្ថាន បានបញ្ជាក់ថា ការចុះបញ្ចីដីរដ្ឋសម្រាប់តំបន់ការពារធម្មជាតិ ជាយុទ្ធសាស្ត្រថ្មីមួយដើម្បីពង្រឹងប្រសិទ្ធភាពគ្រប់គ្រងប្រព័ន្ធតំប់ការពារធម្មជាតិនៅកម្ពុជា ដែលគ្របដណ្តប់លើផ្ទៃដីសរុបប្រមាណ៧.៥លានហិកតា ឬប្រមាណ៤១ភាគរយនៃផ្ទៃដីប្រទេសកម្ពុជា។ ការចុះបញ្ចីដីរដ្ឋ ក៏ជាជំហ៊ានទៅបំបាត់ករណីទំនាស់ដីធ្លីទាំងស្រុង ក្នុងតំបន់ការពារធម្មជាតិ និងរបៀងអភិរក្សជីវចម្រុះប្រព័ន្ធការពារធម្មជាតិ។
ក្រសួងបរិស្ថាន កំពុងសហការជាមួយក្រសួងរៀបចំដែនដី នគរូបនីយកម្ម និងសំណង់ រៀបចំអនុវត្តគម្រោងចុះបញ្ជីដីរដ្ឋសម្រាប់តំបន់ការពារធម្មជាតិចំនួន២កន្លែង ដែលគ្របដណ្តប់លើផ្ទៃដីសរុបចំនួន២៦៤,២៥០ហិកតា។ បើតាមសេចក្តីប្រកាសព័ត៌មានរបស់ក្រសួងបរិស្ថានចុះថ្ងៃទី៤ ខែកញ្ញា តំបន់ការពារធម្មជាតិទាំង២នោះ គឺ«ដែនជម្រកសត្វព្រៃពាមក្រសោម» ស្ថិតក្នុងភូមិសាស្ត្រខេត្តកោះកុង និង«ដែនជម្រសត្វព្រៃភ្នំព្រច» ស្ថិតក្នុងភូមិសាស្ត្រខេត្តមណ្ឌលគិរី។
ក្រសួងបរិស្ថាន បានឲ្យដឹងទៀតថា គម្រោងចុះបញ្ជីដីរដ្ឋ គឺជាគម្រោងសាកល្បងលើកដំបូង និងគាំទ្រថវិកាដោយធនាគារអភិវឌ្ឍន៍អាស៊ី(ADB) ចំនួន១.២៥លានដុល្លារ ក្រោមគម្រោងរបៀងអភិរក្សជីវចម្រុះមហាអនុតំបន់ទន្លេមេគង្គ ដើម្បីធានាប្រសិទ្ធភាពគ្រប់គ្រងដែនជម្រកសត្វព្រៃទាំង២ ។ គម្រោងនេះ នឹងកំណត់ច្បាស់លាស់ពីព្រំប្រទល់តំបន់គ្រប់គ្រងក្នុងតំបន់ការពារធម្មជាតិ ពិសេសតំបន់ប្រើប្រាស់ដោយចីរភាព និងតំបន់សហគមន៍ ក៏ដូចជាព្រំប្រទល់ ដែនជម្រសត្វព្រៃទាំងមូល។
ការចុះបញ្ចីដីរដ្ឋ សម្រាប់តំបនើការពារធម្មជាតិ គឺជាយុទ្ធសាស្ត្រថ្មីមួយ ដើម្បីពង្រឹងប្រសិទ្ធភាពញរប់គញរងប្រព័ន្ធតំប់ការពារធម្មជាតិនៅកម្ពុជា ដេលមានវិសាលភាពគ្របដណ្តប់លើផ្ទៃដីសរុបប្រមាណ ៧.៥លានហិកតា ស្មើនឹងប្រមាណ៤១ភាគរយនៃផ្ទដីប្រទេសកម្ពុជា។ នេះជាការគូសបញ្ជាក់នៅក្នុងសេចក្តីប្រកាសព័ត៌មានដដែល របស់ក្រសួងបរិស្ថាន ដែលបានបន្តទៀតថា គម្រោងនេះ ក៏ជាការឈានទៅលុបបំបាត់ទាំងស្រុងករណីទំនាស់ដីធ្លីក្នុងតំបន់ការពារធម្មជាតិ និងរបៀងអភិរក្សជីវចម្រុះប្រព័ន្ធការពារធម្មជាតិ។
តាមរយៈសេចក្តីប្រកាសព័ត៌មានដដែល គម្រោងសាកល្បងនេះ នឹងចាប់ផ្តើមសកម្មភាពជាក់ស្តែងនៅតាមតំបន់គោលដៅក្នុងពេលឆាប់ៗ ដោយត្រូវចុះពិគ្រោះយោបល់ជាមួយរដ្ឋបាលថ្នាក់ក្រោមជាតិ សហគមន៍មូលដ្ឋាន និងអ្នកពាក់ព័ន្ធ ដើម្បីធានាពីដំណើរការ និងប្រសិទ្ធភាព៕
Tag:
ដីរដ្ឋ
តំបន់ការពារធម្មជាតិ
© រក្សាសិទ្ធិដោយ thmeythmey.com