ជាតិ
លោក ភុល ជឹម ហៅគ្រូតា អតីតគ្រូអក្សរសាស្ត្រខ្មែរនៅបាក់ទូក និងជ័យថាវី កំពុងសង្គ្រោះបន្ទាន់
× គ្រូមួយថ្ងៃ គឺគ្រូមួយជីវិត! សាស្ត្រាចារ្យ ភុល ជឹម អាយុ៧៣ឆ្នាំ ធ្លាប់មានឈ្មោះល្បីល្បាញលើការបង្រៀនមុខវិជ្ជាអក្សរសាស្ត្រខ្មែរនៅវិទ្យាល័យបាក់ទូក និងសាលារៀនឯកជន ជ័យ ថាវី ក្នុងរាជធានីភ្នំពេញ។ បច្ចុប្បន្ន សាស្ត្រាចារ្យដែលមានរហស្សនាមថា «គ្រូតា» រូបនេះ ស្ថិតក្នុងការសង្គ្រោះបន្ទាន់នៅមន្ទីរពេទ្យឡាសង់តេ ខណៈសមាជិកគ្រួសារអំពាវនាវរកជំនួយឈាម និងថវិកាពីសប្បុរសជន។
«ស្ថានភាពជំងឺរបស់លោកឪពុក (លោកគ្រូតា) កំពុងដង្ហក់ និងខ្សោយទៅៗ ឈានឆ្ពោះទៅរកសភាពធ្ងន់ធ្ងរ ហើយក្រុមគ្រូពេទ្យតម្រូវឲ្យមានការលាងឈាមជាបន្ទាន់។ បច្ចុប្បន្នកំពុងត្រូវការជំនួយឈាមសង្គ្រោះ និងថវិកាព្យាបាល ក្រុមគ្រួសារកំពុងមានការព្រួយបារម្ភជាខ្លាំង កូនចៅបាននឹងកំពុងបរិច្ចាគឈាម ប៉ុន្តែមិនគ្រប់គ្រាន់ សូមអំពាវនាវស្វែងរកជំនួយឈាមសង្គ្រោះ និងជំនួយថវិកាបន្ថែម»។ នេះជាការអំពាវរបស់ លោក ជូ ចន្ទតារារិទ្ធ កូនប្រុសបង្កើតរបស់លោកគ្រូ ភុល ជឹម តាមរយៈសារព័ត៌មានថ្មីៗ ។
បើតាមលោក ជូ ចន្ទតារារិទ្ធ គិតត្រឹមល្ងាចថ្ងៃទី១១ ខែកញ្ញា លោកគ្រូតា ភុល ជឹម កំពុងស្ថិតនៅបន្ទប់សង្គ្រោះបន្ទាន់នៅឡើយ។ លោកបញ្ជាក់ថា៖«ឥឡូវហ្នឹង គាត់កំពុងដាក់អ៊ុកស៊ីសែន ព្រោះគាត់ពិបាកដកដង្ហើម ស្ថានគាត់កំពុងភាពធ្ងន់ធ្ងរ»។ លោកបន្តថា ជំងឺឪពុករបស់ខ្លួន គឺមានស្ថានភាពធ្ងន់ធ្ងរប្រមាណ៣សប្តាហ៍មកហើយ។
គ្រូតា ភុល ជឹម ដែលមានវ័យ ៧៣ឆ្នាំ គឺជាគ្រូបង្រៀនដែលសិស្សានុសិស្សស្គាល់ថាជា «លោកគ្រូតា» ផ្នែកអក្សរសាស្ត្រខ្មែរ ដ៏ល្បីម្នាក់នៅសាលាបង្រៀនគួរជ័យថាវី។
បើតាមការផ្សាយរបស់កាសែតភ្នំពេញប៉ុស្តិ៍ លោកគ្រូ ភុល ជឹម ចាប់អាជីពជាគ្រូបង្រៀននៅថ្ងៃទី ៥ ខែ វិច្ឆិកា ឆ្នាំ ១៩៨០ នៅវិទ្យាល័យបាក់ទូក។ អំឡុងពេលបង្រៀននៅវិទ្យាល័យបាក់ទូក លោកគ្រូត្រូវបានគេផ្តល់ឱកាសឲ្យសិក្សាបំប៉នរយៈពេលខ្លី នៅវិទ្យាល័យព្រះស៊ីសុវត្ថិ នៅអំឡុងពេលវិសមកាលម្តងៗផងដែរ។
នៅឆ្នាំ ១៩៨៣ លោក ភុល ជឹម ត្រូវបានគេផ្ទេរឲ្យមករៀនបំប៉នវគ្គវែងនៅសាលាគរុកោសល្យជាន់ខ្ពស់ ដែលសព្វថ្ងៃត្រូវបានគេស្គាល់ថាជាសាកលវិទ្យាល័យភូមិន្ទភ្នំពេញ (RUPP)។ នៅឆ្នាំ ១៩៨៦ លោក បានប្តូរទៅបង្រៀននៅមជ្ឈមណ្ឌលភូមិភាគគរុកោសល្យនៅអូរបែកក្អម រហូតដល់ចូលនិវត្តន៍ នៅថ្ងៃទី ០១ ខែមករា ឆ្នាំ ២០០៧។
លោកអ្នកអាចទំនាក់ទំនងដោយផ្ទាល់ នៅមន្ទីរពេទ្យឡាសង់តេ (ក្រោយក្រុមហ៊ុន០១២ ម៉ូប៊ីតែល) ឬទូរស័ព្ទទៅលេខសាច់ញាតិផ្ទាល់ តាមរយៈលេខ៖ 077 585 158,010 932 667 ៕
Tag:
គ្រូបង្រៀន
ភុល ជឹម
អប់រំ
© រក្សាសិទ្ធិដោយ thmeythmey.com