អនុប្រធាន CNRP ៖ តំណាងរាស្ត្រ ដែលទៅបរទេស គឺដើម្បីបំពេញភារកិច្ច មិនមែនគេចខ្លួនទេ

ជាតិ

អនុប្រធាន CNRP ៖ តំណាងរាស្ត្រ ដែលទៅបរទេស គឺដើម្បីបំពេញភារកិច្ច មិនមែនគេចខ្លួនទេ

12, Sep 2017 , 8:39 pm

រូបភាព

ដោយ: ថ្មីៗ

ភ្នំពេញ៖ លោកស្រី មូរ សុខហួរ អនុប្រធានគណបក្សសង្គ្រោះជាតិ បានលើកឡើងថា មន្ត្រីជាន់ខ្ពស់និងតំណាងរាស្ត្រមួយចំនួននៃគណបក្សសង្គ្រោះជាតិ ដែលបានចាកចេញពីកម្ពុជា គឺដើម្បីទៅបំពេញភារកិច្ចនៅក្រៅប្រទេស តែមិនមែនជាការគេចខ្លួន នោះទេ។ មន្ត្រីជាន់ខ្ពស់គណបក្សសង្គ្រោះជាតិ ដែលលោកស្រី លើកឡើងថា ទៅបំពេញភារកិច្ចនៅក្រៅប្រទេស មានដូចជា លោក យឹម សុវណ្ណ អ្នកនាំពាក្យ និងលោក អេង ឆៃអ៊ាង អនុប្រធានគណបក្សសង្គ្រោះជាតិ ជាតិ ជាដើម។

ការអះអាងបែបនេះ របស់លោកស្រី មូរ សុខហួរ គឺធ្វើឡើងក្រោយបញ្ចប់សន្និសីទកាសែតស្តីពី ស្ថានការណ៍នយោបាយបច្ចុប្បន្ន នៅកម្ពុជា ដែលរៀបចំឡើងនៅទីស្នាក់ការកណ្តាលគណបក្សសង្គ្រោះជាតិ នាថ្ងៃទី១២ ខែកញ្ញា ឆ្នាំ២0១៧។ ថ្លែងទៅកាន់អ្នកកាសែតមួយក្រុម ដែលតាមសួរ ក្រោយបញ្ចប់សន្និសីទ លោក មូរ សុខហួរ បានបន្ថែមថា ក្រៅពីបំពេញភារកិច្ច មន្ត្រីជាន់ខ្ពស់គណបក្សសង្គ្រោះជាតិផ្សេងទៀត ទៅបរទេស ដើម្បីពិនិត្យសុខភាព។

«[ពួកគាត់] ទៅបំពេញភារកិច្ច ដូចយើងបានឃើញហើយ។ ហើយអ្នកខ្លះ ទៅមើលជំងឺផង»។ នេះជាការបញ្ជាក់របស់លោកស្រី ទៅកាន់អ្នកកាសែត ដែលព្យាយាមសួរពីមន្ត្រីជាន់ខ្ពស់មួយចំនួនក្នុងគណបក្សសង្គ្រោះជាតិ បានចាកចេញពីប្រទេសកម្ពុជា ស្របពេលឯកឧត្តម ឯកឧត្តម កឹម សុខា ត្រូវបានចាប់ខ្លួន។

ថ្មីៗនេះ សម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សប្រជាជនកម្ពុជា បាននិយាយថា មានតំណាងរាស្ត្រម្នាក់នៃគណបក្សសង្គ្រោះជាតិ ដែលពាក់ព័ន្ធនឹងករណីរបស់ឯកឧត្តម កឹម សុខា បានចាកចេញពីកម្ពុជា ដោយឆ្លងដែនចូលទៅទឹកដីថៃ។ ប៉ុន្តែ សម្តេច ហ៊ុន សែន ពុំបានបញ្ចេញឈ្មោះរបស់តំណាងរាស្ត្ររូបនោះឡើយ។ សម្តេច ហ៊ុន សែន អះអាងទៀតថា នៅមានតំណាងរាស្ត្រមួយចំនួនទៀតនៃគណបក្សសង្គ្រោះជាតិ បានចាកចេញពីកម្ពុជា ជាបន្តបន្ទាប់៕