ជាតិ
សម្ដេច ហ៊ុន សែន ៖ កម្ពុជាគ្មានចេតនារករឿងអាមេរិកទេ តែសូមអាមេរិកកុំមើលកម្ពុជាក្នុងកែវភ្នែកអាក្រក់
× ភ្នំពេញ៖ «កម្ពុជាគ្មានចេតនារករឿងអាមេរិកទេ តែសូមអាមេរិកកុំមើលកម្ពុជាក្នុងកែវភ្នែកអាក្រក់» ។ នេះជាការឆ្លើយតបរបស់សម្ដេចនាយករដ្ឋមន្ត្រី ហ៊ុន សែន ដែលនៅតែរក្សាជំហចោទអាមេរិកថា នៅពីក្រោយខ្នងប្រធានគណបក្សសង្គ្រោះជាតិ ឯកឧត្តម កឹម សុខា ទាក់ទងនឹងទោសក្បត់ជាតិ ក្រោមបទចោទ សន្ទិដ្ឋិនិយមជាមួយបរទេស។
សម្ដេច ហ៊ុន សែន បាននិយាយថា មូលហេតុដែលសម្ដេច ហ៊ានចោទអាមេរិកបែបនេះ ក៏ព្រោះតែឯកឧត្តម កឹម សុខា និយាយសារភាពដោយខ្លួនឯង នៅក្នុងវីដេអូឃ្លីបមួយ កាលពីឆ្នាំ២០១៣នោះ។ ជាមួយគ្នានេះប្រមុខរដ្ឋាភិបាល ស្នើឲ្យអាមេរិកចេញមុខបកស្រាយចំពោះការលើកឡើងរបស់ប្រធានគណបក្សសង្គ្រោះជាតិនេះ។
ថ្លែងក្នុងពិធីជួបសំណេះសំណាលជាមួយកម្មកររោងចក្រ នៅសួនឧស្សាហកម្មវឌ្ឍនៈទី១ សម្ដេច ហ៊ុន សែន ក៏បានបញ្ជាឲ្យអគ្គស្នងការនគរបាលជាតិ អគ្គនាយកដ្ឋានអន្តោប្រវេសន៍ និងក្រសួងការបរទេស សហប្រតិបត្តិការអន្តរជាតិ ស៊ើបអង្កេតលើជនជាតិអាមេរិក ដែលសង្ស័យថា ជាចារកម្មបង្កអសន្តិសុខក្នុងប្រទេសកម្ពុជា ជាប់ពាក់ព័ន្ធនឹងព្រឹត្តិការណ៍បាតុកម្ម កាលពីឆ្នាំ២០១៣មកផងដែរ៕
© រក្សាសិទ្ធិដោយ thmeythmey.com