លោក គឹម សុខ បរាជ័យនៅសាលាឧទ្ធរណ៍ ក្នុងការសុំនៅក្រៅឃុំ

ជាតិ

លោក គឹម សុខ បរាជ័យនៅសាលាឧទ្ធរណ៍ ក្នុងការសុំនៅក្រៅឃុំ

15, Sep 2017 , 3:21 pm

រូបភាព

លោកជូង ជូងី មេធាវីការពារក្តីឲ្យលោក គឹម សុខ ផ្តល់បទសម្ភាសដល់ក្រុមអ្នកកាសែត។

ដោយ: ថ្មីៗ

ភ្នំពេញ៖ សំណើរបស់មេធាវី ដែលស្នើទៅសាលាឧទ្ធរណ៍ ដើម្បីទាមទារឲ្យដោះលែង លោក គឹម សុខ អ្នកវិភាគនយោបាយ ត្រូវបានច្រានចោល។ ការច្រានចោលរបស់សាលាឧទ្ធរណ៍ គឺធ្វើឡើងនៅក្នុងសវនាការ នាព្រឹកថ្ងៃទី១៥ ខែកញ្ញា ឆ្នាំ២0១៧នេះ។ លោក គឹម សុខ ត្រូវបានមន្ត្រីពន្ធនាគារ ដឹកទៅកាន់សាលាឧទ្ធរណ៍ ដើម្បីចូលរួមក្នុងសវនាការ។

លោកមេធាវីជូង ជូងី ប្រាប់សារព័ត៌មានថ្មីៗថា ការស៊ើបសង្កេតលើសំណុំរឿងនេះ គឺចប់សព្វគ្រប់ហើយ ដូច្នេះ វា គ្មានភាពចាំបាច់ ក្នុងការឃុំខ្លួនលោក គឹម សុខ ដែលជាកូនក្តីរបស់លោក បន្តទៀត នោះទេ។ លោកមេធាវី សោកស្តាយ ដែលសាលាឧទ្ធរណ៍ មិនបានសម្រេចតាមការទាមទាររបស់លោក។ លោកមេធាវីរូបនេះ ប្រាប់ថា លោក នឹងជជែកជាមួយនឹងលោក គឹម សុខ ដើម្បីបន្តទាមទារនៅតុលាការកំពូល។

ក្នុងអំឡុងខែសីហា ឆ្នាំ២0១៧ កន្លងទៅ សាលាដំបូងរាជធានីភ្នំពេញប្រកាសសាលក្រម ដោយសម្រេចឲ្យ លោក គឹម សុខ ជាប់ពន្ធនគាររយៈពេលមួយឆ្នាំកន្លះ និងតម្រូវឲ្យបង់ប្រាក់ជាង ២សែនដុល្លារ។ សាលាដំបូងរាជធានីភ្នំពេញ បានចោទលោក គឹម សុខ ពីបទ «បរិហារកេរ្តិ៍ជាសាធារណៈ» និងបទ «ញុះញង់ឲ្យមានភាពវឹកវរដល់សន្តិសុខសង្គម»។

សម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សប្រជាជនកម្ពុជា គឺជាដើមបណ្តឹង នៅក្នុងសំណុំរឿងនេះ។ បើតាម គី តិច មេធាវីការពារក្តីឲ្យសម្តេច ហ៊ុន សែន ការដាក់ពាក្យប្តឹង គឺដោយសារតែលោក គឹម សុខ បានចោទគណបក្សប្រជាជនកម្ពុជាថា នៅពីក្រោយខ្នងនៃអំពើឃាតកម្មលើលោក កែម ឡី ដែលជាអ្នកវិភាគនយោបាយ និងជាអ្នកស្រាវជ្រាវខាងការអភិវឌ្ឍសង្គមដ៏ល្បីល្បាយមួយរូប នៅកម្ពុជា៕