សិស្សជាប់បាក់ឌុបនៅវិទ្យាល័យមួយក្នុងខេត្តក្រចេះ សុទ្ធតែបានប្រាក់រង្វាន់ពីលោក គាត ឈន់

ជាតិ

សិស្សជាប់បាក់ឌុបនៅវិទ្យាល័យមួយក្នុងខេត្តក្រចេះ សុទ្ធតែបានប្រាក់រង្វាន់ពីលោក គាត ឈន់

15, Sep 2017 , 9:39 pm

រូបភាព

ដោយ:

ភ្នំពេញ៖ សិស្សនិទ្ទេសAនៃវិទ្យាល័យសិលាវេទីគាត ឈន់ បានទទួលរង្វាន់ជាទឹកប្រាក់ពីលោក គាត ឈន់ អតីតរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ចំនួន១ពាន់ដុល្លារ។ ក្រៅពីសិស្សនិទ្ទេសA សិស្សនិទ្ទេសEដល់B និងលោកគ្រូអ្នកគ្រូនៃវិទ្យាល័យសិលាវេទី គាត ឈន់ ក៏ទទួលបានរង្វាន់ជាទឹកប្រាក់ពីលោក គាត ឈន់ ផងដែរ។

សិស្សដែលប្រឡងជាប់បាក់ឌុបទាំង១០១នាក់នៃវិទ្យាល័យសិលាវេទី គាត ឈន់ បានទទួលរង្វាន់ជាទឹកប្រាក់យ៉ាងច្រើនពីលោក គាត ឈន់ តំណាងរាស្ត្រ និងជាអតីតឧបនាយករដ្ឋមន្ត្រី និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។ នេះបើតាមទំព័រហ្វេសប៊ុករបស់សាលាខេត្តក្រចេះ ដែលផ្សព្វផ្សាយកាលពីថ្ងៃទី១៤ ខែកញ្ញា។

លោក គាត ឈន់ ជាអ្នកនយោបាយចាស់វស្សាដែលមានស្រុកកំណើតក្នុងស្រុកឆ្លូងខេត្តក្រចេះ បានផ្តល់រង្វាន់លើកទឹកចិត្តជាទឹកប្រាក់សម្រាប់សិស្សនិទ្ទេសAចំនួនពីរនាក់ ដោយម្នាក់ៗ ទទួលបាន១ពាន់ដុល្លារសហរដ្ឋអាមេរិក។ ចំណែក សិស្សនិទ្ទេសB ម្នាក់ៗទទួលបានទឹកប្រាក់ចំនួន៥០០ដុល្លារសហរដ្ឋអាមេរិក។ ដោយឡែក សិស្សនិទ្ទេសC ទទួលបាន៣០០ដុល្លារ និទ្ទេសD ទទួលបាន២០០ដុល្លារ ខណៈសិស្សនិទ្ទេសE ម្នាក់ៗទទួលបាន១០០ដុល្លារ។

ក្រៅពីផ្តល់រង្វាន់លើកទឹកចិត្តដល់សិស្សានុសិស្ស លោក គាត ឈន់ ក៏បានជូនថវិកាដល់គ្រូបង្រៀននៅវិទ្យាល័យសិលាវេទីគាត ឈន់ ដែលស្ថិតក្នុងឃុំហានជ័យ ស្រុកឆ្លូងខេត្តក្រចេះ ដោយម្នាក់ទទួលបាន២០០ដុល្លារសហរដ្ឋអាមេរិក។

សូមបញ្ជាក់ថា ខេត្តក្រចេះ មានសិស្សជាប់និទ្ទេសAចំនួន៦នាក់ ខណៈស្រុកឆ្លូងមានសិស្ស ជ័យលាភីនិទ្ទេសAចំនួន២នាក់ គឺ ភួង សុធារី និង អ៊ីវ តែគួង៕