ជាតិ
លោកព្រឹទ្ធាចារ្យ គង់ ណៃ ទទួលបានពានរង្វាន់ជាន់ខ្ពស់ផ្នែកវប្បធម៌ពីប្រទេសជប៉ុន រូបភាពពីហ្វេសប៊ុកក្រសួងវប្បធម៌
× ភ្នំពេញ៖ លោក គង់ ណៃ សិល្បករចាប៉ីដងវែងដ៏ល្បីល្បាញមួយរូប ដែលមានគោរមងារថា ព្រឹទ្ធាចារ្យកោសល្យវោហារ បានទទួលពានរង្វាន់មួយពីប្រទេសជប៉ុន សម្រាប់ឆ្នាំ២0១៧នេះ ដែលមានឈ្មោះថា «ពានរង្វាន់សិល្បៈវប្បធម៌ហ្វុគុអូកា» (Fukuoka Prize)។ នេះបើតាមសេចក្តីជូនដំណឹងរបស់ក្រសួងវប្បធម៌ និងវិចិត្រសិល្បៈ ដែលបង្ហោះនៅលើទំព័រហ្វេសប៊ុក។
ក្រោយធ្វើដំណើរមកដល់កម្ពុជាវិញ នៅរសៀលលថ្ងៃទី១៥ ខែកញ្ញា ឆ្នាំ២0១៧នេះ លោកព្រឹទ្ធាចារ្យ គង់ ណៃ ត្រូវបានក្រសួងវប្បធម៌ រៀបចំពិធីទទួល នៅព្រលានយន្តហោះភ្នំពេញ។ បើយោងតាមកម្មវិធីរបស់ក្រសួងវប្បធម៌ ក្បួនរថយន្ត បានដង្ហែលោកព្រឹទ្ធាចារ្យ គង់ ណៃ ពីព្រលានយន្តហោះភ្នំពេញ ទៅកាន់សាលចតុមុខ។ ក្រសួងវប្បធម៌ បានរៀបចំកម្មវិធីមហោស្រព នៅសាលចតុមុខ ដើម្បីអបអរសាទរ លោកព្រឹទ្ធាចារ្យ គង់ ណៃ។ លើសពីនេះ ក្រសួងវប្បធម៌ ក៏បានធ្វើសន្និសីទកាសែតផងដែរ ជុំវិញលោកព្រឹទ្ធាចារ្យ គង់ ណៃ ទទួលបានពានរង្វាន់ខាងលើ។
ក្រសួងវប្បធម៌ បញ្ជាក់ថា «ពានរង្វាន់ហ្វុគុអូកា» ត្រូវបានបង្កើតឡើងនៅឆ្នាំ១៩៩០ ក្នុងគោលបំណងផ្តល់កិត្តិយសដល់បុគ្គល ក្រុម ឬស្ថាប័នណា ដែលមានស្នាដៃលេចធ្លោ ក្នុងការថែរក្សា និងការបង្កើតនូវវប្បធម៌អាស៊ីមួយ ប្រកបដោយលក្ខណៈពិសេសនិងភាពចម្រុះ ដែលជំរុញឲ្យមានការផ្លាស់ប្តូរវប្បធម៌ទៅវិញទៅមក និងលើកកម្ពស់ការយល់ដឹងអំពីតម្លៃនៃវប្បធម៌អាស៊ី៕
© រក្សាសិទ្ធិដោយ thmeythmey.com