របាយការណ៍៖ ការប្រែប្រួលអាកាសធាតុធ្វើឲ្យការធ្វើដំណើរតាមយន្តហោះកាន់តែគ្រោះថ្នាក់

អន្តរជាតិ

របាយការណ៍៖ ការប្រែប្រួលអាកាសធាតុធ្វើឲ្យការធ្វើដំណើរតាមយន្តហោះកាន់តែគ្រោះថ្នាក់

21, Sep 2017 , 7:39 pm

រូបភាព

ដោយ:

របាយការណ៍ស្រាវជ្រាវថ្មីមួយបង្ហាញថា ការកើនឡើងកម្ដៅផែនដីនឹងធ្វើឲ្យការហោះហើរនិង ដឹកជញ្ជូនតាមយន្តហោះកាន់តែលំបាកក្នុងពេលប៉ុន្មានទស្សវត្សរ៍ខាងមុខ។ ពេលដែលអាកាសធាតុក្ដៅខ្លាំង ចំណុះសាំង ទំនិញដឹកជញ្ជូន និងអ្នកដំណើរនឹងត្រូវកាត់បន្ថយ ហើយជើងហោះហើរក៏ត្រូវផ្អាកដូចគ្នាដែរ។

កំណើនសីតុណ្ហភាពដោយសារការកើនឡើងកម្ដៅផែនដីធ្វើឲ្យយន្តហោះកាន់តែពិបាកហោះឡើងក្នុងរយៈពេលច្រើនទស្សវត្សខាងមុខនេះ។ នេះបើយោងតាម របាយការណ៍សិក្សាមួយរបស់អាមេរិក បន្ទាប់ពីយន្តហោះត្រូវចុះចតជាបន្ទាន់ដោយសារបញ្ហាអាកាសធាតុក្នុងរដ្ឋ Arizona។

ទីភ្នាក់ងារព័ត៌មាន AFP ផ្សាយថា យន្តហោះក្រុមហ៊ុនអាកាសចរណ៍អាមេរិក៤៣គ្រឿងដែលហោះទាំងទៅទាំងមកពីព្រលានយន្តហោះ Phoenix Sky Harbor ត្រូវចុះចតជាបន្ទាន់កាលពីចុងខែមិថុនាកន្លងមកព្រោះតែធាតុអាកាសឡើងក្ដៅដល់៤៩អង្សាឯណោះ។

ពាក់ព័ន្ធបញ្ហានេះ អ្នកវិទ្យាសាស្ដ្រអាមេរិកបានព្រមានថា ប្រសិនជាកម្ដៅផែនដីនៅតែមិនមានភាពថមថយទេនោះ ចំណុះសាំងយន្តហោះ និងបរិមាណទំនិញដឹកជញ្ជូន រួមទាំងអ្នកដំណើរផងនោះនឹងត្រូវកាត់បន្ថយ។ ការកាត់បន្ថយនេះអាចមានរហូតដល់៤ភាគរយដែលស្មើនឹងការ បន្ថយអ្នកដំណើរចន្លោះពី ១២ទៅ១៣ នាក់ក្នុងយន្តហោះជាមធ្យមមានកៅអី ១៦០។

ម្យ៉ាងវិញទៀតនៅពេលអាកាសធាតុក្ដៅខ្លាំង ១០ ទៅ៣០ភាគរយនៃយន្តហោះដែលដឹកទំនិញនិងអ្នកដំណើរពេញៗត្រូវចាំដល់ពេលអាកាសធាតុត្រជាក់សិនទើបហោះបាន។ បើមិនដូច្នោះទេគចាំបាច់ត្រូវកាត់បន្ថយអ្នកដំណើរឬទំនិញដឹកជញ្ជូនសិន។

បើតាមលោកEthan Coffel ជាអ្នកនិពន្ធឆ្នើមនិងជាសិស្សថ្នាក់បណ្ឌិតនៅសាកលវិទ្យាល័យកូឡុំប៊ី ការដាក់កំហិតទៅលើទម្ងន់នៃការដឹកជញ្ជូននឹងធ្វើឲ្យថ្លៃហោះហើរកើនឡើង ថែមទាំងប៉ះពាល់ដល់ប្រតិបត្តិការផលិតយន្តហោះជុំវិញពិភពលោកទៀតផង។

អ្នកវិទ្យាសាស្ដ្រផ្សេងៗទៀតក៏បានអះអាងផងដែរថា ការប្រែប្រួលអាកាសធាតុអាចបណ្ដាលឲ្យមានគ្រោះថ្នាក់ពេលហោះហើរ និងការផ្លាស់ប្ដូរទិសដៅខ្យល់ដែលធ្វើឲ្យការហោះហើរពិបាកនិងត្រូវការពេលយូរ។ ដូចឃើញហើយ ការកើនឡើងនៃកម្រិតទឹកសមុទ្រកំពុងធ្វើឲ្យព្រលានយន្តហោះធំៗមួយចំនួនលិចលង់រួចទៅហើយ៕