អន្តរជាតិ
កូរ៉េខាងជើង អាចបាញ់សាកល្បងគ្រាប់បែកធុនធ្ងន់ជាថ្មី តបនឹងការគំរាមអាមេរិកដែលចង់កម្ទេចខ្លួន
× រដ្ឋាភិបាលក្រុងព្យុងយ៉ាង មានផែនការបាញ់សាកល្បងអាវុធធុនធ្ងន់បរូមាណូជាថ្មីម្តងទៀតនៅក្នុងមហាសមុទ្រប៉ាស៊ីហ្វិក ។ ការប៉ុនប៉ងរបស់ក្រុងព្យុងយ៉ាង បានលេចឡើង ក្រោយពីរដ្ឋាភិបាលក្រុងវ៉ាស៊ីនតោន បានអះអាងជាសកលថា កូរ៉េខាងជើង អាចនឹងត្រូវកម្ទេចក្នុងជម្រើសចុងក្រោយរបស់ខ្លួន បើនៅតែបន្តជ្រើសរើសការអភិវឌ្ឍកម្មវិធីនុយក្លេអ៊ែរ ។
រដ្ឋមន្ត្រីការបរទេសកូរ៉េខាងជើង លោក Ri Yong Ho នៅថ្ងៃ ២១ កញ្ញា បានឲ្យដឹងថា លោកប្រធានាធិបតី Kim Jung Un អាចនឹងពិចារណាក្នុងការបាញ់សាកល្បងគ្រាប់បែកអ៊ីដ្រូសែន ដែលជាប្រភេទគ្រាប់បែកដ៏ខ្លាំងក្លាមួយប្រភេទទៅក្នុងមហាសមុទ្រប៉ាស៊ីហ្វិក ។ នេះបើយោងតាមភ្នាក់ងារព័ត៌មានកូរ៉េខាងត្បូង Yonhap ។
លោករដ្ឋមន្ត្រី បានសង្កត់ធ្ងន់ថា ការបាញ់សាកល្បងគ្រាប់បែកអ៊ីដ្រូសែនលើកនេះ អាចនឹងក្លាយជាការបាញ់សាកល្បងក្នុងកម្រិតខ្លាំងក្លាបំផុតដើម្បីជាការប្រឆាំង និងឆ្លើយតបទៅនឹងរដ្ឋបាលរបស់លោក ដូណាល់ ត្រាំ ។
សេចក្តីថ្លែងការណ៍របស់ប្រមុខការទូតកូរ៉េខាងជើងបែបនេះ ធ្វើឡើងដើម្បីឆ្លើយតបទៅនឹងសំណួររបស់អ្នកសារព័ត៌មាន ដែលបានសួរថាតើ កូរ៉េខាងជើង នឹងមានចំណាត់ការតបវិញបែបណាទៅនឹងការព្រមានរបស់សហរដ្ឋអាមេរិក ទៅលើរបបក្រុងព្យុងយ៉ាងនោះ។
សូមរម្លឹកផងដែរថា ឆ្លៀតឱកាសនៃការផ្តល់សុន្ទរកថាជាលើកដំបូងនៅមហាសន្និបាតអង្គការសហប្រជាជាតិក្នុងនាមជាប្រធានាធិបតីអាមេរិក លោក ដូណាល់ ត្រាំ បានថ្លែងយ៉ាងដូច្នេះថា៖« អាមេរិក មានជំហរ និងការអត់ធ្មត់ខ្លាំង ក៏ប៉ុន្តែប្រសិនបើ ស្ថានភាពត្រូវបង្ខំឲ្យត្រូវការពារខ្លួន និងសម្ព័ន្ធមិត្តខ្លួន អាមេរិក គ្មានជម្រើសអ្វីទៀតឡើយ ក្រៅពីកម្ទេចកូរ៉េខាងជើងនោះ»។
តាមពិតទៅ សេចក្តីថ្លែងការណ៍ក្នុងភាសាធ្ងន់ៗរបស់ប្រធានាធិបតីអាមេរិករូបនេះ ត្រូវបានលេចឡើង នៅក្នុងវេទិការអន្តរជាតិបែបនេះ ក៏ព្រោះតែ កូរ៉េខាងជើង នៅតែបន្តសកម្មភាពដ៏គឃ្លើនក្នុងការបាញ់សាកល្បងអាវុធនុយក្លេអ៊ែរ និងមីស៊ីលអន្តរជាតិទ្វីបជាបន្តបន្ទាប់ ដោយរួមទាំងការបាញ់រំលងប្រទេសជប៉ុនដែលជាសម្ព័ន្ធមិត្តអាមេរិកទៀតផង ។
ការបាញ់សាកល្បងទាំងនេះ ធ្វើឡើងទាំងសហគមន៍អន្តរជាតិ បានថ្កោលទោស និងជាពិសេសនោះ ទាំងក្រុមប្រឹក្សាសន្តិសុខ បានអនុម័តសេចក្តីសម្រេច ដែលជាទណ្ឌកម្មធ្ងន់ធ្ងរជាបន្តបន្ទាប់ប្រឆាំងទៅនឹងកូរ៉េខាងជើងផងដែរ ៕
© រក្សាសិទ្ធិដោយ thmeythmey.com