អន្តរជាតិ
ចិន ផ្តាំកូរ៉េខាងជើង «កុំធ្វើអីឲ្យលើសពីដែនកំណត់»
× រដ្ឋាភិបាលក្រុងប៉េកាំង នៅតែមើលឃើញពីលទ្ធភាពក្នុងការកសាងសន្តិភាព និងដោះស្រាយវិបត្តិនៅក្នុងឧបទ្វីបកូរ៉េ ។ ក៏ប៉ុន្តែ ក្រុងប៉េកាំង ក៏បានដាស់តឿនក្រុងព្យុងយ៉ាងឲ្យប្រយ័ត្នប្រយែងចំពោះសកម្មភាពរបស់ខ្លួន ដោយកុំដើរហួសពីដែនកំណត់ ។
រដ្ឋមន្ត្រីការបរទេសចិន លោក វ៉ាង យី បានថ្លែងក្នុងកិច្ចប្រជុំរបស់មហាសន្និបាតអង្គការសហប្រជាជាតិថា មានតែការចរចាតែមួយប៉ុណ្ណោះនោះទេ ដែលជាមធ្យោបាយដ៏សក្តិសមបំផុតនៅក្នុងការដោះស្រាយវិបត្តិឧបទ្វីបកូរ៉េ ។ លោក វ៉ាង បន្ថែមថា ចិន មិនដែលនឿយហត់នឹងការស្វែងរកសន្តិភាពនៅក្នុងឧបទ្វីបកូរ៉េ ហើយចិន ក៏នៅតែប្តេជ្ញាធានាឲ្យបាននូវការមិនធ្វើនុយក្លេអ៊ែរនីយកម្មឡើយ ។
នៅចំពោះមុខមេដឹកនាំពិភពលោកផ្សេងៗទៀត ប្រមុខការទូតចិន បានរម្លឹកពីការប្រឹងប្រែងរបស់ចិនដោយមិនគិតពីការនឿយហត់តាមរយៈយន្តការនៃតុចរចា«ប្រាំមួយភាគី» ដែលរួមមាន ចិន រុស្ស៊ី អាមេរិក កូរ៉េខាងត្បូង ជប៉ុន និងកូរ៉េខាងជើង ។
យ៉ាងណាក៏ដោយ លោក ក៏បានផ្ញើសារទៅកាន់កូរ៉េខាងជើងយ៉ាងដូច្នេះថា៖«កូរ៉េខាងជើង មិនត្រូវដើរហួសទិសដៅគ្រោះថ្នាក់របស់ខ្លួនឡើយ»។ ជាមួយគ្នានេះ ក្រុងប៉េកាំង ក៏បានទទូចឲ្យសហរដ្ឋអាមេរិក គោរពកិច្ចប្រឹងប្រែងរបស់ខ្លួននៅក្នុងតំបន់ផងដែរ ។
សូមជម្រាបផងដែរថា ជុំវិញបញ្ហានៅក្នុងឧបទ្វីបកូរ៉េនេះដែរ ប្រធានាធិបតីអាមេរិក ក៏បានឆ្លៀតយកកិច្ចប្រជុំមហាសន្និបាតអង្គការសហប្រជាជាតិដើម្បីព្រមានកូរ៉េខាងជើងឲ្យបញ្ឈប់សកម្មភាពអភិវឌ្ឍកម្មវិធីនុយក្លេអ៊ែររបស់ខ្លួនផងដែរ ។ លោកដូណាល់ ត្រាំបានថ្លែងយ៉ាងដូច្នេះ៖ « អាមេរិក មានជំហរ និងការអត់ធ្មត់ខ្លាំង ក៏ប៉ុន្តែប្រសិនបើ ស្ថានភាពត្រូវបង្ខំឲ្យត្រូវការពារខ្លួន និងសម្ព័ន្ធមិត្តខ្លួន អាមេរិក គ្មានជម្រើសអ្វីទៀតឡើយ ក្រៅពីកម្ទេចកូរ៉េខាងជើងនោះ»៕
© រក្សាសិទ្ធិដោយ thmeythmey.com