ជាតិ
រយៈពេល ៣ថ្ងៃ មន្ទីរពេទ្យគន្ធបុប្ផាពិនិត្យព្យាបាលកុមារ និងស្ត្រីជាង ៤ពាន់នាក់
× ភ្នំពេញ៖ រយៈពេល៣ថ្ងៃ នៃពិធីបុណ្យភ្ជុំបិណ្ឌ ចាប់ពីថ្ងៃទី ១៩-២១ កញ្ញានេះ មន្ទីរពេទ្យគន្ធបុប្ផាភ្នំពេញ និងខេត្តសៀមរាប បានទទួលកុមារ និងស្ត្រីជាង ៤០០០នាក់ សម្រាប់ការពិនិត្យ និងសម្រាកព្យាបាល។ នេះបើតាមទំព័រហ្វេសប៊ុកផ្លូវការរបស់លោក បេអាត រិចឆ្នឺរ។
របាយការណ៍មន្ទីរពេទ្យគន្ធបុប្ផាភ្នំពេញ និងខេត្តសៀមរាប បានបង្ហាញថា កុមារ និងស្ត្រី ចំនួន ៤,៧៣៦នាក់ មកទទួលការពិនិត្យ និងសម្រាកព្យាបាល ។ បើតាមហ្វេសប៊ុកលោក បេអាត រិចឆ្នឺ ក្នុងចំណោមកុមារទាំងនោះ មានចំនួន ៣,២៧៧នាក់ ត្រូវបានពិនិត្យព្យាបាលនៅក្នុងផ្នែកពិគ្រោះជំងឺក្រៅនៃមន្ទីរពេទ្យគន្ធបុប្ផា។ ចំណែកកុមារមានជំងឺធ្ងន់ៗ ចំនួន ១០១៧នាក់ ត្រូវបានដាក់ឲ្យសម្រាកព្យាបាលនៅក្នុងមន្ទីរពេទ្យ និងបានវះកាត់បន្ទាន់ដល់កុមារ ចំនួន ៣០ករណីផងដែរ។
បើតាមទំព័រហ្វេសប៊ុកផ្លូវការ របស់លោក បេអាត រិចឆ្នឺរ ដដែល ក្រៅពីពិនិត្យព្យាបាលកុមារនោះ មន្ទីរពេទ្យគន្ធបុប្ផាក៏បានពិនិត្យ និងព្យាបាលជូនស្ត្រីមានផ្ទៃពោះចំនួន ២១៤នាក់ នៅផ្នែកពិគ្រោះជំងឺក្រៅនៃមន្ទីរសម្ភព។ ម្យ៉ាងទៀត រយៈពេល ៣ថ្ងៃនេះ ក៏មានការសម្រាលកូនបានចំនួន ១៩៨នាក់ទៀតផង៕
© រក្សាសិទ្ធិដោយ thmeythmey.com