ជាតិ
ដកហូតឯកសារបរទេសខុសច្បាប់ជាង៧ម៉ឺននាក់ក្នុងនោះវៀតណាម៩៩ភាគរយ
× ភ្នំពេញ៖ ក្រសួងមហាផ្ទៃ បានដកហូតឯកសារខុសច្បាប់ពីជនបរទេស ដែលបានរស់នៅប្រទេសកម្ពុជា ជាង៧ម៉ឺននាក់ ដោយក្នុងនោះមានជនជាតិវៀតណាម ចំនួន៩៩ភាគរយ។
អគ្គនាយកនៃអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ លោក សុខ ផល បាននិយាយថា ជនបរទេសជាងប្រាំពីរម៉ឺននាក់ ដែលសមត្ថកិច្ចបានដកហូតឯកសារមិនត្រឹមត្រូវនោះ មានចំនួន៥សញ្ជាតិ ដោយជនជាតិវៀតណាមមានចំនួន៩៩ភាគរយ។ បើតាមលោក សុខ ផល បន្ទាប់ពីអាជ្ញាធរប្រកាសដកហូតឯកសារមិនប្រក្រតីទាំងនេះហើយ ជនបរទេសទាំងនោះនឹងឲ្យវិលត្រឡប់ទៅកាន់ប្រទេសរបស់ពួកគេវិញ។ ប៉ុន្តែសម្រាប់ជនបរទេសដែលចង់ស្នាក់នៅបន្ត ត្រូវដាក់ពាក្យសុំរៀបចំឯកសារត្រឹមត្រូវ ដើម្បីក្លាយជាជនអន្ដោប្រវេសន៍ស្របច្បាប់។
ថ្លែងប្រាប់អ្នកសារព័ត៌មាន ក្រោយកិច្ចប្រជុំស្តីពីការលុបចោល និងដកហូតឯកសាររដ្ឋបាលកម្ពុជាមិនប្រក្រតីដែលជនបរទេសកំពុងកាន់កាប់ប្រើប្រាស់ នៅព្រឹកថ្ងៃទី៤ តុលានេះ លោក សុខ ផល បានបញ្ជាក់ដូច្នេះថា៖«អ្នកដែលកាន់កាប់ឯកសារមិនប្រក្រតី រហូតមកដល់បច្ចុប្បន្ននេះជាង៧ម៉ឺននាក់ ។ដូចនេះយើងប្រកាសបដិសេធឯកសារទាំងអស់នោះ មាន៦មុខដូចជា សៀវភៅស្នាក់នៅ សៀវភៅគ្រួសារ អត្តសញ្ញាណបណ្ណ និងលិខិតឆ្លងដែនជាដើម យើងបដិសេធចោលទៅដោយធ្វើការដកហូតពីពួកគាត់ ហើយប្រកាសថាឯកសារទាំងអស់នេះពុំមានប្រសិទ្ធិភាពក្នុងការអនុវត្តបន្តទៅទៀតទេ»។
កន្លងមកជនបរទេស ជាង១៩,០០០នាក់ហើយ ដែលអាជ្ញាធរកម្ពុជាចាប់បញ្ជូនទៅប្រទេសរបស់គេវិញ។ នេះបើតាមអគ្គនាយកនៃអគ្គនាយកដ្ឋានអន្តោប្រវេសន៍។
សម្តេច ស ខេង រដ្ឋមន្ត្រីក្រសួងមហាផ្ទៃ បានបញ្ជាឲ្យអាជ្ញាធររឹតបន្តឹង ចំពោះជនអន្តោប្រវេសន៍ ដោយមិនអនុញ្ញាតិឲ្យមន្ត្រីណាម្នាក់ រៀបចំឯកសារមិនត្រឹមត្រូវឲ្យជនបរទេសទៀតនោះឡើយ ។ សម្ដេច ស ខេង បានព្រមានថា ប្រសិនបើរកឃើញមន្ត្រីណាដែលនៅតែបន្តរៀបចំឯកសារឲ្យជនបរទេសខុសច្បាប់ទៀតនោះ បុគ្គល ឬមន្ត្រីនោះនឹងត្រូវមានទោសតាមច្បាប់ជាក់ជាមិនខាន។
រដ្ឋមន្ត្រីក្រសួងមហាផ្ទៃរូបនេះ បានអត្ថាធិប្បាយយ៉ាងដូច្នេះថា៖« ការដែលមានជនអន្តោប្រវេសន៍រស់នៅប្រទេសកម្ពុជា ដោយខុសច្បាប់ និងឯកសារមិនប្រក្រតីនេះ គឺកើតចេញពីមន្ត្រីជាអ្នកផ្តល់ជូនពួកគេ។ ក៏ប៉ុន្តែនាពេលបច្ចុប្បន្ននេះ យើងនឹងមិនបណ្តែតបណ្តោយអោយមន្ត្រីទាំងនោះ បន្តសកម្មភាពតទៀតនោះទេ ដូច្នេះមន្ត្រីទាំងអស់ត្រូវតែអនុវត្តន៍ទៅតាមច្បាប់ ហើយដាក់កំហិតដាច់ខាតចំពោះជនអន្តោប្រវេសន៍ខុសច្បាប់ទាំងនោះ។ ក៏ប៉ុន្តែទោះជាយ៉ាងណាកម្ពុជាមិនអនុវត្តដោយបង្ខំដូចសម័យ ប៉ុល ពត និងសម័យ លន់ ណុល នោះឡើយ»៕
Tag:
សុខ ផល
វៀតណាម
មហាផ្ទៃ
© រក្សាសិទ្ធិដោយ thmeythmey.com