ជាតិ
សេដ្ឋកិច្ច
គណៈកម្មការប្រឹក្សាការងារ នឹងសម្រេចចុងក្រោយលើប្រាក់ខែកម្មករឆ្នាំ២០១៨ រូបថត៖ បេឡាជាតិសន្តិសុខសង្គម(បសស)
× ភ្នំពេញ៖ គណៈកម្មការប្រឹក្សាការងារ នឹងសម្រេចចុងក្រោយលើលើតួលេខប្រាក់ឈ្នួលអប្បបរិមារបស់កម្មករនៅឆ្នាំ២០១៨ នៅថ្ងៃទី៥ តុលា។ ការសម្រេចចុងក្រោយនេះ ធ្វើឡើងបន្ទាប់ពីក្រុមការងារត្រីភាគី បានបញ្ជូនសំណើររបស់ខ្លួនទៅគណៈកម្មការប្រឹក្សាការងារ ដើម្បីកោះប្រជុំអនុម័ត។
បន្ទាប់ពីប្រជុំជាច្រើនលើកច្រើនសារួចមក ក្រុមការងារត្រីភាគី បានសម្រេចយកតួលេខប្រាក់ឈ្នួលអប្បបរិមាណចុងក្រោយរបស់ខ្លួន បញ្ជូនទៅគណៈកម្មការប្រឹក្សាការងារ។ នេះបើតាមទំព័រហ្វេសប៊ុកក្រសួងការងារ និងបណ្តុះបណ្តាលវិជ្ជាជីវៈ ដែលបានផ្សព្វផ្សាយនៅថ្ងៃទី៣ ខែតុលា។
បើតាមទំព័រហ្វេសប៊ុកខាងលើ លទ្ធផលនៃកិច្ចប្រជុំចុងក្រោយនេះ គឺភាគីនិយោជកសម្រេចយកតួលេខ១៦២ដុល្លារ ខាងរដ្ឋាភិបាល បានសម្របសម្រួលយកតួលេខ ១៦៥ដុល្លារ ខណៈខាងសហជីពយកតួលេខ១៧០ដុល្លារ ។ ប៉ុន្តែលទ្ធផលបែបណានោះ គឺវាអាស្រ័យលើការសម្រេចរបស់គណៈកម្មការប្រឹក្សាការងារ ដែលនឹងកោះប្រជុំពិនិត្យលើសំណើររបស់ភាគីនីមួយៗ នៅល្ងាចថ្ងៃទី៥ ខែតុលា។
តែយ៉ាងណាសម្ដេចនាយករដ្ឋមន្ត្រី ហ៊ុន សែន ធ្លាប់បានលើកឡើងថា ប្រាក់ខែគោលរបស់កម្មកររោងចក្រនៅឆ្នាំ២០១៨ខាងមុខនេះ គឺមិនទាបជាង១៦០ដុល្លារឡើយ ។ បើតាមប្រមុខរដ្ឋាភិបាល ប្រាក់ខែជាង១៦០ដុល្លារនេះ គឺភាគីខាងនិយោជកអាចមានលទ្ធភាព ក្នុងការផ្ដល់ជូនកម្មករទូទាំងប្រទេស។
សូមរម្លឹកថា ប្រាក់ឈ្នួលអប្បបរិមាណកម្មករកម្មការិនីក្នុងវិស័យវាយនភណ្ឌ កាត់ដេរ និងផលិតផលស្បែកជើងនៅឆ្នាំ២០១៧នេះ គឺមានចំនួន១៥៣ដុល្លារសហរដ្ឋអាមេរិក៕
Tag:
កម្មករ
ប្រាក់ឈ្នួល
© រក្សាសិទ្ធិដោយ thmeythmey.com