អាគារសាកលវិទ្យាល័យមួយនៅចិន រាងដូចបង្គន់

អន្តរជាតិ

អាគារសាកលវិទ្យាល័យមួយនៅចិន រាងដូចបង្គន់

08, Oct 2017 , 12:59 pm

រូបភាព

ដោយ: ធីតា

សាកលវិទ្យាល័យមួយនៅប្រទេសចិន បានទាក់ទាញការចាប់អារម្មណ៍យ៉ាងខ្លាំង ដោយសំណង់របស់វា មានរាងដូចបង្គន់បេះបិទ ដោយខ្វះតែទុយោបាញ់ទឹក និងប្រអប់ដាក់ក្រដាសតែប៉ុណ្ណោះ។ បើតាមការផ្សាយរបស់ Henan Daily សំណង់នេះ ក្លាយជាប្រធានបទនៃការលេងសើចពេញបណ្តាញសង្គម។

សំណង់ថ្មីមួយនៅសាកលវិទ្យាល័យធនធានទឹក និងថាមពលអគ្គិសនី នៅក្រុង Zhengzhou ខេត្ត Henan ភាគខាងជើងនៃប្រទេសចិន ត្រូវបានសាងសង់រួចរាល់កាលពីឆ្នាំកន្លងមក។ រហូតមកដល់ពេលនេះ ក្រុមនិស្សិតនៅអស់សំណើច ដោយយល់ថា ពួកគេកំពុងតែរៀននៅក្នុងចានបង្គន់មួយ។

ជាអាគារសិក្សាសម្រាប់ជំនាញផ្នែកធនធានទឹក និងថាមពលអគ្គិសនី ប៉ុន្តែសំណង់អាគារដែលជាប់អាគារកម្ពស់១១ជាន់ មើលទៅដូចជាបង្គន់យក្សមួយ។ និស្សិតម្នាក់បានសរសេរនៅលើបណ្តាញសង្គម Weibo ថា៖ «វាពិតជាដូចបង្គន់ខ្លាំងណាស់។ សំណង់បែបនេះ បានធ្វើឲ្យសាកលវិទ្យាល័យរបស់យើងកំពុងមានឈ្មោះល្បីល្បាញលើពិភពលោក»។

យោងតាម Henan Daily អាជ្ញាធរខេត្ត Henan បានចំណាយថវិកាក្នុងខ្ទង់៨៦លានយន់ (ប្រមាណ១៣ លានដុល្លារអាមេរិក) ដើម្បីសាងសង់អាគារបន្ថែមនៅសាកលវិទ្យាល័យធនធានទឹក និងថាមពលអគ្គិសនីក្នុង ក្រុង Zhengzhou សម្រាប់និស្សិតដែលរៀនចប់ ហើយមានបំណងបង្កើតសហគ្រាស។

សម្រាប់ការលើកកម្ពស់ការអភិវឌ្ឍន៍សេដ្ឋកិច្ចនារយៈពេលប៉ុន្មានទសវត្សរ៍ចុងក្រោយនេះ រដ្ឋាភិបាលចិនបានអនុញ្ញាតឲ្យស្ថាបត្យករទាំងអស់ធ្វើសំណង់ទៅតាមការស្រមើស្រមៃរបស់ខ្លួន។ កាលពីឆ្នាំ២០១៤កន្លងមក លោកប្រធានាធិបតីចិន ស៊ី ជិនភីង ក៏បានកោតសរសើរចំពោះស្ថាបត្យកម្មប្លែកៗផងដែរ៕