រដ្ឋាភិបាល សម្រេចដោះស្រាយបញ្ហាដីធ្លីជូនពលរដ្ឋខេត្តកោះកុង កំពង់ស្ពឺ និងព្រះវិហារ

ជាតិ

រដ្ឋាភិបាល សម្រេចដោះស្រាយបញ្ហាដីធ្លីជូនពលរដ្ឋខេត្តកោះកុង កំពង់ស្ពឺ និងព្រះវិហារ

11, Oct 2017 , 8:39 am

រូបភាព

រូបពីហ្វេសប៊ុក៖ លោក ជា សុផារ៉ា រដ្ឋមន្រ្តីក្រសួងរៀបចំដែនដី នគររូបនីយកម្ម និងសំណង់ ដឹកនាំកិច្ចប្រជុំរកដំណោះស្រាយបញ្ហាដីសម្បទាន

ដោយ: ធឿន បញ្ញាឬទិ្ធ

ភ្នំពេញ៖ រដ្ឋាភិបាល បានសម្រេចដោះស្រាយបញ្ហាដីធ្លីជូនពលរដ្ឋ ចំនួន៣ខេត្ត ដែលកំពុងមានវិវាទពាក់ព័ន្ធនឹងដីសម្បទានសេដ្ឋកិច្ច ដំណាំអំពៅផលិតស្ករសនាំចេញទៅក្រៅប្រទេស។ ការសម្រេចរបស់រដ្ឋាភិបាលនេះ ធ្វើឡើងក្រោមកិច្ចប្រជុំអន្តរក្រសួង និងតំណាងអង្គទូតប្រចាំប្រទេសកម្ពុជា។

ខេត្តចំនួន៣ ដែលរដ្ឋាភិបាល សម្រេចដោះស្រាយបញ្ហាវិវាទដីធ្លីនោះ រួមមាន ខេត្តកោះកុង កំពង់ស្ពឺ ព្រះវិហារ ។ ចំណែកដីសម្បទានសេដ្ឋកិច្ចរបស់ក្រុមហ៊ុនផលិតស្ករសនាំចេញចំនួន៣ នៅឧត្តរមានជ័យ ត្រូវបានរដ្ឋាភិបាល ប្រគល់ទៅឲ្យក្រសួងកសិកម្ម រុក្ខប្រមាញ់ និងនេសាទ និងគណៈកម្មាធិការគ្រប់គ្រងដីរដ្ឋខេត្តបន្ទាយមានជ័យ គ្រប់គ្រងនឹងចាត់ចែងជាសមត្ថកិច្ច។

តាមរយៈការសម្រេចរបស់រដ្ឋាភិបាល ដែលមានការចូលរួមរកដំណោះស្រាយពីរដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ លោក ជា សុផារ៉ា , រដ្ឋមន្ត្រីក្រសួងពាណិជ្ជកម្ម ប៉ាន់ សូរសក្តិ និងរដ្ឋមន្ត្រីក្រសួងបរិស្ថាន លោក សាយ សំអាល់ និងឯកអគ្គរដ្ឋទូតសហភាពអឺរ៉ុបប្រចាំកម្ពុជាលោក George Edgar រួមទាំងអភិបាលខេត្តទាំង៤នោះ បានសម្រេចចេញដំណោះស្រាយជូនពលរដ្ឋ តាមរយៈវិធីសាស្ត្រផ្សេងៗគ្នា ។

លោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា

សម្រាប់ពលរដ្ឋខេត្តកោះកុង រដ្ឋាភិបាលសម្រេចបន្តដោះស្រាយបញ្ហាដីធ្លីជូនពលរដ្ឋ ដែលមានវិវាទជាមួយក្រុមហ៊ុន ហេង ហ៊ុយ, ក្រុមហ៊ុន Koh Kong Plantation Co,ltd និងក្រុមហ៊ុន Koh Kong Sugar Industry Co,ltd។

សេចក្តីប្រកាសព័ត៌មានរដ្ឋាភិបាល បានបញ្ជាក់ដូច្នេះថា រដ្ឋាភិបាលនឹងបន្តដោះស្រាយបញ្ហាជូនពលរដ្ឋនៅសល់ចំនួន៩គ្រួសារ ដែលមានវិវាទជាមួយក្រុមហ៊ុន ហេង ហ៊ុយ។ រដ្ឋាភិបាល ទទួលដោះស្រាយប្រជាពលរដ្ឋចំនួន ១៧១គ្រួសារ ដែលមិនទាន់បានដោះស្រាយ ក្នុងចំណោម២០០គ្រួសារ ដែលបានដាក់ពាក្យបណ្ដឹងទៅសហគមន៍អឺរ៉ុប តាមគោលការណ៍ដែលបានព្រមព្រៀងគ្នាជាមួយក្រុមហ៊ុន កាលពីឆ្នាំ២១០៥ នូវទំហំដី៣០០ហិកតា ដែលបានព្រមព្រៀងគ្នារួចជាស្រេច ដោយមួយគ្រួសារត្រូវទទួលបានដីទំហំ១,៥០ហិកតា។ ចំពោះចំណែកដីដែលនៅសល់២៩គ្រួសារ ដែលទទួលបានការដោះស្រាយកន្លងមក ទុកធ្វើជារចនាសម្ព័ន្ធ។

រដ្ឋាភិបាល ទទួលយកមកពិនិត្យនិងស្វែងរកដំណោះស្រាយនូវសំណើររបស់ប្រជាពលរដ្ឋ ១៤០គ្រួសារ ក្នុងចំណោម១៧៥គ្រួសារ ដោយ១៦គ្រួសារ ធ្លាប់បានទទួលការដោះស្រាយរួច និង១៩គ្រួសារមិនទាន់មានលក្ខខណ្ឌគ្រប់គ្រាន់។ ចំណែកពលរដ្ឋចំនួន២១១គ្រួសារ ដែលបានមកបំពេញសលាកបត្រព័ត៌មាន និងគ្មានលក្ខខណ្ឌគ្រប់គ្រាន់នោះ រដ្ឋាភិបាល មិនទទួលយកមកដោះស្រាយឡើយ។

ហ្វេសប៊ុក៖ លោក ប៉ាន់ សូរសក្តិ រដ្ឋមន្រ្តីក្រសួងពាណិជ្ជកម្ម

ចំណែកពលរដ្ឋខេត្តកំពង់ស្ពឺ ដែលមានវិវាទជាមួយក្រុមហ៊ុនភ្នំពេញស៊ូហ្គើ ក្រុមហ៊ុនកំពង់ស្ពឺស៊ូហ្គើរ និងក្រុមហ៊ុនផ្លេនថេសិន នោះអាជ្ញាធរខេត្ត នឹងចុះផ្ទៀងផ្ទាត់ជាមួយសៀវភៅគ្រួសារប្រជាពលរដ្ឋចំនួន១៣គ្រួសារនៅស្រុកថ្ពង និងប្រជាពលរដ្ឋចំនួន១៦៦គ្រួសារ នៅស្រុកឱរ៉ាល់ ដើម្បីកំណត់ពលរដ្ឋដែលរងផលប៉ះពាល់ពិតប្រាកដ ក្នុងការដោះស្រាយ។ អាជ្ញាធរ នឹងបន្តពិនិត្យផ្ទៀងផ្ទាត់សលាកបត្រព័ត៌មាន ដែលក្រុមការងារទទួលបាន ដើម្បីរកអ្នកដែលមិនធ្លាប់ទទួលបានការដោះស្រាយ អ្នកដែលមិនព្រមទទួលយកការដោះស្រាយ ជាដើម។

រូបពីហ្វេសប៊ុក៖ លោក សាយ សំអាល់ រដ្ឋមន្រ្តីក្រសួងបរិស្ថាន

ដោយឡែកអាជ្ញាធរខេត្តព្រះវិហារ និងត្រូវដោះស្រាយបញ្ហាជូនពលរដ្ឋ ដែលមានវិវាទដីធ្លីជាមួយក្រុមហ៊ុនចំនួន៥ ផ្សេងគ្នា ដោយក្នុងនោះ អាជ្ញាធរដោះស្រាយបញ្ហាពលរដ្ឋនៅសល់១១គ្រួសារ និងពិនិត្យដោះស្រាយបញ្ហាពលរដ្ឋ១៤គ្រួសារ ដែលមិនធ្លាប់បានទទួលការដោះស្រាយកន្លងមក។ ជាពិសេសបន្តសម្របសម្រួលជូនជលរដ្ឋ១៨គ្រួសារ ដែលមិនព្រមទទួលយកដំណោះស្រាយ។ រដ្ឋាភិបាលមិនទទួលយកពលរដ្ឋចំនួន២៣០គ្រួសារ ដែលបានបំពេញសលាកបត្រព័ត៌មានឡើយ ដោយសារពលរដ្ឋ៣០គ្រួសារ ធ្លាប់ទទួលបានដំណោះស្រាយកាលពីឆ្នាំ២០១២រួចហើយ រីឯពលរដ្ឋ២០០គ្រួសារទៀត មិនទាក់ទងនឹងវិវាទនេះទេ។ ដោយឡែកសហគមន៍ជនជាតិដើមកួយចំនួន៣សហគមន៍ ដែលសុំចុះបញ្ជីនោះ ក្រសួងនឹងរៀបចំពិនិត្យចាត់ចែងតាមគោលការណ៍នីតិវិធី។

ជុំវិញបញ្ហាវិវាទដីធ្លីនេះ ខាងភាគីសហគមន៍អឺរ៉ុប អង្គការក្រៅរដ្ឋាភិបាល និងក្រសួងពាក់ព័ន្ធ នឹងបន្តកិច្ចសហការដោះស្រាយបញ្ចប់បញ្ហាដីធ្លីទាំងស្រុង របស់ពលរដ្ឋនៅក្នុងខេត្តកោះកុង កំពង់ស្ពឺ និងព្រះវិហារ៕