អន្តរជាតិ
មហាសន្និបាតបក្ស៖ លោក ស៊ី ជិនភីង នឹងកាន់អំណាច៥ឆ្នាំទៀត ឯមេដឹកនាំកំពូល៤រូបចូលនិវត្តន៍
× ប៉េកាំង៖ មហាសន្និបាតលើកទី១៩ នៃគណបក្សកុម្មុយនីស្តចិន ចាប់ផ្ដើមថ្ងៃពុធ ទី១៨ ខែតុលានេះ។ ប្រធានបទសំខាន់ៗជាច្រើននៃមហាសន្និបាតលើកនេះ ស្ថិតក្នុងការតាមដានយ៉ាងយកចិត្តទុកដាក់បំផុត ជាពិសេសការផ្លាស់ប្ដូរថ្នាក់ដឹកនាំតែម្ដង។ ប្រតិភូចំនួន២៣០០នាក់ នឹងត្រូវបោះឆ្នោតជ្រើសរើសសមាជិកគណៈកម្មាធិការមជ្ឈិមបក្សចំនួន២០០នាក់, សមាជិកការិយាល័យនយោបាយចំនួន២៥នាក់, សមាជិកគណៈកម្មាធិការអចិន្ត្រៃយ៍ការិយាល័យនយោបាយនៃគណៈកម្មាធិការមជ្ឈិម និងលេខាបក្ស។
មកត្រឹមមហាសន្និបាតទី១៩ ដែលចាប់ផ្ដើមនៅថ្ងៃទី១៨ ខែតុលា សមាជិកគណៈកម្មាធិការអចិន្ត្រៃយ៍ការិយាល័យនយោបាយចំនួន៤រូប ត្រូវដល់អាយុចូលនិវត្តន៍។ នេះបើតាមបទបញ្ញត្តិមិនផ្លូវការដែលកំណត់អាយុចូលនិវត្តន៍របស់បក្សកុម្មុយនីស្តចិន «៧ឡើង ៨ចុះ» ដែលចែងថា មន្ត្រីបក្សដែលមានអាយុ៦៧ឆ្នាំចុះអាចត្រូវរក្សាតំណែងរបស់ខ្លួនបាន តែមន្ត្រីមានអាយុ៦៨ឆ្នាំឡើងនៅអំឡុងពេលមហាសន្និបាត ត្រូវតែចុះចេញពីតំណែង។
បើតាមបញ្ញត្តិខាងលើ ប្រធានសភាប្រជាជន លោកចាង តេជាំង, ប្រធានសភាពិគ្រោះយោបល់ លោកយូ ជឹងសឹង, លោកលីវ យុនសាន, ប្រធានគណៈកម្មការវិន័យបក្ស លោកវ៉ាង ជីសាន និងឧបនាយករដ្ឋមន្ត្រីទីមួយ លោកចាង កាវលី ដែលសុទ្ធសឹងជាសមាជិកការិយាល័យនយោបាយ និងមានអាយុលើស៦៧ឆ្នាំ គឺត្រូវចូលនិវត្តន៍ទាំងអស់។ ឯប្រធានាធិបតី លោកស៊ី ជិនភីង និងនាយករដ្ឋមន្ត្រី លោកលី ខឹឈាំង មិនទាន់ដល់អាយុចូលនិវត្តន៍នៅឡើយទេ នៅត្រឹមមហាសន្និបាតលើកទី១៩ នេះ។
តាមការគ្រោងទុក ទាំងលោកស៊ី ជិនភីង ទាំងលោកលី ខឹឈាំង នឹងបន្តជាសមាជិកគណៈកម្មាធិការអចិន្ត្រៃយ៍ការិយាល័នយោបាយដដែល ខណៈលោកស៊ី ជិនភីង នឹងបន្តកាន់តំណែងអគ្គលេខាធិការបក្ស៥ឆ្នាំទៀត។ ក្នុងឋានានុក្រមថ្នាក់ដឹកនាំបក្សកុម្មុយនីស្តចិន លោកស៊ី ស្ថិតក្នុងលំដាប់ទីមួយ ឯលោកលី ស្ថិតក្នុងលំដាប់ទីពីរ ហើយតំណែងទាំងពីរនេះតែងតែជាមនុស្សដដែលរយៈពេល១០ឆ្នាំតែម្ដង។
អ្វីគួរឲ្យចាប់អារម្មណ៍នោះ ខណៈដែលមន្ត្រីជាន់ខ្ពស់បួនរូបត្រូវចូលនិវត្តន៍នោះ លោកវ៉ាង ជីសាន ដែលមានឈ្មោះត្រូវចាកចេញដែរនោះ អាចនឹងបន្តអង្គុយកៅអីរបស់ខ្លួនតាមការចង់បានរបស់លោកស៊ី ជិនភីង ។ លោកវ៉ាង ត្រូវគេចាត់ទុកជាដៃស្ដាំរបស់លោកស៊ី និងកំពុងតែដឹកនាំយុទ្ធនាការបោសសម្អាតអំពើពុករលួយតាមគោលនយោបាយរបស់លោកស៊ី។ មន្ត្រីជាច្រើនទាំងអ្នកកាន់តំណែងខ្ពស់ ទាំងអ្នកកាន់តំណែងតូចតាច បានរងពិន័យចំពោះកំហុសមួយនេះ។
ជាមួយតួនាទីនេះ លោកវ៉ាង ពិតជាដៃគូដ៏សំខាន់របស់លោកប្រធានាធិបតីស៊ី។ មានសេណារីយោច្រើនសម្រាប់ករណីនេះ។ លោកវ៉ាង អាចបន្តកាន់តំណែងប្រធានគណៈកម្មការវិន័យបក្ស ឬចាកចេញពីការិយាល័យនយោបាយ ដើម្បីកាន់តំណែងផ្សេងដូចជាប្រធានសភាប្រជាជន ឬក៏ធ្វើជាអនុប្រធានគណៈកម្មការសន្តិសុខវិញ។ ប៉ុន្តែប្រភពពីមន្ត្រីជំនិតបានអះអាងដែរថា លោកវ៉ាង គ្មានបំណងកាន់តំណែងអ្វីទេ និងចង់ចូលនិវត្តន៍វិញ។
ទន្ទឹមនឹងការផ្លាស់ប្ដូរមន្ត្រីកំពូល សមាជិកការិយាល័យនយោបាយក៏ត្រូវផ្លាស់ប្ដូរដែរ ខណៈមន្ត្រីមានប្រជាប្រិយភាពខ្ពស់ដែលអាចប្រជែងជាមួយលោកស៊ី មួយចំនួនត្រូវបានទាត់ចេញពីបក្ស។ មន្ត្រីវ័យក្មេងដែលជាមនុស្សជំនិតរបស់លោកស៊ី នឹងក្លាយជាសមាជិកថ្មីរបស់គណៈកម្មាធិការដែលមានសមាជិក២៥នាក់ ហើយពួកគេខ្លះក៏ជាបេក្ខជនមានសក្តានុពលខ្ពស់ដើម្បីស្នងតំណែងកំពូលនៅរយៈពេល៥ឆ្នាំខាងមុខទៀត៕
Tag:
ចិន
ស៊ី ជិនភីង
មហាសន្និបាតបក្សទី១៩
© រក្សាសិទ្ធិដោយ thmeythmey.com