ជាតិ
សេដ្ឋកិច្ច
ពន្ធដារ ប្រកាសឲ្យក្រុមហ៊ុនចំនួនបី ចូលដោះស្រាយបំណុលពន្ធ
× ភ្នំពេញ៖ អគ្គនាយកដ្ឋានពន្ធដារ បានប្រកាសឲ្យក្រុមហ៊ុនចំនួនបី ចូលដោះស្រាយបំណុលពន្ធ បន្ទាប់ពីនាយកក្រុមហ៊ុនទាំងនោះមិនបានចូលដោះស្រាយ តាមការអញ្ជើញចំនួនបីដងរួចមកហើយ។ នេះបើតាមលិខិតអញ្ជើញរបស់អគ្គនាយកដ្ឋានពន្ធដារ នៅថ្ងៃទី១៨ខែតុលា ដែលត្រូវបានផ្សព្វផ្សាយលើទំព័រហ្វេសប៊ុករបស់ស្ថាប័នមួយនេះ។
ក្រុមហ៊ុនទាំងបីដែលមានក្នុងលិខិតអញ្ជើញរបស់អគ្គនាយកដ្ឋានពន្ធដារនេះ រួមមាន ក្រុមហ៊ុន ប្រូខន អ៊ិនវេសមេន ខូអិលធីឌី ក្រុមហ៊ុនប៊ីលអាប់ (ខេមបូឌា) មេនូហ្វេកឈ័ររីង លីមីធីត និងភោជនីយដ្ឋានប៉ោកី ។
អគ្គនាយកដ្ឋានពន្ធដារ បានទុករយៈពេល ១៥ថ្ងៃបន្ទាប់ពីថ្ងៃចេញលិខិតអញ្ជើញនេះ ឲ្យនាយកក្រុមហ៊ុនទាំងនោះចូលដោះស្រាយបំណុលពន្ធ។ ក្នុងករណីមិនអញ្ជើញមកតាមកាលបរិច្ឆេទនេះទេ នោះនាយកក្រុមហ៊ុនទាំងនោះត្រូវបានចាត់ទុកថាបានប្រព្រឹត្តបទល្មើសព្រហ្មទណ្ឌលើបទបញ្ញត្តិស្ដីពីពន្ធដារ ហើយអគ្គនាយកដ្ឋានពន្ធដារនឹងចាត់វិធានការតាមផ្លូវច្បាប់ ប្ដឹងទៅតុលាការ ដោយរាល់ការចំណាយជាបន្ទុករបស់ក្រុមហ៊ុនដែលជាអ្នកជាប់ពន្ធ។
គួរបញ្ជាក់ថា នេះមិនមែនជាលើកទីមួយទេ ដែលអគ្គនាយកដ្ឋានពន្ធដារចេញលិខិតជាសាធារណៈទៅដល់ក្រុមហ៊ុនដែលមិនបានបង់ពន្ធ។
អគ្គនាយកដ្ឋានពន្ធដារ បញ្ជាក់ថា ការបង់ពន្ធអាករ គឺជាកាតព្វកិច្ចរបស់អ្នកជាប់ពន្ធគ្រប់រូប ដើម្បីរួមចំណែកក្នុងថវិកាជាតិ៕
© រក្សាសិទ្ធិដោយ thmeythmey.com