ពីនេះ ពីនោះ
ព័ត៍មានសុខភាព
ការកង្វះវីតាមីន D ប្រឈមខ្ពស់នឹងជំងឺក្រិនច្រើនកន្លែង (Multiple Sclerosis)
× យោងទៅតាមសេចក្តីរាយការណ៍ពី Guardian បានឲ្យដឹងថា កាលណាក្នុងខ្លួនកង្វះវីតាមីន D វាប្រហែលជាធ្វើឲ្យកើតជាជំងឺក្រិនច្រើនកន្លែង (Multiple Sclerosis) បាន។ រឿងនេះបានមកពីការសិក្សាដ៏ធំមួយដែលបានរកឃើញថា អ្នកដែលមានហ្សែនកង្វះវីតាមីន D ក្នុងខ្លួនមានការប្រឈមខ្ពស់នឹងជំងឺក្រិនច្រើនកន្លែង (Multiple Sclerosis)។
ជំងឺក្រិនច្រើនកន្លែង Multiple Sclerosis (MS) គឺជាជំងឺមួយប្រភេទដែលកើតឡើងដោយសារតែប្រព័ន្ធភាពស៊ាំធ្វើការខុសប្រក្រតី ដោយវាទៅវាយប្រហារទៅលើស្រោមសរសៃប្រសាទក្នុងខួរក្បាល និងខួរឆ្អឹងខ្នង ដែលជាហេតុនាំឲ្យមានអាការៈដូចជា ខ្វាក់ភ្នែក អស់កម្លាំង និងពិបាករក្សាតុល្យភាពរាងកាយ និងធ្វើចលនាមិនត្រូវគ្នា។
រាងកាយរបស់យើងបង្កើតវីតាមីន D នៅក្រោមស្បែកតាមរយៈការធ្វើប្រតិកម្មជាមួយពន្លឺព្រះអាទិត្យ។ យើងក៏អាចទទួលបានវីតាមីននេះតិចតួចដែរតាមរយៈរបបអាហារដូចជា ស៊ុត និងត្រីសម្បូរខ្លាញ់។
ទំនាក់ទំនងរវាងការកង្វះវីតាមីន D និង ការកើនឡើងនៃការប្រឈមនឹងជំងឺ MS ត្រូវបានគេសង្ស័យយូរណាស់មកហើយ ព្រោះថាជំងឺនេះទំនងជាកើតឡើងច្រើនលើតំបន់ដែលមិនសូវមានពន្លឺព្រះអាទិត្យដូចជាប្រទេសស្គុតឡេនខាងជើងតែម្តង។ ប៉ុន្តែវាពិបាកណាស់ក្នុងការអះអាងទៅលើមូលហេតុ និងឥទ្ធិពលរបស់វាដោយសារតែកត្តាផ្សេងៗទៀតចូលរួមច្រើន។
អ្នកច្រើនតែអាចទទួលបានវិតាមីន D គ្រប់គ្រាន់តាមរយៈការប៉ះពាល់ពន្លឺព្រះអាទិត្យមកលើស្បែក និងរបបអាហារ។ ប៉ុន្តែមានមនុស្សខ្លះប្រហែលជាត្រូវការលេបថ្នាំវីតាមីន D បន្ថែមទៀតជាពិសេស មនុស្សអាយុចាប់ពី ៦៥ឆ្នាំឡើងទៅ ឬអ្នកដែលមិនសូវប៉ះពាល់នឹងពន្លឺព្រះអាទិត្យតែម្តង៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com