អន្តរជាតិ
សមាសភាពក្បាលម៉ាស៊ីនដឹកនាំចិនបង្ហាញខ្លួន ដោយលោក ស៊ី ធ្វើលេខាបក្ស៥ឆ្នាំទៀត
× ប៉េកាំង៖សមាសភាពក្បាលម៉ាស៊ីនដឹកនាំថ្មីនៃបក្សកុម្មុយនីស្តបានបង្ហាញខ្លួនចំពោះមុខអ្នកសារព័ត៌មានជាច្រើនរយនាក់។ ដូចការគ្រោងទុក លោក ស៊ី ជិនភីង និងលោក លី ខឺឈាំងបានជាប់ឆ្នោតជាសមាជិកការិយាល័យនយោបាយសមាជិកគណៈកម្មាធិការអចិន្ត្រៃយ៍នៃការិយាល័យនយោបាយ ខណៈលោក ស៊ី ជិនភីងបន្តជាអគ្គលេខាធិការបក្សសម្រាប់រយៈពេល៥ឆ្នាំទៀត។ ថ្នាក់ដឹកនាំសំខាន់៥រូបទៀតដែលភាគច្រើនជាមនុស្សស្និទ្ធលោក ស៊ី ក៏ជាប់សមាជិកគណៈកម្មាធិការអចិន្ត្រៃយ៍ដែរ។
ក្នុងកិច្ចប្រជុំលើកទី១ នៅថ្ងៃទី២៦ ខែតុលា គណៈកម្មាធិការមជ្ឈិមបក្សកុម្មុយនីស្តចិនបានជ្រើសរើសថ្នាក់ដឹកនាំសំខាន់សម្រាប់ដឹកនាំមហាយក្សចិនរយៈពេល៥ឆ្នាំទៅមុខ។
គណៈកម្មាធិការមជ្ឈិមបក្សបានជ្រើសរើសសមាជិកការិយាល័យនយោបាយចំនួន២៥នាក់និងសមាជិកគណៈកម្មាធិការអចិន្ត្រៃយ៍នៃការិយាល័យនយោបាយដែលជាស្ថាប័នដ៏មានអំណាចចំនួន៧នាក់ដែល៥នាក់ជាសមាជិកថ្មី។
អ្វីដែលគួរឲ្យចាប់អារម្មណ៍ គឺសមាជិកថ្មីនៃគណៈកម្មាធិការអចិន្ត្រៃយ៍នៃការិយាល័យដែលជាអ្នកសម្រេចចិត្តខ្ពស់បំផុត។ លោក ស៊ី ជិនភីង និងលោក លី ខឺឈាំងជាសមាជិកចាស់ពីររូបដែលបន្តជាប់ឆ្នោតជាសមាជិកគណៈកម្មាធិការនេះក្នុងអាណត្តិថ្មី។ លោក ស៊ី ជិនភីងត្រូវបានគណៈកម្មាធិការមជ្ឈិមគាំទ្រឲ្យកាន់តំណែងអគ្គលេខាធិការបក្សបន្តទៀតក៏ដូចជាតំណែងប្រធានគណៈកម្មការយោធាមជ្ឈិមដែលបញ្ជាកងទ័ពរំដោះប្រជាជនចិនទាំងមូល។
សមាជិកថ្មីចំនួន៥នៃគណៈកម្មាធិការអចិន្ត្រៃយ៍នៃការិយាល័យនយោបាយមានដូចជាលោក Li Zhanshu, លោកWang Yang, លោក Wang Huning, លោក Zhao Leji, និងលោក Han Zheng ។ អ្នកទាំង៥រូបចូលជំនួសសមាជិកចាស់ដែលចូលនិវត្តន៍មានលោក ចាង តេជាំង, លោក យូ ជឹងសឹង, លោក លីវ យុនសាន,លោក វ៉ាង ជីសាន និងលោក ចាង កាវលី ។ ដោយឡែក លោក Zhao Leji ក៏ជាប់ឆ្នោតជាប្រធានគណៈកម្មការវិន័យបក្សជំនួសលោក វ៉ាង ជីសាន ផងដែរ។
រឿងគួរឲ្យកត់សម្គាល់មួយទៀតគេមិនឃើញមានសមាជិកវ័យក្មេងជាប់ឆ្នោតក្នុងគណៈកម្មាធិការអចិន្ត្រៃយ៍នៃការិយាល័យនយោបាយឡើយ។ សមាជិកទាំង៧ ខាងលើ សុទ្ធតែមានអាយុច្រើនហើយដែលទំនងជាត្រូវចូលនិវត្តន៍នៅមហាសន្និបាតបក្សលើកទី២០ ឆ្នាំ២០២២ ។ ការណ៍នេះជាសញ្ញាបង្ហាញថាបក្សកុម្មុយនីស្តចិនមិនទាន់រៀបចំអនាគតថ្នាក់ដឹកនាំសម្រាប់ស្នងតំណែងលោក ស៊ី ជិនភីង នៅឡើយទេ។
ចំពោះមុខអ្នកសារព័ត៌មាន លោក ស៊ី ជិនភីង បានអរគុណគណៈកម្មាធិការមជ្ឈិមបក្សដែលគាំទ្រលោកនិងសមាជិកទាំង៦ផ្សេងទៀតសម្រាប់តំណែងដ៏សំខាន់នេះ។ លោកចាត់ទុកគាំទ្រនេះជាការយល់ស្របលើនយោបាយដឹកនាំរបស់លោកក៏ដូចជាការលើកចិត្តសម្រាប់រយៈពេលខាងមុខផងដែរ៕
Tag:
19thCPC
ចិន
ស៊ី ជិនភីង
© រក្សាសិទ្ធិដោយ thmeythmey.com