កីឡាអន្តរជាតិ
អន្តរជាតិ
Leicester តែងតាំងអតីតអ្នកចាត់ការ Southampton ជំនួស Shakespeare
× Leicester City បានតែងតាំងអតីតអ្នកចាត់ការទូទៅ Southampton លោក Claude Puel ដើម្បីជំនួសលោក Craig Shakespeare ដែលទើបបញ្ឈប់ពីតំណែងកាលពីសប្តាហ៍មុន។
បើតាម BBC លោក Claude Puel នឹងឡើងកាន់តំណែងអ្នកចាត់ការទូទៅថ្មីដោយចុះកិច្ចសន្យារយៈពេល៣ឆ្នាំឲ្យ Leicister និងក្លាយជាអ្នកចាត់ការទី៣នៅឆ្នាំ២០១៧នេះផង ក្រោយក្លិបបណ្តេញអ្នកចាត់ការ២រូបរួចមក រួមលោក Craig Shakespeare និង Claudio Ranieri ដែលជាអ្នកជួយក្រុមរហស្សនាមគញ្ជ្រោងឈ្នះពាន Premier League លើកដំបូងក្នុងប្រវត្តិសាស្ត្រក្លិបកាលពីរដូវកាល ២០១៥-២០១៦។
ប្រវត្តិដឹកនាំកន្លងមក អ្នកចាត់ការសញ្ជាតិបារាំង វ័យ៥៦ឆ្នាំនេះ និងជាអតីតអ្នកចាត់ការ AS Monaco ធ្លាប់ជួយ Southampton បានចំណាត់ថ្នាក់លេខ៨ ក្នុងក្របខណ្ឌកំពូលអង់គ្លេស និងជួយក្រុមនេះឡើងវគ្គផ្តាច់ព្រ័ត្រពាន EFL Cup ទៀតផងនៅរដូវកាលមុន ប៉ុន្តែត្រូវក្លិបបញ្ចប់តំណែងកាលពីខែមិថុនាកន្លងទៅ។
ជុំវិញការតែងតាំងនេះ អនុប្រធានក្លិប Leicester លោក Aiyawatt Srivaddhanaprabha បានសរសើរ Puel ថាជាអ្នកចាត់ការល្អឥតខ្ចោះ។
លោកថា៖«នៅពេលជួប Claude ការយកចិត្តទុកដាក់របស់គាត់ក្នុងការបង្ហាញពីចំណេះដឹងមកលើក្រុមយើង រួមទាំង ការយល់ដឹងពីសក្តានុពលរបស់យើង និងចក្ខុវិស័យរបស់គាត់ដើម្បីជួយយើង បានធ្វើឲ្យយើងមានការចាប់អារម្មណ៍គាត់យ៉ាងខ្លាំង។ គាត់បានក្លាយជាបេក្ខជនឆ្នើមម្នាក់ ហើយខ្ញុំពិតជារីករាយណាស់ដែលយើងនឹងមានឱកាសពង្រឹងទស្សនវិស័យរយៈពេលវែងរបស់យើងដោយសារជំនាញរបស់គាត់»៕
Tag:
បាល់ទាត់
Leicester City
Claude Puel
© រក្សាសិទ្ធិដោយ thmeythmey.com