ជាតិ
សង្គមជាតិ
ខេត្តកំពង់ស្ពឺ មានពិធីប្រណាំងទូក រយៈពេល ២ ថ្ងៃ នៅសួនច្បារសម្ដេចព្រះសង្ឃរាជ ជួន ណាត រូបពីហ្វេសប៊ុករដ្ឋបាលខេត្តកំពង់ស្ពឺ
× រដ្ឋបាលខេត្តកំពង់ស្ពឺ នឹងរៀបចំពិធីប្រណាំងទូក រយៈពេល ២ថ្ងៃ ពីថ្ងៃទី២៧ ដល់ទី២៨ ខែតុលា ឆ្នាំ២០១៧ ដើម្បីអបអរព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ។ ព្រឹត្តិការណ៍នេះ នឹងរៀបចំឡើង នៅវិមានសម្ដេចព្រះសង្ឃរាជ ជួន ណាត និងតាមបណ្ដោយដងស្ទឹងព្រែកត្នោត នាខេត្តកំពង់ស្ពឺ។
លោក សរ សុពុត្រា អភិបាលរងខេត្តកំពង់ស្ដឺ បានប្រាប់សារព័ត៌មានថ្មីៗ តាមទូរសព្ទថា ការរៀបចំពិធីប្រណាំងទូកនេះ ដើម្បីអបអរ និងផ្ដល់ភាពសប្បាយរីករាយដល់ពលរដ្ឋក្នុងខេត្តកំពង់ស្ពឺ ជាពិសេស ឲ្យប្រជាពលរដ្ឋ បានយល់ដឹងពីទំនៀមទម្លាប់ ប្រពៃណី និងមរតករបស់ខ្មែរ។ លោក សរ សុពុត្រា បន្ថែមថា ក្នុងព្រឹត្តិការណ៍នេះ ក៏មានផ្សព្វផ្សាយពីគ្រោះថ្នាក់ចរាចរណ៍ និងផលប៉ះពាល់របស់គ្រឿងញៀន ដល់យុវជន និងពលរដ្ឋ ឲ្យបានយល់ដឹងផងដែរ។
អភិបាលរងខេត្តរូបនេះ បន្តថា ក្នុងព្រឹត្តិការណ៍នេះ នឹងមានការប្រគុំតន្ត្រីកម្សាន្ត ការតាំងពិព័រណ៍ ការប្រណាំងទូក និងការបាញ់កាំជ្រួច។ លោក សរ សុពុត្រា បញ្ជាក់ប្រាប់សារព័ត៌មានថ្មីៗថា ការប្រណាំងទូកនេះ មានការចូលរួមពីមន្ទីរ ស្ថាប័ន និងប្រជាពលរដ្ឋទូទាំងខេត្តនេះផ្ទាល់។ ជាមួយគ្នានេះ ក្នុងព្រឹត្តិការណ៍នេះ មានទូកចូលរួមប្រណាំងចំនួន ៣៣ទូក ដោយទូកខ្នាតអន្តរជាតិ មានចំនួន ៤ទូកផងដែរ។
នេះជាព្រឹត្តិការណ៍ទី៤ហើយ ដែលរដ្ឋបាលខេត្តកំពង់ស្ពឺ សហការជាមួយ សហភាពសហព័ន្ធយុវជនកម្ពុជាខេត្ត ដើម្បីរៀបចំកម្មវិធីនេះ។ បន្ថែមលើនេះ កាលពីឆ្នាំ២០១៦កន្លងទៅ ព្រឹត្តិការណ៍នេះ មានប្រជាពលរដ្ឋចូលរួមកម្សាន្តជាង ១លាននាក់។ លោក សរ សុពុត្រា សង្ឃឹមថា ពិធីប្រណាំងទូកក្នុងឆ្នាំនេះ នឹងមានអ្នកចូលរួមច្រើនជាងឆ្នាំមុន ព្រោះឆ្នាំនេះ មានកម្មវិធីកម្សាន្តសប្បាយប្លែកៗ និងកាន់តែធំជាងឆ្នាំមុន។
សូមបញ្ជាក់ថា នាថ្ងៃទី០២-០៤ ខែវិច្ឆិកា ជាថ្ងៃនៃព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ រដ្ឋបាលខេត្តកំពង់ស្ពឺ នឹងរៀបចំការប្រគំតន្ត្រី និងការបាញ់កាំជ្រួញ រយៈពេល៣ថ្ងៃ បន្ថែមទៀតផងដែរ៕
Tag:
កំពង់ស្ពឺ
អុំទូក
សរ សុពុត្រា
© រក្សាសិទ្ធិដោយ thmeythmey.com