កម្ពុជាបានកំណត់ត្រាពិភពលោក ចំពោះសិក្ខាសាលាធុរកិច្ចដែលមានអ្នកចូលរួមច្រើន

ជាតិ

កម្ពុជាបានកំណត់ត្រាពិភពលោក ចំពោះសិក្ខាសាលាធុរកិច្ចដែលមានអ្នកចូលរួមច្រើន

30, Oct 2017 , 5:30 pm

រូបភាព

ដោយ:

ភ្នំពេញ៖ កម្ពុជាបំបែកកំណត់ត្រាពិភពលោក (Guinness World Records) លើសិក្ខាសាលាស្ដីពីធុរកិច្ចដែលមានលក្ខណៈអនុវត្តជាក់ស្ដែងធំបំផុតក្នុងពិភពលោក (New World Record for The Largest Practical Business Seminar)។ នេះបើតាមព័ត៌មានដែលផ្សព្វផ្សាយដោយគេហទំព័ររបស់ហ្គីណេស។

កាលពីថ្ងៃទី២៤ខែសីហាឆ្នាំនេះ នៅរាជធានីភ្នំពេញ ក្រសួងអប់រំ យុវជន និងកីឡា បានរៀបចំសិក្ខាសាលាមួយដើម្បីបំបែកំណត់ត្រាពិភពលោក។ សិក្ខាសាលានោះ គឺស្ដីពីសហគ្រិនភាពសម្រាប់យុវជនកម្ពុជា ដែលមានអ្នកចូលរួម ២៣០៤នាក់ ដែលមានអាយុចាប់ពី ១៥ឆ្នាំ ដល់ ២៩ឆ្នាំមកពីទូទាំងប្រទេស។ បើតាមសេចក្ដីប្រកាសព័ត៌មានរបស់ក្រសួងអប់រំ ហ្គីណេសបានទទួលស្គាល់ជាផ្លូវការនូវកំណត់ត្រាថ្មីសម្រាប់សិក្ខាសាលានេះ នៅថ្ងៃទី៥ខែតុលា ដែលកំណត់ត្រានេះត្រូវបានផ្ដល់ជូនក្រសួងអប់រំ។

កំណត់ត្រាដែលកម្ពុជាទទួលបាននេះ បានបំបែកកំណត់ត្រាចាស់ ដែលរៀបចំឡើងក្នុងប្រទេសឥណ្ឌូនេស៊ី កាលពីឆ្នាំ២០១៦ ដែលមានអ្នកចូលរួមចំនួន ១២៣១នាក់ ចំពោះសិក្ខាសាលាប្រភេទដូចគ្នានេះ។

គួរបញ្ជាក់ថា សិក្ខាសាលាស្ដីពីសហគ្រិនភាពសម្រាប់យុវជនកម្ពុជា ដែលចូលក្នុងកំណត់ត្រាពិភពលោកនេះ ត្រូវបានរៀបចំឡើង ដើម្បីលើកកម្ពស់ការយល់ដឹងរបស់យុវជនពីសហគ្រិនភាព ដែលជាផ្លូវឆ្ពោះទៅរកការងារសមរម្យ និងជំរុញអ្នកចាប់អារម្មណ៍ក្នុងផ្នែកនេះ ឲ្យស្វែងយល់ពីសក្ដានុពលរបស់ខ្លួន និងចេះត្រៀមខ្លួន៕