អន្តរជាតិ
លោក ត្រាំ នឹងជំរុញតុល្យភាពពាណិជ្ជកម្ម និងរំសាយនុយក្លេអ៊ែរកូរ៉េខាងជើងពេលទស្សនកិច្ចនៅចិន រូបភាព៖ Xinhua
× មន្ត្រីជាន់ខ្ពស់ក្រុងវ៉ាស៊ីនតោនបានបញ្ជាក់ ប្រធានាធិបតី ដូណាល់ ត្រាំ នឹងជជែកពិភាក្សាពីទំនាក់ទំនាក់សេដ្ឋកិច្ចរវាងចិននិងអាមេរិកពេលដែលលោកជួបជាមួយសមភាគីចិនលោក ស៊ី ជិនភីង នៅក្នុងដំណើរទស្សនកិច្ចផ្លូវការនៅប្រទេសចិនថ្ងៃទី ៨ខែវិច្ឆិកាខាងមុខ។ ប្រធានាធិបតី នឹងប្រឹងប្រែងដើម្បីធានាឲ្យមានតុល្យភាពពាណិជ្ជកម្មទ្វេភាគី និងដោះស្រាយបញ្ហាកូរ៉េខាងជើងផង។
ឧបការីរងប្រធានាធិបតី និងជានាយករងក្រុមប្រឹក្សាសេដ្ឋកិច្ចជាតិ Everett Eissenstat បានថ្លែងក្នុងសន្និសីទសារព័ត៌មានតាមទូរសព្ទថ្ងៃចន្ទទី ៣០ ខែវិច្ឆិកាថា លោក ដូណាល់ ត្រាំ លើកយកបញ្ហាសេដ្ឋកិច្ចពាណិជ្ជកម្មទៅពិភាក្សាជាមួយសមភាគីចិនលោក ស៊ី ជិនភីង។
«ស្ថិតក្នុងប្រទេសចិន ប្រធានាធិបតីត្រាំ នឹង ស្វះស្វែងធ្វើយ៉ាងណាលើកស្ទួយ និងធ្វើឲ្យមានតុល្យភាពក្នុងទំនាក់ទំនងពាណិជ្ជកម្មជាមួយចិន។ ដើម្បីរក្សាបាននូវពាណិជ្ជកម្មទ្វេភាគីយូរអង្វែង ចិនត្រូវរក្សាបាននូវអនុវត្តច្បាប់ត្រឹមត្រូវ យុត្តិធម៌ និងផ្តល់ប្រយោជន៍គ្នាទៅវិញទៅមកដល់ក្រុមហ៊ុនអាមេរិក និងបញ្ឈប់ការអនុវត្តពាណិជ្ជកម្ម និងការវិនិយោគមិនត្រឹមត្រូវ។ រយៈពេលប៉ុន្មានឆ្នាំនេះ យើងឃើញមានការលំបាក និងការយឺតយ៉ាវរបស់ចិនក្នុងការដើរឆ្ពោះទៅរកសេដ្ឋកិច្ចទីផ្សារសេដ្ឋកិច្ច»។ លោក Everett Eissenstat បានថ្លែងដូច្នេះ។
លោកបានបន្ថែមថា ក្នុងពេលនោះលោក ត្រាំ នឹងឆ្លៀតឱកាសស្នើឲ្យចិនបន្តគោរពតាមគោលការណ៍ជាសមាជិកអង្គការពាណិជ្ជកម្មពិភពលោក និងធានាឲ្យបាននូវតុល្យភាពនៃទំនាក់ទំនងពាណិជ្ជកម្មជាមួយអាមេរិកផង។
ពាក់ព័ន្ធបញ្ហាទំនាក់ទំនងពាណិជ្ជកម្មទ្វេភាគីរវាងចិន និងអាមេរិក ឯកអគ្គរដ្ឋទូតចិនប្រចាំក្រុងវ៉ាស៊ីនតោនលោក Cui Tiankai យល់ឃើញថា វត្តមានលោក ត្រាំ នៅចិននឹងនាំមកនូវលទ្ធផលគាប់ប្រសើរច្រើនជាពិសេសពង្រឹងកិច្ចសហប្រតិបត្តិការ និងធ្វើឲ្យចំណងសេដ្ឋកិច្ច និងពាណិជ្ជកម្មកាន់តែស៊ីជម្រៅផង។
បើតាមសារព័ត៌មានចិន South China Morning Post លោក Cui Tiankai បានថ្លែងដូច្នេះ៖ «ខ្ញុំមានទំនុកចិត្តថា វានឹងមានលទ្ធផលល្អលើបញ្ហាសេដ្ឋកិច្ច និងពាណិជ្ជកម្ម។ ពាណិជ្ជកម្មដែលើសក្នុងរយៈពេលវែងមិនជួយសេដ្ឋកិច្ចចិនឡើយ ហើយវាប្រហែលធ្វើឲ្យប៉ះពាល់សេដ្ឋកិច្ចចិនទៀត។ យើងចង់មានទំនាក់ទំនងពាណិជ្ជកម្មដែលមានតុល្យភាពដែរ»។
ក្រៅពីបញ្ហាពាណិជ្ជកម្ម លោក Cui រំពឹងថា លោក ស៊ី ជិនភីង និងលោក ដូណាល់ ត្រាំ នឹងមានលទ្ធភាពសម្រេចបាននូវកិច្ចព្រមព្រៀងច្រើនជាពិសេសគឺរំសាយអាវុធនុយក្លេអ៊ែរនៅឧបទ្វីបកូរ៉េ និងកំណត់ផ្លូវដែលអនុញ្ញាតឲ្យភាគីទាំងពីរអាចដោះស្រាយបញ្ហានេះរួមគ្នាបាន។
ក្នុងដំណើរទស្សនកិច្ចមកកាន់អាស៊ីលើកនេះ បញ្ហានុយក្លេអ៊ែរកូរ៉េខាងជើងជាប្រធានបទសំខាន់ស្ថិតក្នុងចិត្តប្រធានាធិបតី។ លោកត្រៀមយកបញ្ហានេះទៅជជែកជាមួយលោក ស៊ីនហ្សូ អាបេ នាយករដ្ឋមន្ត្រីជប៉ុន ប្រធានាធិបតីកូរ៉េខាងត្បូងលោក មូន ចេអ៊ីន និងប្រធានាធិបតីចិន លោក ស៊ី ជិនភីង ផងដែរ។
រយៈពេលប៉ុន្មានខែចុងក្រោយនេះស្ថានការណ៍ជារួមនៅឧបទ្វីបកូរ៉េកាន់តែតានតឹងខ្លាំង ដោយមេដឹកនាំកូរ៉េខាងជើង គីម ជុងអ៊ុន និងលោក ត្រាំ បន្តសង្គ្រាមពាក្យសម្តីទៅវិញទៅមក។ មេដឹកនាំអាមេរិកបានគំរាមប្រើប្រាស់កម្លាំងទ័ពដើម្បីកម្ទេចរបបដឹកនាំកូរ៉េខាងជើង ខណៈដែលកូរ៉េខាងជើងអួតអាងថាខ្លួនមានមីស៊ីលដែលបាញ់ដល់ទឹកដីអាមេរិកថែមទៀតផង។
បើតាមសម្តីឧបការីរងប្រធានាធិបតីអាមេរិក និងជានាយកទទួលបន្ទុកកិច្ចការងារអាស៊ីបូព៌ាលោក Matt Pottinger ក្នុងសន្និសីទសារព័ត៌មានថ្ងៃចន្ទដដែល លោក ដូណាល់ ត្រាំ ក៏នឹងយកឱកាសនោះជំរុញឲ្យចិនប្រឹងប្រែងដោះស្រាយបញ្ហាកូរ៉េខាងជើងផងដែរ។ ក្រុងវ៉ាស៊ីនតោនជឿជាក់ថា មហាយក្សចិនមានឥទ្ធិពលខ្លាំងលើកូរ៉េខាងជើង និងជាខ្នងបង្អែកដ៏ធំមួយរបស់កូរ៉េខាងជើងដែរ។ ចិនចង់ឲ្យចិនដាក់ចំណាត់ការតឹងរ៉ឹងដើម្បីដាក់គំនាមកូរ៉េខាងជើងផង និងកាត់ផ្តាច់លំហូរហិរញ្ញវត្ថុដែលជាខ្យល់ដង្ហើមរបបដឹកនាំ គីម ជុងអ៊ុនផងនោះ។
សូមបញ្ជាក់ប្រធានាធិបតី ដូណាល់ ត្រាំ នឹងចាប់ផ្តើមដំណើរទស្សនកិច្ចមកកាន់តំបន់អាស៊ីជាលើកដំបូងនៅថ្ងៃ ៣ វិច្ឆិកាខាងមុខ។ ដំណើរទស្សនកិច្ចរបស់លោក ត្រាំ ផ្តើមនៅប្រទេសជប៉ុន មុនបន្តទៅកូរ៉េខាងត្បូង ចិន វៀតណាម និងហ្វីលីពីន។ រដ្ឋហាវ៉ៃជាគោលដៅចុងក្រោយនៃដំណើរទស្សនកិច្ចរបស់លោក ត្រាំ៕
Tag:
ដូណាល់ ត្រាំ
ស៊ី ជិនភីង
Everett Eissenstat
Matt Pottinger
© រក្សាសិទ្ធិដោយ thmeythmey.com