ជាតិ
មហាផ្ទៃ សម្រេចផ្អាកសកម្មអង្គការសហព័ន្ធនិស្សិតបញ្ញវ័ន្តកម្ពុជា
× ភ្នំពេញ៖ ក្រសួងមហាផ្ទៃ បានសម្រេចផ្អាកសកម្មភាព អង្គការសហព័ន្ធនិស្សិតបញ្ញវ័ន្តកម្ពុជា ដែលបានធ្វើសកម្មភាពបំពាននឹងច្បាប់សមាគម និងអង្គការមិនមែនរដ្ឋាភិបាល និងលក្ខន្តិកៈរបស់អង្គការដែលតម្កល់ទុកនៅក្រសួងមហាផ្ទៃ។
តាមរយៈលិខិតដែលចុះហត្ថលេខាដោយសម្ដេច ស ខេង រដ្ឋមន្ត្រីក្រសួងមហាផ្ទៃ បានពន្យល់ហេតុផលដូច្នេះ៖«ផ្អែកតាមបទប្បញ្ញត្តិ មាត្រា៣០ នៃច្បាប់ស្តីពីសមាគម និងអង្គការមិនមែនរដ្ឋាភិបាល និងអំពើបំពានខាងលើនេះ ក្រសួងមហាផ្ទៃសម្រេចផ្អាកសកម្មភាព អង្គការសហព័ន្ធនិស្សិតបញ្ញវ័ន្តកម្ពុជា ជាបណ្ដោះអាសន្ន ក្នុងរយៈពេល៦០ថ្ងៃ គិតចាប់ពីថ្ងៃជូនដំណឹងនេះតទៅ»។
បន្ថែមពីនេះក្រសួងមហាផ្ទៃ បានបង្គាប់ឲ្យអង្គការមួយនេះ ជូនដំណឹងជាលាយលក្ខណ៍អក្សរអំពីលេខគណនីសម្រាប់ប្រតិបត្តិការ និងត្រូវផ្ដល់របាយការណ៍បូកសរុបសកម្មភាពការងារ និងហិរញ្ញវត្ថុដល់ក្រសួងមហាផ្ទៃផងដែរ។ ជាមួយគ្នានេះក្រសួងមហាផ្ទៃ បានប្រាប់ឲ្យអង្គការសហព័ន្ធនិស្សិតបញ្ញវ័ន្តកម្ពុជា ធ្វើសកម្មភាពឲ្យបានអព្យាក្រឹត្យចំពោះគ្រប់គណបក្សនយោបាយ ឲ្យបានត្រឹមត្រូវតាមលក្ខន្តិកៈរបស់អង្គការ និងស្របតាមច្បាប់ស្តីពីសមាគម និងអង្គការមិនមែនរដ្ឋាភិបាល ក្នុងអំឡុងដែលផ្អាកសកម្មភាពបណ្ដោះអាសន្ននេះ។
ការផ្អាកសកម្មភាពរបស់អង្គការសហព័ន្ធនិស្សិតបញ្ញវ័ន្តកម្ពុជា ធ្វើឡើងក្រោយពេលដែលលោក ឡេង សេងហុង ប្រធានអង្គការមួយនេះ ត្រូវបានតំណាងអយ្យការអមសាលាដំបូងរាជធានីភ្នំពេញ លោក សៀង សុខ បានចេញដីការបង្ហាញខ្លួន នៅនាយកដ្ឋានសន្តិសុខផ្ទៃក្នុង នៃអគ្គស្នងការដ្ឋាននគរបាលជាតិ ឲ្យបានមុខថ្ងៃទី៣០ វិច្ឆិកាខាងមុខនេះ ដើម្បីសាកសួរបំភ្លឺលើករណី«ញុះញុងឲ្យប្រព្រឹត្តបទឧក្រិដ្ឋជាអាទិ៍»។ ការចេញដីកាឲ្យលោក ឡេង សេងហុង បង្ហាញខ្លួន ដោយសារតែប្រធានអង្គការរូបនេះ បានអំពាវឲ្យក្រុមនិស្សិត ព្រះសង្ឃ និងប្រជាពលរដ្ឋទូទាំងប្រទេស ត្រៀមធ្វើបាតុកម្មអហិង្សា ប្រសិនជាគណបក្សសង្គ្រោះជាតិត្រូវបានរំលាយ៕
© រក្សាសិទ្ធិដោយ thmeythmey.com