ជាតិ
សង្គមជាតិ
អុំទូក៖ សមត្ថកិច្ច មមាញឹកក្នុងការរក្សាសុវត្ថិភាព និងសណ្ដាប់ធ្នាប់ដល់ពលរដ្ឋ
× ភ្នំពេញ៖ ថ្ងៃទី២ វិច្ឆិកានេះ គឺថ្ងៃដំបូងនៃការប្រារព្វពិធីបុណ្យអុំទូក បណ្ដែតប្រទីត និងសំពះព្រះខែ អកអំបុក ។ មកដល់ពេលនេះប្រជាពលរដ្ឋទាំងក្នុងរាជធានីភ្នំពេញ និងមកពីបណ្ដាខេត្តនានា បាននាំគ្នាសម្រុកដើរកម្សាន្តនៅទីតាំងតាមផ្លូវមាត់ទន្លេ មុខព្រះបរមរាជវាំង មជ្ឈមណ្ឌលកម្សាន្តកោះពេជ្រ និងទីតាំងត្រើយម្ខាង នាថ្ងៃបុណ្យអំទូកនេះ។ ខណៈដែលពលរដ្ឋសម្រុកមកកម្សាន្តក្នុងពិធីបុណ្យជាតិនេះ សមត្ថកិច្ច និងក្រុមកងកម្លាំងជាច្រើននាក់ ក៏មមាញឹកក្នុងការរក្សាសន្តិសុខ និងសណ្ដាប់ធ្នាប់ ដើម្បីធានាសុវត្ថិភាពដល់ពលរដ្ឋផងដែរ។
សូមទស្សនាវីដេអូនៃសកម្មភាពសមត្ថកិច្ចរក្សាសណ្ដាប់ធ្នាប់ខាងក្រោមនេះ៖
កន្លងមកលោក ចាន់ ស៊ីថា ប្រធានអង្គភាពអន្តរាគមន៍ នៃអគ្គស្នងការដ្ឋាននគរបាលជាតិ បាននិយាយថា អង្គភាពអន្តរាគមន៍បានត្រៀមកម្លាំង៣ពាន់នាក់ សម្រាប់ល្បាត ថែរក្សាសុវត្ថិភាព សន្តិសុខ សណ្ដាប់ធ្នាប់ និងសង្គ្រោះ នៅថ្ងៃនៃព្រះរាជពិធីបុណ្យអុំទូក អកអំបុក និងសំពះព្រះខែ ដែលនឹងប្រព្រឹត្តទៅនៅថ្ងៃទី២-៤ ខែវិច្ឆិកា ។
«នគរបាលអន្តរាគមន៍ត្រៀមកម្លាំង ២៤ម៉ោងលើ២៤ម៉ោង ដើម្បីការពារសុវត្ថិភាព សន្តិសុខ សណ្ដាប់ធ្នាប់ និងទប់ស្កាត់រាល់បទល្មើសផ្សេងៗនៅថ្ងៃព្រះរាជពិធីបុណ្យអុំទូក […] រួមទាំងត្រៀមខ្លួនចេញប្រតិបត្តិការជានិច្ចក្នុងការ ការទប់ស្កាត់អំពើភេរវម្ម និងបាតុកម្មផ្សេងៗ បន្ទាប់ពីមានបទបញ្ជារបស់រាជរដ្ឋាភិបាល»។ នេះតាមការអះអាងរបស់លោក ចាន់ ស៊ីថា ។
លោក ចាន់ ស៊ីថា បន្ថែមទៀតថា ក្រៅពីត្រៀមកម្លាំង អង្គភាពអន្តរាគមន៍ បានត្រៀមនូវរថយន្តប្រឆាំងភេរវកម្មចំនួន១០គ្រឿង រថយន្តទប់ស្កាត់បាតុករចំនួន៤គ្រឿង រថយន្តអគ្គីភ័យចំនួន៤គ្រឿង រថយន្តសង្គ្រោះទូទៅចំនួន៣គ្រឿង ម៉ូតូល្បាតគ្រប់ទិសដៅចំនួន២០គ្រឿង និងរថយន្តក្រុងចំនួន៨គ្រឿង។
គួររម្លឹកថា លោក ថោង លីម អគ្គស្នងការរងនគរបាលជាតិ បានត្រៀមកម្លាំងជាង២ម៉ឺននាក់ ដើម្បីថែរក្សាការពារសុវត្ថិភាព សន្តិសុខ សណ្ដាប់ធ្នាប់ ការពារទប់ស្កាត់អំពើចោរកម្ម ឬជនឆ្លៀតឱកាស ដែលប្រព្រឹត្តអំពើលួច ប្លន់ ទៅលើភ្ញៀវជាតិ-អន្តរជាតិ ហើយនិងបានត្រៀមរថយន្តពេទ្យ រថយន្តពន្លត់អគ្គីភ័យរាប់រយគ្រឿងផងដែរ នៅថ្ងៃព្រះរាជពិធីបុណ្យអុំទូកខាងមុខនេះ៕
© រក្សាសិទ្ធិដោយ thmeythmey.com