ជាតិ
រាជរដ្ឋាភិបាល នឹងធានាប្រតិបត្តិការសម្អាតសំណល់ជាតិផ្ទុះ បើអាមេរិកផ្តាច់ជំនួយមែន
× រាជរដ្ឋាភិបាលកម្ពុជា នឹងធានារ៉ាប់រងផ្ដល់ជំនួយជំនួសអាមេរិកក្នុងការបោសសម្អាតសំណល់ជាតិផ្ទុះពីសង្គ្រាមអាមេរិក ប្រសិនបើក្រសួងការបរទេសអាមេរិក ផ្តាច់ជំនួយក្នុងប្រតិបត្តិការនេះ។ លោក ហេង រតនា អគ្គនាយកស៊ីម៉ាក ថ្លែងដូច្នេះប្រាប់សារព័ត៌មានថ្មីៗ មុននឹងបន្តឲ្យដឹងថា ជំនួយរបស់អាមេរិកផ្តល់ដល់ស៊ីម៉ាកក្នុងមួយឆ្នាំៗ មានទឹកប្រាក់ពី២លាន ទៅ២,១ លានដុល្លារ ។
រាជរដ្ឋាភិបាលកម្ពុជា នឹងធានារ៉ាប់រងផ្ដល់ជំនួយជំនួសអាមេរិកក្នុងការបោសសម្អាតសំណល់ជាតិផ្ទុះពីសង្គ្រាមអាមេរិក។ នេះជាការបញ្ជាក់របស់លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថាស៊ីម៉ាក ប្រាប់ដល់សារព័ត៌មានថ្មីៗ ក្នុងក្របខណ្ឌដែលលោកបានទទួលព័ត៌មានថាអាមេរិកផ្តាច់ជំនួយដល់ស៊ីម៉ាក។ លោក ហេង រតនា ថ្លែងដូច្នេះ៖«រាជរដ្ឋាភិបាលកម្ពុជានឹងផ្ដល់ជំនួយជំនួស អាមេរិកនេះ ក្នុងការធានារ៉ាប់រងថវិកាទាំងស្រុងកិច្ចប្រតិបត្តិការរបស់ស៊ីម៉ាក់ឲ្យនៅដដែល ដើម្បីបោសសម្អាតគ្រាប់សំណល់ជាតិផ្ទុះពីសង្គ្រាមអាមេរិក ចាប់ពីឆ្នាំ២០១៨តទៅ»។
បើតាមអគ្គនាយកស៊ីម៉ាក កន្លងមកក្រសួងការបរទេសអាមេរិក បានឯកភាពគ្នា និងគាំទ្រកម្លាំងស៊ីម៉ាក់ ឲ្យជួយបោសសម្អាតគ្រាប់សំណល់ជាតិផ្ទុះរបស់អាមរិក ដែលបានទម្លាក់នៅលើទឹកដីកម្ពុជា។ ជាមួយនឹងថ្លែងសោកស្ដាយ ចំពោះការបញ្ចប់ជំនួយនេះ លោក ហេង រតនា ក៏បានឲ្យដឹងដែរថាជំនួយរបស់អាមេរិកផ្តល់ដល់ស៊ីម៉ាកក្នុងមួយឆ្នាំៗ មានទឹកប្រាក់ពី២លាន ទៅ២,១ លានដុល្លារ តាមរយៈអង្គការ NPA និង NGO goal den best ដែលជាក្រុមមុជទឹក។
គួរបញ្ជាក់ថា អាមេរិកបានទម្លាក់គ្រាប់បែកប្រមាណ ២លាន ៧សែនគ្រាប់ ក្នុងអំឡុងសង្គ្រាមនាទសវត្សរ៍១៩៧០ រវាងកងទ័ពសាធារណៈរដ្ឋកម្ពុជា ដែលគាំទ្រដោយសហរដ្ឋអាមេរិក និងកងទ័ពតស៊ូរបស់ខ្មែរក្រហម ក្រោយពេលពួកគេធ្វើរដ្ឋប្រហារទម្លាក់សម្តេច នរោត្តម សីហនុ នាថ្ងៃទី១៨ ខែមីនា ឆ្នាំ១៩៧០។
ទោះយ៉ាងណា មិនមែនមានតែកម្ពុជាមួយនោះទេ ដែលនឹងរងផលប៉ះពាល់ចំពោះគម្រោងផ្តាច់ជំនួយអាមេរិក ដែលស្នើដោយលោក ដូណាល់ ត្រាំ ប្រធានាធិបតីអាមេរិក កាលពីដើមខែមីនា ពិតជាត្រូវបានអនុម័តនៅចុងខែធ្នូ ឆ្នាំ២០១៧ ខាងមុខមែននោះ ពិភពលោកទាំងមូលនឹងប៉ះពាល់ដែរ។ លោក ដូណាល់ ត្រាំ បានស្នើកាត់បន្ថយថវិកាជាង ២៨ភាគរយដែលមានទំហំស្មើនឹង ១១ពាន់លានដុល្លារអាមេរិក សម្រាប់ក្រសួងការបរទេស ដែលក្នុងនោះមានទាំងថវិកាសម្រាប់ជំនួយអភិវឌ្ឍផងដែរ។ វាជាផ្នែកមួយនៃគោលនយោបាយ «តម្កល់ប្រយោជន៍អាមេរិកជាធំ»របស់ប្រធានាធិបតីផ្ទាល់៕
Tag:
ហេង រតនា
CMAC
កម្ពុជា
អាមេរិក
© រក្សាសិទ្ធិដោយ thmeythmey.com