ក្រុមកីឡាបាល់ទាត់ចំនួន៤នៃក្របខណ្ឌ Premier League រួមមាន Manchester City, Tottenham Hotspur, Chelsea និង Manchester United ស្ថិតក្នុងចំណោមក្រុមកំពូលទាំង៥នៅអឺរ៉ុបដែលមានចំនួនកីឡាករតម្លៃថ្លៃបំផុតលើលោក។ នេះបើតាមការផ្សាយរបស់ TheSun។
យោងតាមទិន្នន័យពីរបស់មន្ទីរស្រាវជ្រាវកីឡាបាល់ទាត់ CIES Football Observatory ក្រុម Manchester City ឈរនៅចំណាត់ថ្នាក់ទី១ ចំណែក Spurs នៅលំដាប់ថ្នាក់លេខ២ ខណៈលេខ៣ បានទៅ Barcelona លេខ៤ Chelsea និង Manchester United ឈរនៅលេខ៥។
ទាំង Manchester City និង Spurs សុទ្ធតែជាក្រុមដែលមានតម្លៃខ្លួនកីឡាករថ្លៃជាង ១ ពាន់លានផោន ដោយសារតែក្រុមទាំងពីរនេះមានតារាឆ្នើមដូចជា Kevin De Bruyne មានតម្លៃខ្លួន ១២៧លានផោន ប្រហែល១៦៧លានដុល្លារ និង Harry Kane ១៦៣លានផោន ប្រមាណ ២៤៤លានដុល្លារ ដែលជួយបង្កើនតម្លៃសរុបឲ្យក្លិបរៀងៗខ្លួនបន្ថែមទៀត។
ដោយឡែក Barcelona ដែលឈរនៅលេខ៣ មានតម្លៃ ១ពាន់លានផោន ប្រហែល ១.៣២ពាន់លានដុល្លារ ដោយមានកីឡាករថ្លៃជាងគេគឺ Luis Suarez តម្លៃ ១៥៥លានដុល្លារ។
តោខៀវ Chelsea នៅលេខរៀងទី៤ មានតម្លៃ ៩២០លានផោន ប្រមាណ ១២១១លានដុល្លារ ដែលកីឡាករថ្លៃជាងគេគឺ Eden Hazard ថ្លៃ១៤០លានដុល្លារ និងក្រុមបិសាចក្រហម Manchester United ស្ថិតនៅចំណាត់ថ្នាក់លេខ៥ មានតម្លៃ ៨១២លានផោន ប្រមាណ ១០៦៩លានដុល្លារ ដោយសារមានកីឡាករថ្លៃជាងគេគឺ Romelu Lukaku ថ្លៃ ១៩១លានដុល្លារ៕