កីឡាអន្តរជាតិ
អន្តរជាតិ
Man City រកចំណូលបាន ៦២០លានដុល្លារក្នុង១ឆ្នាំ ជាប់កំណត់ត្រាក្លិប
× Manchester City បានបញ្ចេញតួលេខប្រចាំឆ្នាំរបស់ខ្លួនកាលពីថ្ងៃពុធ ទី៨ ខែវិច្ឆិកានេះ ដែលបានទទួលប្រាក់ចំណូលជាកំណត់ត្រាក្លិបចំនួន ៤៧៣.៤លានផោន ប្រហែល ៦២០លានដុល្លាចរអាមេរិក ពោលគឺកើន ២១ភាគរយ។ នេះបើតាមការផ្សាយរបស់ទីភ្នាក់ងារសារព័ត៌មាន AFP។
តួលេខដែលបានចេញផ្សាយនៅក្នុងរបាយការណ៍ចំណូលប្រចាំឆ្នាំរបស់ក្រុមរហស្សនាមមេឃខៀវសម្រាប់រដូវកាល ២០១៦-២០១៧ បានបង្ហាញពីការកើនឡើងចំនួន ២១% នៃប្រាក់ចំណូលកាលពីឆ្នាំមុន បានន័យថាកើនរហូតដល់ ១៩៧,៥៨លានផោន ប្រមាណ ២៥៨លានដុល្លារ។
ប្រធានក្លិបលោក Khaldoon Al Mubarak បានលើកឡើងថា៖ «របាយការណ៍នេះគឺនិយាយអំពីការធានាថាអ្នកគាំទ្រ និងដៃគូរបស់យើងអាចមើលឃើញស្ថានភាពជាក់ស្តែងពិតប្រាកដនៃក្លិបរបស់យើងនាពេលបច្ចុប្បន្ន។ អ្វីដែលជាការរំពឹងទុករបស់យើងនោះគឺថាអង្គភាពកីឡាបាល់ទាត់និងការធ្វើពាណិជ្ជកម្មបាល់ទាត់មានភាពត្រឹមត្រូវ និងមានតុល្យភាពដើម្បីអនុញ្ញាតឲ្យយើងបន្តពង្រឹងនិងរីកចម្រើនបន្ថែមទៀត»។
យ៉ាងណាក៏ដោយ ចំនួននេះនៅតិចជាងប្រាក់ចំណូលរបស់ក្លិបដែលស្ថិតក្នុងទីក្រុងដូចគ្នាមួយទៀតគឺ Manchester United ដែលរកបាន ៥៨១លានផោន ប្រហែល ៧៦២លានដុល្លារក្នុងរយៈពេល១ឆ្នាំដូចគ្នា។
សូមបញ្ជាក់ថា ក្រោមការដឹកនាំរបស់លោក Pep Guardiola បច្ចុប្បន្នក្រុមដែលមានមូលដ្ឋានក្នុងទីក្រុង Manchester កំពុងនាំមុខគេ ៨ពិន្ទុក្នុងតារាង Premier League រួមទាំងអាចឆ្លងទៅវគ្គ១៦ក្រុមចុងក្រោយពានរង្វាន់ UEFA Champion League ដោយស្វ័ប្រវត្តិទៀតផង៕
Tag:
បាល់ទាត់
Manchester City
© រក្សាសិទ្ធិដោយ thmeythmey.com