ជប៉ុន និងកូរ៉េខាងត្បូងឈ្លោះគ្នាព្រោះរឿងយកបង្គាមកធ្វើម្ហូបឲ្យលោក ត្រាំ

អន្តរជាតិ

ជប៉ុន និងកូរ៉េខាងត្បូងឈ្លោះគ្នាព្រោះរឿងយកបង្គាមកធ្វើម្ហូបឲ្យលោក ត្រាំ

09, Nov 2017 , 3:50 pm

រូបភាព

ប្រធានាធិបតី ដូណាល់ ត្រាំ ជួបជាមួយស្រ្តីទាសករផ្លូវភេទដោយការបង្ខំរបស់ទាហានជប៉ុន (រូបភាព៖ The Korea Herald)

ដោយ: តន ចាន់រិទ្ធារ៉ា

អតីតសត្រូវចាស់ គឺកូរ៉េខាងត្បូង និងជប៉ុន បានផ្លោងសម្ដីដាក់គ្នាទៅវិញទៅមកជុំវិញវត្តមានអតីតទាសករផ្លូវភេទកូរ៉េខាងត្បូង និងការយកបង្គាពីកោះមានជម្លោះធ្វើជាអាហារក្នុងទស្សនកិច្ចរបស់ប្រធានាធិបតី ដូណាល់ ត្រាំ ។ ជប៉ុនបង្ហាញការមិនពេញចិត្តចំពោះសកម្មភាពទាំងពីរនេះ និងចោទកូរ៉េខាងត្បូងថា មិនគោរពកិច្ចព្រមព្រៀងនាពេលកន្លងមក។ កូរ៉េខាងត្បូងក៏ឆ្លើយវិញថា ការតវ៉ារបស់ជប៉ុន ជាការជ្រៀតជ្រែកហួសហេតុក្នុងកិច្ចការផ្ទៃក្នុងរបស់ខ្លួន។

ប្រធានាធិបតីអាមេរិក ដូណាល់ ត្រាំ ទើបបញ្ចប់ទស្សនកិច្ចនៅកូរ៉េខាងត្បូងកាលពីថ្ងៃទី៨ ខែវិច្ឆិកា។ ទស្សនកិច្ចនេះធ្វើទំនាក់ទំនងទ្វេភាគីអាមេរិក និងកូរ៉េខាងត្បូងកាន់តែប្រសើរឡើង ប៉ុន្តែទំនាក់ទំនងរវាងកូរ៉េខាងត្បូង និងជប៉ុន រង្គោះរង្គើទៅវិញ។ ប្រធានាធិបតីកូរ៉េខាងត្បូង មូន ចេអ៊ីន បានរៀបចំពិធីលាងសាយភោជន៍ផ្លូវការជូនលោក ត្រាំ ដោយបានអញ្ជើញអតីតទាសករផ្លូវភេទម្នាក់ឲ្យចូលរួមកម្មវិធីនេះ ហើយបានយកបង្គាពីកោះ Dokdo ធ្វើជាម្ហូបទៅទៀត។

មន្ត្រីជប៉ុនបានប្រតិកម្មយ៉ាងខ្លាំងនឹងសកម្មភាពរបស់ក្រុងសេអ៊ូល និងចាត់ទុកអញ្ជើញអតីតស្ត្រីបម្រើផ្លូវភេទសម័យសង្គ្រាមនេះ គឺជាការបំពានស្មារតីកិច្ចព្រមព្រៀងឆ្នាំ២០១៥ ដែលក្រុងតូក្យូ និងក្រុងសេអ៊ូលយល់ព្រមបញ្ចប់បញ្ហារ៉ាំរ៉ៃមួយនេះ។ ជប៉ុនរឹតតែមិនសប្បាយចិត្ត ពេលកូរ៉េខាងត្បូងយកបង្គាពីកោះ Dokdo ទទួលលោក ត្រាំ ព្រោះកោះនេះស្ថិតក្នុងភាពមិនដាច់ស្រេចនៅឡើយ ដោយជប៉ុនក៏ទាមទារសិទ្ធិគ្រប់គ្រងដែរ។

បើតាមទីភ្នាក់ងារព័ត៌មាន Yonhap ជប៉ុនបានតវ៉ាវត្តមានស្ដ្រីទាសករផ្លូវភេទនេះតាមផ្លូវការទូតរួចហើយ និងបានរំឭកកូរ៉េខាងត្បូងឲ្យគោរពតាមកិច្ចព្រមព្រៀងឆ្នាំ២០១៥ ដែលបញ្ចប់បញ្ហានេះ និងមិនអាចសើរើបានឡើយ។ ក្រោមកិច្ចព្រមព្រៀងដែលសម្រេចបានសម័យអតីតប្រធានាធិបតី ប៉ាក ហ្គឺនហេ ជប៉ុនបានប្រាក់ជំងឺចិត្តដល់ជនរងគ្រោះទាំងអស់ចំនួនជិត៩លានដុល្លារដើម្បីបិទសំណុំរឿង ប៉ុន្តែរដ្ឋបាលលោក មូន ប្រកាសសើរើកិច្ចព្រមព្រៀងនេះឡើងវិញ។

ទាក់ទងការតវ៉ារបស់ជប៉ុន ក្រសួងការបរទេសកូរ៉េខាងត្បូងបានឆ្លើយបកស្រាយតាមផ្លូវការទូតរួចហើយដែរ និងចាត់ទុកសកម្មភាពរបស់ជប៉ុនជារឿងមិនសមរម្យ ដ្បិតជប៉ុនចូលលូកលាន់ការរៀបចំបដិសណ្ឋារកិច្ចចំពោះលោក ត្រាំ ។ អ្នកនាំពាក្យលោក Noh Kyu-duk បាននិយាយនៅថ្ងៃទី៩ ខែវិច្ឆិកា ថា អាហារសម្រាប់ទទួលលោក ត្រាំ និងភ្ញៀវត្រូវអញ្ជើញនោះ គឺត្រូវបានកំណត់ដោយពិនិត្យលើកត្តាចាំបាច់ទាំងអស់។

សំណុំរឿងទាសករផ្លូវភេទ និងរឿងដែនកោះ Dokdo គឺជារបួសចាស់ដែលមិនអាចព្យាបាលបាន និងក្លាយជាឧបសគ្គរាំងស្ទះដល់ការកសាងទំនាក់ទំនងដោយការជឿទុកចិត្តរវាងប្រទេសជិតខាងទាំងពីរនេះ។ ប្រជាជនកូរ៉េខាងត្បូងនៅតែចងចាំសកម្មភាពឃោរឃៅរបស់ទាហានជប៉ុនកាលពីសម័យសង្គ្រាម និងបានទាមទារឲ្យជប៉ុនសុំទោសជនរងគ្រោះឲ្យបានសមរម្យទៀតផង។ ឯកិច្ចព្រមព្រៀងឆ្នាំ២០១៥វិញ ក៏ទំនងជាមិនអាចផ្សះផ្សាភាពសង្ស័យបានដែរ៕