ជាតិ
នយោបាយជាតិ
តុលាការកំពូលនឹងចាប់ផ្តើមសវនាការលើបណ្តឹងរំលាយបក្សសង្គ្រោះជាតិក្រោមការរឹតបន្តឹងសន្តិសុខយ៉ាងតឹងរឹង
× អ្នកសារព័ត៌មានកំពុងជួបជុំគ្នានៅមុខតុលាការកំពូល ដែលតាមគម្រោង នឹងបើកសវនាការជម្រះបណ្តឹងរបស់ក្រសួងមហាផ្ទៃដែលប្តឹងរំលាយគណបក្សសង្គ្រោះជាតិ និងផ្អាកសិទ្ធិនយោបាយរបស់ថ្នាក់ដឹកនាំនៃគណបក្សប្រឆាំងដ៏ធំមួយនេះ។ ដើមទងនៃបណ្តឹង គឺការសង្ស័យថាគណបក្សមួយនេះមានជាប់ពាក់ព័ន្ធនឹងឯកឧត្តម កឹម សុខា ដែលជាប្រធានគណបក្សសង្គ្រោះជាតិ ហើយដែលកំពុងត្រូវចោទពីបទល្មើសក្បត់ជាតិ។
ព្រឹកនេះ តុលាការកំពូលនឹងបើកសវនាការជម្រះក្តីលើបណ្តឹងស្នើសុំរំលាយគណបក្សសង្គ្រោះជាតិ។ គេសង្កេតឃើញថា នៅជុំវិញតុលាការ ពោរពេញទៅដោយកម្លាំងសមត្ថកិច្ច ដែលឈរការពារសន្តិសុខយ៉ាងម៉ត់ចត់។ នៅជុំវិញតុលាការកំពូល សុទ្ធតែមានរបាំងការពារផងដែរ។ សូម្បីតែអ្នកកាសែត ក៏ត្រូវសមត្ថកិច្ចសួរនាំ និងពិនិត្យអត្តសញ្ញាណយ៉ាងលម្អិតបំផុត។
ទោះយ៉ាងក៏ដោយ រហូតដល់ព្រឹកព្រលឹម មុនការចាប់ផ្តើមសវនាការនេះ សភាពការណ៍ហាក់ស្ងប់ស្ងាត់ ដោយគេពុំឃើញមានការជួបជុំរបស់ក្រុមអ្នកតវ៉ាណាមួយនោះឡើយ។
© រក្សាសិទ្ធិដោយ thmeythmey.com