ជាតិ
សេដ្ឋកិច្ច
រដ្ឋាភិបាលសម្រេចបន្ថយពន្ធដល់គ្រឹះស្ថានមីក្រូហិរញ្ញវត្ថុ
× ភ្នំពេញ៖ រដ្ឋាភិបាលបានសម្រេចបន្ធូរបន្ថយពន្ធកាក់ទុកលើប្រាក់កម្ចីពីបរទេសរបស់គ្រឹះស្ថានមីក្រូហិរញ្ញវត្ថុ ដែលបន្ថយពី ១៤ភាគរយ មក ១០ភាគរយ។ នេះបើតាមប្រកាសរបស់ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៧ខែតុលា។
ការសម្រចបន្ធូរបន្ថយពន្ធនេះ គឺធ្វើឡើងបន្ទាប់ពីរដ្ឋាភិបាលបានកំណត់ឲ្យគ្រឹះស្ថានហិរញ្ញវត្ថុផ្ដល់កម្ចីដល់ប្រជាពលរដ្ឋដោយគិតអត្រាការប្រាក់មិនលើសពី ១៨ភាគរយក្នុងមួយឆ្នាំ។
ប្រកាសខាងលើបានកំណត់ថា គ្រឹះស្ថានមីក្រូហិរញ្ញវត្ថុត្រូវអនុវត្តការកាត់ទុកប្រាក់ពន្ធលើការប្រាក់ដែលខ្ចីពីបរទេសចំនួន ១០ភាគរយ ដោយនៅសល់ ៤ភាគរយទៀតជាបន្ទុករបស់រដ្ឋ។
ការសម្រេចនេះ ក្រសួងអះអាងដូច្នេះថា៖«ដើម្បីជួយសម្រាលបន្ទុកចំណាយលើការប្រាក់ចំពោះប្រាក់ដែលខ្ចីពីបរទេសរបស់គ្រឹះស្ថានមីក្រូហិរញ្ញវត្ថុ ដើម្បីរក្សានិរន្តរភាពនៃវិស័យមីក្រូហិរញ្ញវត្ថុ»។
ប្រកាសនេះកំណត់ទៀតថា៖«ការអនុគ្រោះនេះ ត្រូវអនុវត្តចំពោះការទូរទាត់ការប្រាក់ក្នុងអំឡុងឆ្នាំ២០១៧ និងឆ្នាំ២០១៨ ប៉ុន្តែមិនអនុវត្តចំពោះការប្រាក់ដែលបានទូទាត់មុនពេលចូលជាធរមាននៃប្រកាសនេះទេ»។
លោក សុខ វឿន អគ្គនាយកគ្រឹះស្ថានមីក្រូហិរញ្ញវត្ថុ LOLC ដែលត្រូវបានដកស្រង់សំដីដោយការសែតភ្នំពេញប៉ុស្តិ៍ នៅថ្ងៃទី១៥ខែវិច្ឆិកា បានឲ្យដឹងថា ការបន្ធូរបន្ធយពន្ធនេះជាផលវិជ្ជមានមួយ ដែលបានជួយសម្រាលបន្ទុករបស់មីក្រូហិរញ្ញវត្ថុលើការចំណាយសម្រាប់ទទួលបានប្រភពទុនពីបរទេស។ ប៉ុន្តែលោកថ្លែងថា ការទទួលបានអត្ថប្រយោជន៍នេះមានរយៈខ្លី ខណៈឆ្នាំ២០១៧ជិតផុតទៅហើយ។
បើតាមការអះអាងរបស់អ្នកក្នុងវិស័យនេះ ទឹកប្រាក់កម្ចីពីបរទេស បើគិតសម្រាប់តែគ្រឹះស្ថានមីក្រូហិរញ្ញវត្ថុឈានមុខគេចំនួន ៧ មានចំនួន ១,០៩ពាន់លានដុល្លារ ស្នើនឹង ៨១ភាគរយនៃកម្ចីសរុប ១,៣៣ ពាន់លានដុល្លារ គិតត្រឹមបំណាច់ឆ្នាំ២០១៦ ។ ហើយជាមួយការបន្ធូរបន្ធយពន្ធនេះ អាចធ្វើឲ្យឧស្សាហកម្មនេះសន្សំបានប្រមាណ ៤លានដុល្លារក្នុងមួយឆ្នាំ៕
Tag:
ពន្ធកាត់ទុក
ឥណទាន
© រក្សាសិទ្ធិដោយ thmeythmey.com