ជាតិ
នយោបាយជាតិ
សភា ប្រាប់ឲ្យតំណាងរាស្ត្រ CNRP ប្រគល់សម្ភារទាំងអស់វិញ ទីស្នាក់ការគណបក្សសង្គ្រោះជាតិនៅមុនតុលាការកំពូលប្រកាសរំលាយនៅថ្ងៃទី១៦ ខែវិច្ឆិកា។ រូបថត AFP
× ភ្នំពេញ៖ រដ្ឋសភា សម្រេចលុបឈ្មោះអតីតតំណាងរាស្ត្រទាំង៥៥រូប នៃគណបក្សសង្គ្រោះជាតិជាផ្លូវការ បន្ទាប់ពីតុលាការកំពូលប្រកាសសាលដីការំលាយចោលដោយបិទផ្លូវតវ៉ា។ ចំណែកសម្ភារតំណាងរាស្ត្រគណបក្សសង្គ្រោះជាតិទាំងអស់ ត្រូវប្រគល់ជូនរដ្ឋសភាវិញ។
លោក ឡេង ប៉េងឡុង បន្តថា មិនត្រឹមតែអតីតតំណាងរាស្ត្រគណបក្សសង្គ្រោះជាតិនោះទេ សូម្បីមនុស្សប្រមាណ១00នាក់ផ្សេងទៀត ដែលរួមមានទីប្រឹក្សា ជំនួយការ និងអ្នកបើករថយន្តរបស់ពួកគាត់ ក៏ត្រូវលុបឈ្មោះចេញពីក្របខណ្ឌនៃមន្ត្រីរដ្ឋសភាដែរ។ ថ្លែងប្រាប់សារព័ត៌មានថ្មីៗ អ្នកនាំពាក្យរដ្ឋសភារូបនេះ បញ្ជាក់ដូច្នេះថា៖«ត្រូវលុបទាំងអស់ ព្រោះពួកគាត់ ធ្វើការឲ្យតំណាងរាស្ត្រទាំង៥៥រូប ដូច្នេះឲ្យតែតំណាងរាស្ត្រទាំង៥៥ហ្នឹង ត្រូវលុបឈ្មោះ ពួកគាត់ ក៏ត្រូវលុបឈ្មោះដែរ»។
លោក ឡេង ប៉េងឡុង បន្ថែមទៀតថា រដ្ឋសភា ក៏បានផ្ញើលិខិតទៅកាន់អតីតតំណាងរាស្ត្រគណបក្សសង្គ្រោះជាតិផងដែរ ដើម្បីស្នើឲ្យប្រគាល់សម្ភារផ្សេងៗ មានដូចជា រថយន្ត និងកំព្យូទ័រយួរដៃ (Laptop) ជាដើម ដែលបានចុះក្នុងបញ្ជីសារពើព័ន្ធរបស់រដ្ឋ សម្រាប់ទុកឲ្យអ្នកដទៃប្រើប្រាស់បន្ត។ បើតាមលោក ឡេង ប៉េងឡុង រហូតមកដល់ពេលនេះ មានអតីតតំណាងរាស្ត្រគណបក្សសង្គ្រោះជាតិមួយចំនួន បានប្រគល់សម្ភារទាំងនោះ ទៅកាន់រដ្ឋសភាវិញហើយ៕
© រក្សាសិទ្ធិដោយ thmeythmey.com