ជាតិ
សង្គមជាតិ
ទូតអាមេរិកស្វែងរកអ្នកឯកទេសខ្មែរ និងបរទេសសម្រាប់គម្រោងដោះមីន ២លានដុល្លារ
× ស្ថានទូតអាមេរិកប្រចាំកម្ពុជា ប្រកាសផ្ដល់ប្រាក់ចំនួន២លានដុល្លារអាមេរិក ដើម្បីឲ្យក្រុមអ្នកមានសមត្ថភាពទាំងជាតិ និងអន្តរជាតិ ស្នើសុំគម្រោងដោះយុទ្ធភណ្ឌមិនទាន់ផ្ទុះ នៅភាគខាងកើតប្រទេសកម្ពុជា។ គម្រោងនេះ មានរយៈពេលមួយឆ្នាំ ត្រូវអនុវត្តនៅឆ្នាំ២០១៨ ហើយនឹងអាចបន្តរយៈពេលបាន២ឆ្នាំទៀតផងដែរ។
ដើម្បីចូលរួមដោះយុទ្ធភណ្ឌមិនទាន់ផ្ទុះនៅកម្ពុជា ស្ថានទូតអាមេរិក បានសម្រេចផ្ដល់ថវិកាចំនួន២លានដុល្លារ រយៈពេលមួយឆ្នាំសម្រាប់ការសិក្សាអង្កេត និងដោះយុទ្ធភណ្ឌមិនទាន់ផ្ទុះនៅភាគខាងកើតនៃប្រទេសកម្ពុជា។ ថវិកានេះស្ថានទូតអាមេរិក បានប្រកាសទទួលពាក្យស្នើសុំថវិកានេះសម្រាប់ឆ្នាំ២០១៨ ដល់ឆ្នាំ២០១៩ និងអាចមានលទ្ធភាពសម្រាប់២ឆ្នាំទៀត។
ឯកអគ្គរដ្ឋទូតអាមេរិក លោក William Heidt បានបញ្ជាក់ក្នុងសេចក្តីប្រកាសព័ត៌មានថា សហរដ្ឋអាមេរិកបានជួយដោះមីន មនុស្សធម៌នៅកម្ពុជា អស់រយៈពេល២០ឆ្នាំមកហើយ ហើយមានការប្ដេជ្ញាចិត្តក្នុងការដោះស្រាយកេរដំណែលនៃសម័យសង្គ្រាម។ លោក Heidt បញ្ជាក់ដូច្ន៖«យើងកំពុងរកមើលក្រុមអ្នកឯកទេសខ្មែរ និងក្រុមអ្នកឯកទេសអន្តរជាតិ ដើម្បីឲ្យមកជួយដោះយុទ្ធភណ្ឌមិនទាន់ផ្ទុះ នៅភាគខាងកើតប្រទេសកម្ពុជា»។
២០ឆ្នាំមកនេះ សហរដ្ឋអាមេរិកបានចំណាយប្រាក់អស់១៣១លានដុល្លារ ដើម្បីរកមើល និងដោះចេញយុទ្ធភណ្ឌមិនទាន់ផ្ទុះ របស់អាមេរិកនៅភាគខាងកើត។ តាមសេចក្ដីប្រកាសព័ត៌មាន មិនត្រឹមតែដោះយុទ្ធភណ្ឌមិនទាន់ផ្ទុះរបស់អាមេរិកទេ តែកន្លងទៅ អាមេរិកក៏បានជួយដោះយុទ្ធភណ្ឌមិនទាន់ផ្ទុះរបស់ប្រទេសចិន វៀតណាម និងសហភាពសូវៀត នៅតាមតំបន់ផ្សេងទៀត ក្នុងប្រទេសកម្ពុជាដែរ។
សូមបញ្ជាក់ថា ក្រសួងការបរទេសកម្ពុជាធ្លាប់បានប្រកាសជាផ្លូវការកាលពីថ្ងៃទី១ខែ វិច្ឆិកា ពីការប្តឹងទៅអង្គការហាមឃាត់អាវុធគីមី ដែលមានទីស្នាក់ការនៅទីក្រុងឡាអេ ប្រទេសហូឡង់។ ការប្រកាសប្តឹងនេះ ធ្វើឡើងបន្ទាប់ពីអាជ្ញាធរកម្ពុជា បានរកឃើញអាវុធគីមីរបស់អាមេរិក កាន់តែច្រើនទៅៗនៅលើទឹកដីប៉ែកខាងកើត នៃប្រទេសកម្ពុជា៕
Tag:
យុទ្ធភណ្ឌមិនទាន់ផ្ទុះ
កម្ពុជា
អាមេរិក
© រក្សាសិទ្ធិដោយ thmeythmey.com